Read Poumei Naga SEI-ATAMAI VAHTAO 20 Bible Online

SEI-ATAMAI VAHTAO 20 - Poumei Naga bible

SEI-ATAMAI VAHTAO 20

¹Alia büroyu süna hayu thaisü, Paul nou rozümai taoye kuve dzüloua puletao lesü souho peiwu-a Makedonia hi vetare donou puletao hi tarayu chi paowu-a sühinou tare.

²Puhnou teidei sühao hilonou taveloua maikhemai hi le souhoyu chi soutaosou paopeiwu-a Grees hi tave louloure.

³Sühinou puhnou khou asü nai-a bue. Alia puhnou dzüluki hinou Suria hilo vere souda-a buyu hinou, puhye Jihudimainou dah-a bushe touyu kosü süloua puhnou Makedonia hilonou tachopoa khaitare le laloure.

⁴Alia Berea hinou Purha nahpoutu Sopater, Thessalonika hinou Aristarkha ea Sekunda, Derbe hinou Gaius, alia Timothi, Asia teidei hinou Tukhika ea Trophima, sümaitao nou puhye koa tare.

⁵Puletao nou rai-a taho Troa hinou ve Eletaoye khoa bue.

⁶Ana Raokonüh cheyu thaisü Eletao nou Philippi hinou dzüluki hi louloua teithe angou tayu thaisü Troa hi velouloua puletaoye lou zholoure ea Eletao nou sühinou teithe anai nai-a bue.

⁷Alia teithecho hi teithe raikaiki hinou Eletao nou raokhao soukholoua toure donou tave dzüa buyu hinou Paul nou thainaisho tare tsü chodapoa puletao hi ko paodoupeia khei tsüle koute chi paoe.

⁸Alia Eletao nou vedzüa buyu kishorei kide hisü meibvü taoli taokhai khaitoue.

⁹Sükisü Eutukha tea kuyu khemaina alisü vabomü hinou chobua bue. Paul nou phashoh chi paokouyu donou puhsü nghi nüloua zhiteih tare. Alia puhnou zhiteih tayu kisü kisho asü chena hinou deiphi hi dekoure ea puhsü thai-a phaoshulou baire.

¹⁰Ana Paul nou deiphihi takouloua ea kikou puhye kholoua paoe, “Neletao le veawuso, daiolouzü puhsü hrihie!”

¹¹Süthaisü puhnou kisho nahi dakhai paloua raokhaosü soukholoua touloure ea puletaoye koa teile phashoa süolouzü teithemo koute chipha-a teithe pakhaie buh süsü thaowu-a tare.

¹²Alia puletao nou khemaina sünaye hria puh kihi save peire ea puletao lesü alaosou saloure.

¹³Alia Eletao nou raia dzüluki hi tare ea dzüluki hinou Assos koute taveloua sühinou Paulye dzüluki hi sathou loure donou tave. Daiolouzü puhsü phinou sühi tave laiyu donou haibüa souloure sü puhnou Eletao hi paopeie.

¹⁴Puhnou Eletaoye Assos hinou daolouyu kisü Eletao nou puhye dzüluki hi sathouloua Mituline hi tave loure.

¹⁵Alia sühinou dzüluki hinou tapoa thainaisho kisü Khios teidei nghojü bvü hi koulouloua sühinou teithe ali bulouyu thaisü Eletao nou Samos hi velou loure ea thainaisho kisü Eletao sü Mileta hi velou loure.

¹⁶Daiolouzü Paul nou Asia hinou bua teile souha pumore donou Ephesa tachopoa taloure donou le laloure; daiolouzü puhsü soulou veilouzü Pentekos teithe kisü Jerusalem hi buloure donou thashoa tawe.

¹⁷Alia Paul nou Mileta hinou Ephesa hi maiye seive-a panou lüloumaime hi tsümaitaoye nou puhye daore donou puh hi ku-save.

¹⁸Puletao nou velou louyu kisü, puhnou puletao hi paoe, “Enou Asia teidei hinou tavelouyu teithe raikhana hinou shua teile veishi sü neletao hrohinou kakua hrüsa touyu sü lah neletao nou süwe.

¹⁹Jihudimai taonou Eye southeare dah-a buyu kao-ashi teile teitei hia Enou le natai-a ea nghidzü kou-a Mapao vei kuvah soue.

²⁰Neletaoye donou veilousüe touyu talisü Enou halia pokukhaimoa neletao hi dua neletao kilikinou paongao peie ea doupeie touyu sü neletao nou süwe.

²¹Enou Jihudimaitao hi-a ea Greekmaitao hi-a süolouzü puletao nou ledaloua Ramai hi dakhai veloure ea Eletao Mapao Jisu ye lüloure donou zhopaoh soua paodoupeie.

²²Alia chuo zhukhaio, Rako Mashi chi züa E Jerusalem hi talaire ea sühinou Ahi dai palaisa touyu Enou sümoe.

²³Enou süyuwo louzü hukha ea veahoyu sünou Eye khoa bue tea nuhdu liki hinou Rako Mashinou Ahi zhopaoh soua paongaoyu süna likhei baie.

²⁴Sütoukhaima Enou lah Ahrühai Eye donou ha muhlia hae tea chobaie; Enou züpayuwo louzü Ahrü hi soure vah ea Enou Mapao Jisu hinou ngaolouyu Ramai zhuvea vei ko aveina vanou zhopaoh soure vah souchere sütao likhei baie.

²⁵“Alia zhukhaio, Enou Ramai vedei ko paodoupoa velouyu neletao hrülai hrohinou mailinoua Azhu sü ngaopu khailou hore touyu sü chuo Enou süloure.

²⁶Südonou Enou neletao hi zhou teithe haina hinou sheesha-a paopa ngaowe, süolouzü neletao hrohinou kamainou ha-kata-a Apei hi paodu khaire alia hae.

²⁷Daiolouzü Enou neletao hi Ramai vei lichoyu teitei paongaoyu hisü halia pokukhaiyu hae.

²⁸Südonou lah neletao-a leikeilo ea Rako Mashinou neletaoye panou pei-akhomai soupeire donou neletao bah hi thoupeikhai touyu zhaokho me teiteiye zhutoulo. Ramai nou lah puh Nahpoutu zhe vanou hrülouyu puhvei lüloumaime pei-akhomai souloukhaio.

²⁹Enou tayu thaisü khushoyu nüsei nou neletao hrohi velouloua zhaokhome hi zhao khemaiye sü leshia phapeiyu bulaimoe touyu Enou süwe.

³⁰Alia lah neletao hrohinou lüloumai taoye süthaiku paloua panou puletao thai füloure donou amada chi paore mai kamaia palai.

³¹Südonou leikeilo ea po asü Enou nghidzü koua khei-hea thaokhaimoa neletao hrülaiye tukha-a doupeie touyu sü li-cholo.

³²“Alia chuo Enou neletaoye Ramai bah hi ea neletaoye soudusho peiwu-a panou puhvei mai hrülai hi peilaiyu kaa süna peilou süyu puhvei zhuvea chipao hi thaothouwe.

³³Enou maitali vei pousha, sana moa sabanüh ngaothaiyu soumoe.

³⁴Abah haihainou lah Avei ea Eye koa laiyu maitao vei moshilaiyutao donou vah souloue touyu sü lah neletao nou süwe.

³⁵Mapao Jisu nou, ‘Ngaolouyu jünou peiyu nanou rako veie,’ tea paoyu puh chipao panou lichoa ha pfüphou haibüa khoua vah soua Eletao nou lelouho maiye soukha vuzülai touyu sü Enou neletao hi ngaopeiwure.”

³⁶Alia puhnou sübüa paocheyu thaisü puletao hrülaiye koa kou khou khüloua veachi paoe.

³⁷Alia puletao hrülai sü sochesou kraloure ea Paulye kholoua puhye sü münou teiloure.

³⁸Puletao nou leveakayu na louzü puh zhusü puletao nou hakia ngaopu khailou hore tea puhnou paoyu donoue. Süthaisü puletao nou puhye dzüluki hi koute paove peie.