Read Poumei Naga SEI-ATAMAI VAHTAO 21 Bible Online

SEI-ATAMAI VAHTAO 21 - Poumei Naga bible

SEI-ATAMAI VAHTAO 21

¹Alia Eletao nou puletao hinou tarayu thaisü dzüluki hi louloua tazütoupa Kush hi velou loure; alia thainaisho sü Rhodes hi tave louloue ea sühinou Eletao nou Patara hi tave-e.

²Sühinou Eletao nou Phoenikia hi tare dzüluki ali ngaoloua sühi palouloua tae.

³Alia Eletao nou Kaipras zhingaoyu buh hi koulouyu kisü süsü bakhanalo vahi khaiwu-a khekoulo tapokou Suria hilo kouloua Tair hinou pa chaoe, daiolouzü dzüluki hinou pfülaiyu nataosü sühinou phawulai.

⁴Alia sühinou rozümai kamaiye daoloua puletaoye koa teithe anai nai-a bue. Rako khouko hinou puletao nou Paulye nou Jerusalem hi takheso tea paoe.

⁵Ana Eletao nou puletaoye koa sühinou bure teile cheyu kisü buh süsü thaowu-a Eletao veih duhi talou khaire; alia puletao hrülainou maipfümai ea nahmaitao ye koa Eletaoye nuhdu hinou paosapoa zaipei hi vepeiwu-a sühinou Eletao hrülaisü kou khou khüloua veachi paoe.

⁶Süthaisü Eletao alinou lihi veia buwo ea veia tawo tea paowu-a Eletao sü dzüluki hi loutare donou tare ea puletao-a kilo khaivere.

⁷Eletao nou Tur hinou tayu dzüpei veihdu nasü tachewu-a Tolemai hi velou loure ea sühinou thaihou jürai khemai taoye sasa-a khurüwu-a puletaoye koa teithe ali nai-a bue.

⁸Thainaisho sü Eletao nou tapoa Kaisaria hi veloue; alia sühinou Eletao nou ko avei paodou-apeio Philip sülouzü vahlümai anai hrohinou ali soua buyu mai süna ki hinou lou nai-a bue.

⁹Puh nahmai rachi paola-a laiyu nghimoyu nah naotumai adai bue.

¹⁰Eletao nou sühinou teithe taoli nai-a buyu hinou, Agabas tea kuyu rachi paolamai ali sü Judea hinou takou loure.

¹¹Alia puhnou Eletao hi tave louloua Paul khyakhosü poloua lah phi-bah sü phuloua paoe, “Rako Mashinou haikua paoe: südonou Jerusalem hi buyu Jihudimai taonou khyakho haina vei paopuye haibüa phuloua puhye sü tahrüh kukhe maitao bah hi thou peilai.”

¹²Eletao nou chipao süna choulouyu kisü, Eletao ea sühi buyu maikhemai taonou Paulye nou Jerusalem hi takheso tea nua khoe.

¹³Ana puhnou chila peie, “Neletao daisounou haibüa kra-a Ale souphewe? Daiolouzü Mapao Jisu ye donou Jerusalem hinou Eye hukhahi panou thouyu likhei baimoa sühinou thaiyu koutea Ewo souda-a bue.”

¹⁴Eletao nou puhye sü paoposhu nulou hokhaie, “Mapao vei li-choyu sü soulou baiwo,” tea puh hi paowu-a baire.

¹⁵Teile haitao thaisü Eletao nou soudaloua Jerusalem hi takhe.

¹⁶Alia Kaisaria hinou rozümai kamainou Eletaoye koa takheloua Ehye sü Ehnou ve chao-a bulaiyu raikinou rozümai ali soua buyu Kaipras himai Nason kihi save thoupeie.

¹⁷Eletao nou Jerusalem hi velou louyu kisü sühi buyu thaihou jüraimai taonou Ehye sasa-a saloue.

¹⁸Thainaisho sü Paul nou Eletaoye koa Jemsye tave daoe; alia lüloumaime hi tsümaitao hrülai-a sühi sü bue.

¹⁹Paul nou puletaoye sasa-a khurü louyu thaisü puhvei vah hinou Ramai nou tahrüh kukhe maitao hrohinou souyu vah teitei vei ko taosü ali linou puletao hi paongao peie.

²⁰Alia puhnou paoyu sü chouloua puletao hrülainou Ramaiye paosho loure. Sükisü puletao nou puh hi paoe, “Eh thaihou jürai soua buyu Paul, Jihudimaitao hrohinou louche louyumai the kazhou bue ea puletao sü daizhozhou razhai hisü le peishoa bue touyu sü nenou ngaowe,

²¹alia nenou, tahrüh kukhemai teidei hinou hrüa buyu Jihudimai taohi puletao nahmaitaoye hee rodeso moa Jihudimai zhai sü füso tea paodoua Moses vei razhai sü thaore donou paodou peishe tea ne kosü puletao hi paongao peire.

²²Sükuyu thaisü dai soulai? Ne buh haihi vewe touyu sü puletao nou choulou vuzülai.

²³Südonou Ehnou neye panou sounüyu haina hai soukhaio. Eh hi chou soukhaitea buyu mai adai bue;

²⁴mai haitaoye saloua nelah puletaoye koa soushee loukhaio ea puletao vei thou-sha paretao sü nenou phapeikhaio, sükulouzü puletao peishusü sailousüe. Sükua soure toulouzü ne vanou puletao hi paongaoyu chi teitei sü cheche moe, ana lah nekoutea razhai nasü reitoua hrüwe touyu sü maikhemai hrülainou süloulai.

²⁵Ana louche louyu tahrüh kukhemai tao donou louzü, Ehnou Ehvei chi kukouyuna vanou puletao hi seiko ali seivere süolouzü puletao hai bashara hi potho khaitouyu touso, zhe touyu, ssü souhawu-a thaiyu sou, alia khu-lou souyu vah hinou thao vuzülai tea paore.”

²⁶Südonou Paul nou mai sütaoye saloua thainaisho sü puletaoye koa zhai thaifüa sousheere. Süthaisü sousheeyu vei teithe taosü dukinou chekhouloua puletao mai alili donou pothore na nasü duki povelaisa touyu paosüre donou puhsü Rathoki hi taloure.

²⁷Alia teithe anaisü cherebü hinou Asia teidei hinou veyu Jihudimai kamainou Paulye Rathoki hinou ngaoloure. Puletao nou maisou hrülaiye süpeiwu-a panou Paulye niloure.

²⁸Alia puletao nou shusouloua paoe, “He Israel maitao soukha peikhaio. Buh likihi taloua Israel maitao pei hi, Moses vei razhai pei hi ea Rathoki haina pei hi motoua maikhemai hrülai hi paodoupeiyu mainasü hainare; süthe baimoa puhnou “Greekmaiye Rathoki hi save thoupeiwu-a sheeyu buh hainasü souzhai peire!”

²⁹(Daidonou puletao nou haibüa paoe toulouzü raiki teile hi Paul nou Ephesa himai Trophimaye koa nuhdu hinou laiyu sü puletao nou ngaoe; alia Paul nou puhye sü Rathoki hi save thoue tea puletao nou choloure.)

³⁰Sükisü nuhdu teiteinou bvü-ro loure ea maikhemai hrülainou koa taveloua Paulye niloure, alia puhye sü Rathoki vakouhi süthai paloua thala-a Rathoki kikhu taosü khure.

³¹Alia maikhe mainou Paulye southeare donou te-a buyu hinou Jerusalem teitei sü bvü-ro loure touyu kosü Rom reihmaime peichana hi seive peire.

³²Thala-a puhnou reihmaitao ea kaihpei hi chamaitaoye saloua maisou hi tuve; alia puhnou reihmaitaoye koa laiyu sü maikhe mainou ngaolouyu kisü Paulye dayu sü thaore.

³³Süki sü reihmai peicha nanou Paul hi takouloua puhye sü niloure ea puhye sü hurai ahai nou phuloure donou kharochi peire. Sühinou puhnou maikhemai hi, “Mai haina hai thaoh-e ea puhnou dai souwure?” tea noue.

³⁴Maisou hrohinou kamainou chi tyali ea kukhemai taonou chi kukheli pao-a shusoua raoloure; alia maikhe mainou bvü-ro louyu vanou puhnou chibei nasü sülou hoyu kisü, puhnou puhmai taohi Paulye sü reihmai fühao hi save thoure donou kharochi peire.

³⁵Alia Paul nou phihea dou taohi kouyu kisü, mai khemainou raroushoa khaotsütsü louyu donou puhye sü reihmai taonou molou shilailoua kaopolou baire;

³⁶Daiolouzü maisou veishinou puh thaifü poa, “Puhye southeawo!” tea shusoua raoloure.

³⁷Alia reihmai taonou Paulye reihmai fühao hi thourebü hinou, puhnou reihmai peichana hi paoe, “E nehi chili paolou veimoe?” Reihmai peichananou noue, “Ne Greekla süwu?

³⁸Sükulouzü newo raichoki reihchi soubvü papeiwu-a maiye southeamai thedaiye süthai sapoa rekou hi hotayu Ejipt tamai süna mowu?”

³⁹Paul nou chila peie, “Ewo Tarsa nuhdu hinou nayu Jihudimai alie, süolouzü Kilikia teidei hinou matsü soua buyu nuhdu nahi mai alie. Leshia Eye panou maikhemai hi chi paokhaio.”

⁴⁰Alia reihmai peichawo nou aetou peiyu kisü Paul nou tashu phiheadou taohinou laloua maikhemai hisü kaona-a buloure donou bah zhae. Alia puletao nou kaona-a bulouyu kisü Paul nou puletao hisü Ebriamai la hinou haibüa chi paoe: