Read Poumei Naga SEI-ATAMAI VAHTAO 22 Bible Online

SEI-ATAMAI VAHTAO 22 - Poumei Naga bible

SEI-ATAMAI VAHTAO 22

¹“Athaihou jürai khemai ea Apuo khemai, Enou chu neletao nghojünou Avei züchi paongao laiyu hisü keinou peikhaio!”

²Alia puhnou Ebriamai la hinou puletao hi chi paoyu hai choulouyu kisü, puletao hai lapaikhaimo zheire. Alia Paul nou haikua paotare:

³“Ewo Kilikia teidei hi Tarsa hinou nayu Jihudimai alie, ana Jerusalem nuhdu haina hinou Gamaliel bah hinou doumaili soua hrüpae. Alia Eletao puo-pao vei zhaina hinou soutaosoua tu-deia doupeiyu sü Enou ngaoloue ea zhou buh haihi buyu neletao hrülai kua E-a Ramaiye donou lenou shoyu mailie.

⁴Alia Mapao vei Ludu haina thaifüyu naotu poutu hrülaiye nilou-a puletaoye hukha hi pothouwu-a puletao athai koute Enou souveapeie.

⁵Enou chechenou paoe touyu sü napao peichana ea tsüme teiteinou-a la peilou süe. Enou puletao hinou Damaska hi buyu thaihou jüraimai taohi peire seiko nasü ngaoloua sühinou buyu maitaoye-a bao rai phuloua Jerusalem hinou pokou souvea peire donou sühi tave.

⁶“Enou sübüa tapoa Damaska ngheikihi kouyu kisü, headei phahinou sükhaimoa raki hinou ava adulinou kou Athai-jü hisü varu loure.

⁷Alia Esü deiphi hi dukoure ea pai alinou Ahi, ‘Saul, Saul! Ne daidonou Eye souveawe?’ tea paoyu choue.

⁸Alia Enou, ‘Mapao ne thaoh-e?’ tea noue. Puhnou Ahi paoe, ‘Ehai nenou souvea-a buyuna Nazareth hi Jisue.’

⁹Chuo Eye koa laiyu maitao nou ava sünawo ngaoe ana Ahi chi paoyu puh paiwo louzü puletao nou choumoe.

¹⁰Alia Enou noue, ‘Mapao, Enou dai soulai?’ Alia Mapao nou Ahi paopeie, ‘Shulouwo ea Damaska hi taloukhaio, alia sühinou Ramai nou neye panou soure donou souda chekhai touyu teitei vanou nehi paongao peilai.’

¹¹Alia peivayu ava süna vanou Anghi ngaolouhoa buyu hinou Eye koa laiyu maitao nou puletao bahnou Eye süthaipoa Damaska hi save.

¹²“Nuhdu sühisü Anania tea kuyu razhai reitoupoa hrüyu ea sühinou buyu Jihudimai hrülainou tsükhou shoyu maili bue.

¹³Puhnou tave Angheikinou laloua Ahi paoe, ‘Achina Saul, ne nghisü ngaolouwo!’ Süphabü hinou Anghisü ngaoloua puh hisü zhue.

¹⁴Sükisü puhnou paoe, ‘Eh puopao Ramai nou neye puhvei li-choyu sü süloure donou, Achecheoye sü ngaoloure donou ea puh mü hinou puh paisü chouloure donou neye doloure.

¹⁵Daiolouzü nenou ngaolouyu ea choulouyu nasü maikhemai hrülai hi paongaore donou nenou puh zhopaohmai soulai.

¹⁶Alia daidonou ne chu chao-a bue? Shulouwo ea dzükhao dalouwo, alia puh zhihsü kua ne mahtaosü khrüshee louwo!’

¹⁷“Enou Jerusalem hi khaiveloua Rathoki hinou veachi pao-a buyu hinou Ahisü zhimükou büloua zho ngaoe,

¹⁸alia zho sühinou Enou Mapaoye ngao-a puhnou haibüa Ahi paoe, ‘Takhaio! Jerusalem hinou thala-a tawo, daiolouzü Avanou peiyu nevei zhopaoh sü puletao nou popei laimoe.’

¹⁹Alia Enou chila peie, ‘Mapao, Enou rathobuh taohi taholoua neye loucheyu maitaoye sü niloua dapeie ea hukha hi thoupeie touyu sü lah puletao nou sütoua bue.

²⁰Alia nevei zhopaohmai Stephan zhe soupayukia E-a puhye southeayu hisü ae-ao tea sühinou la-a bue ea puhye southeayu maitao vei sahnü taosü khoa bue.’

²¹Alia Mapao nou Ahi paoe, ‘Tawo; daiolouzü Enou neye doushoa tahrüh kukhe maitao hi seitalai.’ ”

²²Chipao haina paoyu koutesü maikhe mainou puh chi sü keipeie; süthaisü puletao nou puletao paisü kusholoua paoe, “Haibüyu maihai deiphao hinou potawo! Daiolouzü puh hai hri zümoe!”

²³Alia puletao nou shusou rao-a puletao sahnü daophaloua teihi nai polaipa-a buyu hinou,

²⁴reihmai peicha nanou puhmai taohi Paulye reihmai fühao hi sathou loure donou ea puletao nou puh pei hisü daidonou raochichiwusa touyu sü phoupa loure donou puhye sü da-a soutaosou nouloure donou kharochi peire.

²⁵Ana puletao nou puhye dare donou rainou phulouyu kisü Paul nou ngheiki la-a buyu kaihpeichana hi paoe, “Rom mai aliye mahlia dukhai moa dayu neye donou zhai buwu?”

²⁶Kaihpeicha nanou süsü choulouyu kisü puhnou reihmai peichana hi tave paoe, “Nenou soure hisü zhutoulo: daiolouzü mai haina hai Rommai alie.”

²⁷Südonou reihmai peichana nou Paul hi taveloua puh hi noue, “Ne Rom mai aliwu? Ahi paongaokhaio,” tea noue. Paul nou chila peie, “Ovai.”

²⁸Reihmai peichana nou paoe, “Enou Rommai soulouyu hai pousha alao peia hrüloue.” Paul nou paoe, “Ana Ewo Rommai alisoua nakoue.”

²⁹Südonou puh hinou chi noulai tea buyu maitao sü thala-a puh hinou khai tare; alia reihmai peichana-a Paul hai Rommai alie tea sülouyu kisü puhnou puhye rainou phuyu donou pisholoure.

³⁰Ana thainaisho sü Jihudimai taonou Paul pei hi dai mah dukhaisa touyu sütou lounü-a puhnou Paul baorai sü phuyu phapeire, alia napao adumaitao ea tsüme teiteiye panou vedzü loure kharochi peiwu-a puhnou Paulye sakouloua panou tsüme nghojü hinou laloure.