Read Poumei Naga SEI-ATAMAI VAHTAO 19 Bible Online

SEI-ATAMAI VAHTAO 19 - Poumei Naga bible

SEI-ATAMAI VAHTAO 19

¹Apollos nou Korinth hi bubu kisü Paul nou teidei reikou lonou tachopoa Ephesa hi veloue. Sühinou puhnou tave rozümai kamaiye daoloue.

²Alia puhnou puletao hi noue, “Neletao nou louche louyu hinou Rako Mashi ngaoloure moe?” Sühinou puletao nou puh hi chila peie, “Rako Mashi bue touyu Ehwo choua choukhai mohie.”

³Südonou Paul nou noue, “Sükulouzü neletaoye kakuyu zhai hinou dzükhao dapeie?” Puletao nou chila peie, “Johan vei dzükhao dayu zhai hinoue.”

⁴Alia Paul nou paoe, “Johan nou dzükhao dapeiyu hai le dalouyu vei baie. Puhnou puh thainou velaiyu süolouzü Jisu ye louche loure donou maikhemai hi paopeie.”

⁵Puletao nou süsü choulouyu kisü, puletaoye Mapaowo Jisu zhih hinou dzükhao dapeire.

⁶Alia Paul nou puletao pei hi puh bah lakhai peiyu kisü Rako Mashinou puletao pei hi koulou loure; alia puletao nou la tyakuku hinou paopaloua rachi paola pare.

⁷Puletao hrülai sü mai kiahai phae.

⁸Alia Paul nou rathobuh hi talouloua Ramai vedei vanou maikhe maiye koa chi veiva-a ea paothou louche peire donou te-a khou asü khuveia doupeie.

⁹Ana kamainou le khousholoua ea loucheba-a maikhemai nghojünou Mapao vei Ludu naye sü paoshiyu kisü puhnou puletao hinou taloua ea lüloumai taoye saloua teithe tsünou Turanna vei kiduna hinou chi pha-kua bue.

¹⁰Haikua po ahaisü thaokhaimoa takoue. Südonou Asia teidei hi buyu maikhemai hrülainou süolouzü Jihudimai ea Greekmai taonou Mapao vei chipao sü chouloue.

¹¹Ana Ramai nou Paul bah vanou mainou soulouho khupa vah panou soue.

¹²Sükua puh vasou hinou pahsousah moa sazha sü poloua lishi maitao hi poveyu kisü puletao sounou sü veiloue ea rashi tao-a puletao hinou tapaloue.

¹³Sükisü rashiye huta-a veisühao-a laiyu Jihudimai kamainou Mapaowo Jisu zhihsü kua rashinou louyu maitao pei hi, “Paul nou paodoua laiyu Jisu zhih hinou Enou neye tapalouwo tea kharochi peiwe,” tea paoe.

¹⁴Haikua souyu sü Jihudimai napao peichawo Skiva tea kuyu mai sünavei nahpoutu mai anai taonou soue.

¹⁵Ana rashi nanou puletao hi chila peie, “Enou Jisu ye süe ea Paulye süe; ana neletaowo thaoh-e?”

¹⁶Alia rashinou louyu mai sünanou puletao vahi chihshoa tukou sholoua puletaoye sü kokhai loure. Sükua puhnou puletaoye khousasa peiwu-a puletao sü baitoua ea zhupeiwu-a ki süna hinou vakou tupare.

¹⁷Alia ko süsü Ephesa hi buyu Jihudimai ea Greek maitao hrülainou sülouyu kisü ngaopinou puletao hrülai pei hi sü phouloure; alia Mapao Jisu zhih sü panou paosho loure.

¹⁸Alia chunou lülouyu mai alaosou taveloua puletao vei ashi vahtao sü dua paopa ngaoe.

¹⁹Alia khei khupado souyumai taolinou puletao vei larübvü taosü pove dzüloua sütaosü maikhemai nghojünou dua mei deiwure; alia sütao teitei vei muh sü puletao nou chovedzüyu kisü husha theraingou pae.

²⁰Südonou Mapao vei chipao sü buh likihi chouveloua khouchihsho paloure.

²¹Haitao hai pacheyu thaisü Paul nou Makedonia ea Akhaia tachopoa Jerusalem hi veloure donou puh lesü laloua paoe, “Enou sühi velouyu thaisü Rom-a ve zhu vuzüyu chie.”

²²Alia puhye soukhayu hai Timothi ea Erastasye Makedonia hi seitawu-a puh lahnou teile jütou Asia teidei hinou nai-a bue.

²³Teile süphaki sü Mapao vei Ludu vanou Ephesa hisü chi bvürosho loure.

²⁴Daiolouzü Demetria tea kuyu shahu ku-a laiyu mai sünanou Diana basharapao sü shahunou soua bashavah soumaitao hisü vah alaosou peiwe.

²⁵Puhnou sümaitao ea puletaoye vahlu zhoyu kukhe maitaoye kuve dzüloua puletao hi paoe, “Maikhe maitaore, bashavah haina vanou Eletao sü kini alaosou ngaowe touyu sü neletao nou sükhaiwe.

²⁶Alia chuo, lah neletao noua Paul hainanou dai sousa touyu sü ngao-a ngaolai ea sü-a sülai süolouzü bahnou souyu ratao hai halia ramaimoe tea puhnou pao-a Ephesa hi likhei baimoa Asia teidei buh liki hinou maikhe maiye paothou louche peiwu-a mai taoli le soudare.

²⁷Südonou Eletao buh haina likhei khekai souhayu baimoa Asia tamai hrülai ea deiphaomai hrülainou thoa buyu dushoyu rapfüpai Diana vei rathoki-a mainou ngaophou mozhei bailai ea sükua puhvei adushosü souhalou veie touyu kao-ashi sü bue!”

²⁸Maikhe mainou chipao sütaosü choulouyu kisü puletao sü rarou sholoua “Ephesa tamai rapfüpai Diana nou dukayu nasüe!” tea shusoua shaloure.

²⁹Südonou thalasou nuhdu sühisü bvürosho loure; alia puletao nou Paulye koa vei-a laiyu Makedonia tamai Gaius ea Aristarkha ye süthailoua tsü-le alikheisoua meime kihi tuveloue.

³⁰Sükisü Paul nou maisou hrohi talounü loure, ana rozümai taonou baloure.

³¹Alia puhnou samai soua laiyu Asia teidei hi adumai kamainou puh hi chi paove-a puhye nou meimeki hi talou puhzhu ngaopei more donou puh hi khoe.

³²Chuo sühisü kamainou chili pao, kukhe mainou chi kuli pao-a shusou rao-a buloure, daiolouzü meime teitei sü pha-bei sükhai more, alia maikhemai poulonou daidonou sühi tave dzüsa touyu koutea sümoe.

³³Alia maikhemai kamainou Alekjandar ye sü maisou hrohinou talou süthai paloue; daiolouzü Jihudimai taonou puhye sü maikhemai nghojülo dokoue. Sükisü Alekjandar nou maikhemai hi kaona-a buloure donou puh bahsü zha-a puh zü chi sü paongaore donou te-e.

³⁴Ana puletao nou puh hai Jihudimai alie touyu sü sülouyu kisü puletao hrülainou teilecho ahai pha pai alikheisoua, “Ephesa tamai rapfüpai Diana nou dukayu nasüe,” tea shusoua raopoloure!

³⁵Alia nuhdu hi rü-akhaio nou maikhe maiye panou kaona-a buloua paoe, “Ephesa hi maitaore, Ephesa tamai nuhdu hainasü rapfüpai Diana aduna vei rathoki ea raki hinou dekouyu sheeyu chuh naye khowo nasüe touyu sümoyu thaoh bue?

³⁶Südonou chi haitao hai maitalinoua motoulou hoyu donou neletao hatalia chaochao soumoa kaona-a bubaiyu kaoe.

³⁷Daiolouzü neletao nou rathoki taohi talou vaomoyu moa Eletao rapfüpaiye paoshi-paokha moyu mai ahaiye buh haihi save khai khaitoue.

³⁸Südonou Demetria nou ea puhye koa laiyu bashavah souyu maitao nou maitali pei hi mah dukhaire bue toulouzü chikuki taosü houkhaitoue ea chi kupeire paopumaitao-a bue; puletaoye panou sümaitao hinou tave chikulo.

³⁹Ana neletao nou züpayu chi kukheli popa kure donou phoua bue toulouzü süsü zhai thaifüa tayu tsüme hinou kukoulai.

⁴⁰Daiolouzü zhouvei bvü-royu haina vanou Eletao nou paozü loure qolia hayu vanou zhou Eletaoye nou sou bvü-ro peiwe tea paodulou veiyu kao-ashi bue.”

⁴¹Alia puhnou süsü paowu-a tsüme sü panou potare.