Read Poumei Naga SEI-ATAMAI VAHTAO 2 Bible Online

SEI-ATAMAI VAHTAO 2 - Poumei Naga bible

SEI-ATAMAI VAHTAO 2

¹Alia Pentekos teithe velouyu kisü puletao hrülaisü buh ali hinou vedzüa buloure.

²Alia sükhaimoa chihshoyu teikhai hüveyu kua kho alisü rakivanou veloua puletao nou buyu ki süna hisü phoupei loure.

³Alia sükisü meikei kuyu mali taosü kouloua puletao alili pei hi ve kukua taopeiyu sü puletao nou ngaoloure.

⁴Sühinou puletao hrülaisü Rako Mashinou phoupeiloua Rakonou puletaoye süpeiyu thaifüa kukuyu la hinou paoshu loure.

⁵Alia sükisü tei khehinou hrüa buyu deiphao hi tahrüh liki hinou achechea rathoyu Jihudimai taosü Jerusalem hinou tave chao-a buloure.

⁶Alia pai süsü choulouyu kisü maisou alaosou tave dzüloure, alia puletaosü khupa loure, daiolouzü mai sütaonou pao-a buyu sü puletao hrülainou lahlah la hinou choukhai loure.

⁷Alia puletao hrülai sü khupa sholoua alinou lihi paoe, “Zhukhaio, chi pao-a buyu mai haitao hrülaisü Galilee himai mowu?

⁸Sükulouzü kakua Eletao ali linou puletao nou paoyu sü Ehlah Eh pfünabuh la hinou choulouwe?

⁹Eletao sü Parthia, Media ea Elam hinou; Mesopotamia, Judea ea Kappadokia hinou; Pontas ea Asia hinou,

¹⁰Frigia ea Pamphulia hinou Ejipt ea Kurini ngheiki buyu Libia teideitao hinou ve. Eletao hrohi kamainou (süolouzü Jihudimai ea Jihudi dalou maitao) Rom hinou ve.

¹¹Eletao kamainou Krit ea Arabia hinou ve; sütoukhaia, Eletao hrülainou puletao nou Ramai nou adu-sho soupeiyu vanou paongaoyu sü Ehlah Eh la hinou chouwe!”

¹²Alia puletao hrülainou khupaloua ea tsü-bo phouhaloua alinou lihi, “Haire dai khue?” tea noue.

¹³Ana kukhemai taonou lüloumai taoye konüa, “Mai haitaosü darkha zhaoh ashu shozhiwe!” tea paoe.

¹⁴Ana Pitar nou kialitaoye koa lashuloua puh paisü kushoa maisou hi paoshu loure; “He Jihudimaitao ea Jerusalem hinou hrüa buyu maikhemai hrülai, süna vanou Enou neletao hi sheesha-a paongao peilai, Achipao hai soutaosou keipeikhaio.

¹⁵Neletao nou choyu kua mai haitao louzü zhaoh shozhi moe, daiolouzü chu teile haisü shona teilecho akü tabai hie.

¹⁶Ana haisü Joel rachi paolawonou paopawuyu süsüe süolouzü:

¹⁷“Ramai nou paoe, akhai teithetao hisü haibüa palai; süolouzü, Enou Arakosü maikhemai hrülai pei hi lakou thoupeilai: Alia neletao nahpoutumai ea nah naotumai taonou rachi paopalai, alia neletao vei nahlemai taonou zho ngaolai, alia neletao vei khaimai taonou me mulai.

¹⁸Ovai, teithe sütao kisü Enou Akilai naotu-poutu maitao pei hi Arakosü lakouthou peilai; alia puletao nou rachi paopalai.

¹⁹Alia Enou reikou ratei hinou khupa tyali ea khekou deiphao hinou shee tyali süolouzü zhe, mei ea meikhaovei dzükhao taosü pongaolai;

²⁰Mapao vei dushoyu ea varuyu teithe vemo jühinou teinghi sü zhitalai ea khouh sü zhe data bailai.

²¹Alia sükisü Mapaowo zhih kua bumai taliye sü khailu peilai.

²²“He Israel maitao, chipao haitao sü keiloukhaio! Nazareth hi Jisu hai Ramai nou neletao hrohinou puh vanou mainou soulouho khupa vahtao ea sheetao souyu, süolouzü puh hai Ramai nou ae-ao touyu mai alie touyu sü neletao lah neletao nou süa bue.

²³Mai hainaye sü Ramai vei soudayu ea puhvei raia süyu tsü süna thaifüa neletao bah hi thoupeiwu-a, neletao nou mai ashimaiye panou puhye sü kros vanou datheare.

²⁴Anou Ramai nou puhye sü athaivei khouko hinou mado soupeiwu-a souhri peire, daiolouzü puhye sü athainanou bekhai shalou hoe.

²⁵Daiolouzü David nou puh vanou haibüa paoe, ‘Enou teisanou Mapaoye Anghojünou ngaowe, daiolouzü Eye panou kao-du tamore donou puhsü Abahkha zhoulo hinou bue.

²⁶Südonou Alesü sashowe alia Amali nou vashoyu chipaowe; Sübaimoa Apfüphao-a puhye zhia hrülai.

²⁷Daiolouzü nenou Arakoye sü athaimai deiphao hi thaokhai peiwu laimoe; moa nenou nevei Masheeoye sü panou tah-rayu ngaolaimoe.

²⁸Nenou Ahi hriyu ludu taosü ngaopeiwure; alia nenou Eye koa bupeiyu sünanou Alehai alaosou sousa peilai.’

²⁹“Athaihou jürai maitao, Enou khuveishoa neletao hi Eletao puo-pao David vanou paopei lousüe, süolouzü puhsü thai-a thaire, ea povu-a povure, alia puh khühsü zhou koutea haihi bue.

³⁰Südonou puhnou rachi paolamai ali soua puh tao-nahmai aliye panou puh vebuh hisü bulai tea Ramai nou cha-chouli puh hi apaopei khaitoue touyu sü puhnou süloue.

³¹Ramai nou thaikhaihi soure sü puhnou rai-a zhingaoloua Khrista nou hrishu laiyu vanou haibüa paoe, ‘Puhye sü thaimai deiphao hinou thaowu moe; moa puh pfüphao sü khüh hinou tah-ramoe.’

³²Jisu hainaye sü Ramai nou souhrishu peire, alia Eletao hrülaisü hainavei zhopaoh maitaoe.

³³Südonou puhye sü puhpuo, Ramai bahkha zhoulo hi panou khe bulouyu vanou, alia Puo hinou apaopei khaitouyu Rako Mashi nasü ngaolouyu donou, puhnou chu neletao nou ngao-a buyu ea choua buyu Rakovei sapeina nasü lakou thoupei khaitoue.

³⁴Daiolouzü Davidwo raki hi khemoe, ana puhnou paoe, ‘Mapaowo nou A Mapao hi paoe, Abakha zhoulo nou bulo.

³⁵Enou nevei ngaoba maitaoye sü ne phi khehi khaipeimo sasü.’

³⁶“Südonou neletao nou kros vanou veatheayu Jisu hainaye sü Ramai nou Mapao-a, Khrista-a soupeire touyu sü Israel maitao hrülainou soutaosoua sülo!”

³⁷Maikhemai taonou chipao hainasü choulouyu kisü puletao lesü daisholoua Pitar hi ea kukhe sei-atamai taohi paoe, “Athaihou jürai khemai, Ehnou dai soulai?”

³⁸Alia Pitar nou puletao hi paoe, “Le dalo, alia neletao mah khaipeire donou, neletao mai ali linou Jisu Khrista zhih hinou dzükhao dalo; alia neletao nou Rako Mashi vei sapeina nasü ngaoloulai.

³⁹Daiolouzü Mapaowo Eletao Ramai nou apaopei khaitouyu nasü puh hi kuve-a buyu mai hrülai hi süolouzü neletao, nele nahmaitao ea adoukounou buyu mai hrülai donoue.”

⁴⁰Alia puhnou kukhe chi taoli pao-a zhopaoh soue ea puletaoye süpeiyu noupu paoe, “Neletao lahnou ashi maikha haina hinou khailu palouwo!”

⁴¹Südonou puh chipao polouyu maitaoye sü dzükhao dapeire, alia teithe süzhounou mai the asüpha puletao mehi thoupu peire.

⁴²Alia puletaosü sei-atamai taonou doupeiyu hi, rako meime hi, raokhao soukhoyu hi ea veachi paoyu hinou tobai soumoa lenou shoa buloure.

⁴³Alia sei-atamai taonou khupa vah alaosou ea shee tyali souloure ea maikhemai hrülai sü ngaopisho loure.

⁴⁴Alia lüloumai hrülaisü vedzüloua na teitei sü khaloure.

⁴⁵Alia puletao nou puletao vei ki-lu, ki-na buyu teitei sü zhowu-a sütao veishi sü mai hrülai hi lah lahnou moshi laiyu thaifüa zhihpeire.

⁴⁶Alia teithe tsünou puletao sü tsü-le alisoua Rathoki hinou tave dzüa bue, alia ki, ki hinou tave raokhao soukhoa puletao vei tovai sü koa sasa-a ea le alikhei soua tousho loure.

⁴⁷Alia haikua Ramaiye shoa, maikhemai hrülaivei zhuvea sü ngaoloue. Alia Mapaowo nou khailuloua buyu maitaoye sü teithe tsünou puletao me hisü pothou pupeie.