Read Poumei Naga SEI-ATAMAI VAHTAO 23 Bible Online

SEI-ATAMAI VAHTAO 23 - Poumei Naga bible

SEI-ATAMAI VAHTAO 23

¹Alia Paul nou tsüme hisü zhuteiloua paoe, “Athaihou jürai khemai, Ramai nghojünou Enou zhou koutesü Alekhe tsühai sheesha-a hrüwe.”

²Sühinou napao peichawo Anania nou Paul ngheiki la-a buyu maitao hi puhmü hinou dapeire donou kharochi peire.

³Sükisü Paul nou puh hi paoe, “He kaa dzünou noukhai touyu bouvou! Ramai nou neye dapeilai. Newo haihinou razhai thaifüa Eye chikure donou bulukhu, razhai nasü pfütho-a Eye dare kharochi peiwu?”

⁴Sükisü Paul ngheiki hinou la-a buyu maitao nou puh hi paoe, “Newo Ramai vei Napao Peichawoye konü laiwu?”

⁵Paul nou chila peie, “Athaihou jürai khemai, puh hai Napao peichawo süe touyu Enou süloumoe; daiolouzü haibüa rükhaitoue, ‘Nenou nemai khemai peikhowo chi paoshi laimoe.’ ”

⁶Ana sühi vedzüa buyu kamainou Sadukimai ea kukhe mainou Pharisee maitaoe touyu hai Paul nou sülouyu kisü puhnou tsüme hi shusoua paoe, “Athaihou jürai khemai, E hai Phariseemai alie ea Phariseemai nahpoutue. Enou thaimai hrishulai touyu vei areih buyu vanou Eye buh haihinou chikuwe!”

⁷Puhnou chi haihai paoche chekhaie, Pharisee maitao ea Saduki maitao kole hinou züvapa loure, alia tsüme sü me ahai souloure,

⁸(Daiolouzü emai hai athai hinou hrishu laimoe, alia rakivamai-a ea rakotao-a hae tea Sadukimai taonou paoe; ana sütao asü bue tea Phariseemai taonou louche.)

⁹Sükisü sühisü pai-rao kusho loure alia Phariseemai mehinou razhai dou-apeimai kamainou tashu laloua chihshoa veivaloua paoe, “Ehnou mai haina hinou kao-zümoyu halia ngaoloumoe! Cheche vuzünou, rakonou moa rakivamainou puh hi paongao bukhaia thaohnou sülai!”

¹⁰Alia chi veivayu süsü chihsho louyu donou maikhe mainou Paulye soude-souhühüyu ngaopiloua reihmai peichananou reihmai taoyenou maimehi takouloua Paulye puletao hrohinou shaopove reihmai fühao hi khailoure donou kharochi peire.

¹¹Thainaisho kheisü Mapao nou Paul ngheiki tave laloua paoe, “Khuveilo! Daiolouzü nenou Jerusalem hinou A zhopaoh peilouyu kua, Rom hi-a nenou Azhopaoh peivuzülai.”

¹²Thainaisho shona hisü Jihudimai kamainou khei-kheisou tave dzüloua puletao nou Paulye southealou mosasü tou-a toulaimo sho-a sholaimoe tea lah puletao nou chaachou soukhaitoua bue.

¹³Do haina souzhoyu maitaosü mai raidai lahie.

¹⁴Alia puletao nou napao adumaitao ea tsümai taohi taveloua paoe, “Ehnou Paulye southealoumo koutesü halia toukhai laimoe tea chihshoyu chou souloua lah Ehye phukhaitoua bue.

¹⁵Südonou chuo neletao nou puhvei chihai soutaosou sheepua kulaiyu do hinou Paulye neletao hi sakou peiloure neletao nou tsümeye koa reihmai peichana hi chi seivekhaio. Ana puhnou buh haihi koute loumo jühinou Ehnou puhye southeare donou soudawulai.”

¹⁶Ana chuo Paul tupai nahpoutuwo nou puletao vei do nasü süloure; südonou puhnou reihmai fühao hi tave louloua Paul hi paongao peie.

¹⁷Sükisü Paul nou reihmai kaihpei chamai aliye kuloua puh hi paoe, “Ne khemaina hainaye reihmai peichana hi save peikhaio, daiolouzü nah hainanou puh hi ha chili paongaore bue.”

¹⁸Südonou kaihpeichawonou puhye sü salou-a reihmai peichana hi save peiwu-a paoe, “Hukha hi buyu Paul nou Eye kuloua khemaina hainaye nehi savepeio, daiolouzü puhnou nehi ha chili paore bue tea Ahinou khoe.”

¹⁹Sükisü reihmai peichananou puhye sü baohinou süthailoua buh kukhe lihi saho puh hinou kheikheisoua noue, “Nenou Ahi paongao nüyu chi sü daie?”

²⁰Puhnou paoe, “Jihudimai taonou Paul vanou chi kukheli sheesha-a süpu nüyu do hinou Paulye dosho tsüme nghojü hi sakou thoupeio tea nehinou khore sü puletao nou phakou chere.

²¹Ana puletao chi sü popeiwuso; daiolouzü puletao hrohinou mai raidai layu me alinou puhye southeamo koutesü tou-a toulaimo, sho-a sholaimo tea chachouli soukhaitoua puhye dahpo-a ea khoa bure, alia chuo puletao nou souda chewu-a nenou chi lüpeiyu süna likhei khobaire.”

²²Südonou reihmai peichananou khemaina süna hi, “Nenou chi haina hai Ahi paongaore tea mailihia paongao khaiso,” tea tukha peiwu-a panou tare.

²³Süthaisü puhnou kaihpeichamai ahaiye kuloua paoe, “Zhou khei teilecho akü hinou Kaisaria hi tare donou reihmai kaih-hai, rhei reihmai rainai ea heung reihmai kaih-hai soudalo.

²⁴Alia Paulye panou pfüloure rheitao soudapeiwu-a puhye sü kaozhou veia Teideikhowo Felix hi save peikhaio.”

²⁵Sükisü reihmai peichananou haibüa seiko ali rüpeie.

²⁶“Klaudia Lusia nou Adu-asho soua buyu Teideikhowo Felix ye sasa-a khurüwe.

²⁷Mai hainaye Jihudimai taonou niloua southeare hinou Enou puh hai Rommai alie touyu süloua Avei reihmai taoye koa Enou taveloua puhye khailu paloue.

²⁸Puletao nou puh pei hi dai mah dukhaisa touyu sülounüa Enou puhye sü puletao vei tsüme hi sakoue.

²⁹Puh pei hi mah dukhaiyu hai lah puletao razhai vei qo vanou baie, ana thaizüyu moa hukha hi thouzüyu mahlia puh pei hi dukhaimoe touyu sü Enou ngaoloure.

³⁰Alia maikhe mainou mai hainaye southeare do phoua bue touyu sü Ahi süngao peiyu kisü Enou puhye sü nehi thala-a seivewu-a puh pei hi mah dukhaiyu maitaoye-a puletao nou puhye motouyu sü daie touyu hai ne nghojünou ve paongaowo tea Enou paopeire.”

³¹Südonou reihmai taonou puletao hi kharochi peiyu thaifüa Paulye saloua khei hinou puhye sü Antipatris hi save peire.

³²Alia thainaisho sü rhei reihmaitaoye panou Paulye koa tare donou thaodaiwu-a puletao sü reihmai fühao hi khaivere.

³³Rhei reihmaitao nou Kaisaria hi velou louyu kisü seiko nasü Teideikhowo bah hi thoupeiwu-a Paulye puh nghojü hi save khaipeire.

³⁴Puhnou seiko nasü phouloua Paulye teidei kalovanou ve tea noue. Paul hai Kilikia hinou ve touyu puhnou sülouyu kisü,

³⁵puhnou Paul hi, “Ne pei hi mah dukhaiyu maitao velou louzü Enou nechi keilai,” tea paoe. Alia puhnou Paulye sü Herod vei fühao hinou soutao sou khoa khailoure donou kharochi peire.