Read Poumei Naga SEI-ATAMAI VAHTAO 3 Bible Online

SEI-ATAMAI VAHTAO 3 - Poumei Naga bible

SEI-ATAMAI VAHTAO 3

¹Teithe ali hisü Pitar ea Johan sü koukhe teilecho asü tayu pha süolouzü veachi paoyu pha hinou Rathoki hi tave.

²Alia sühi Ngah Veishoyu tea kuyu kikhu romüna hisü pfüpou hinou phishoa nakoukhai touyu mai ali bue. Maikhe mainou puhye sü panou Rathoki hi taveyu maitao hinou tosü loure donou teisanou kikhu romü sünahi pove khaipei baiwe.

³Puhnou Pitar ea Johan nou Rathoki hi talouyu ngaoloua puhai hinou tosüe.

⁴Sühinou Pitar nou Johan ye koa puhye sü pheteiloua paoe, “Ahai hi zhukhaio!”

⁵Südonou puhai hinou hatali ngao malae tea puhnou puhaiye zhutei loure.

⁶Ana Pitar nou puh hi paoe, “Ahi pousha ea sana alia hae, anou Ahi buyu sü Enou nehi peiwe: Nazareth hi Jisu Khrista zhih hinou lashuloua takhaio!”

⁷Sühinou puhnou mai hona bah zhoulosü kou pailoua sülashu peire; alia sübü hinou puhphi ea puh phinghisü tsüloure.

⁸Alia puhnou kushu lahaloua taloure. Süthaisü puhnou takou takheloua ea cho-a choloua Ramaiye shopoa puhaiye koa Rathoki hi taloure.

⁹Alia maikhemai hrülainou puhye sü takou takhe-a Ramaiye shoa buyu sü ngaoloua,

¹⁰alia puh hai Ngah Vei touyu Rathoki kikhu romü süna hinou tosüa buyu mai sünasüe touyu sülouyu kisü, puletao hrülaisü puh hi dai paresa touyu vanou khupa loure ea tsübo phouhare.

¹¹Alia haibüa mai sünanou Solomon vei Kipamü tea kuyu hinou Pitar ea Johan ye koa dasapoa laiyu hinou, maikhemai hrülaisü khupasoua puletao hi tuvere.

¹²Alia Pitar nou maikhe maiye ngaolouyu kisü puletao hi paoe, “He Israel maitao, neletao daidonou mai haina vanou khupawe? Alia Ehnou Eh khouko hinou mo-a Ehnou Ramai hilo leishoyu vanou puhye panou talouyu kua daidonou nelenou Eh hi pheteiwe?

¹³Abraham, Isak ea Jakob Ramai, süolouzü Eletao puo-pao maitao Ramai nou puh kilai Jisu ye sü soudusho peiwure. Sütoukhaia neletao nou puhye sü southeare donou thoupeiwu-a Pilat nou puhye sü phapeire donou chi lükouyu ki koute-a neletao nou puhye sü Pilat nghojünou bare.

¹⁴Alia neletao nou Masheeo ea Achecheo naye sü baloua maiye southeamai aliye sü neletaoye donou phapeire kholoure.

¹⁵Neletao nou Ahripao naye sü southeare, ana Ramai nou puhye sü athai hinou souhrishu loure. Eletao sü sünavei zhopaoh maitaoe.

¹⁶Alia Jisu zhih hinou lülouyu vanou, neletao nou ngao-a ea sü-a buyu mai hainaye sü puhzhih hinou soutsü peire; alia haisü Jisu zhih hinou veyu lü süna vanou mai hainaye sü neletao hrülai nghojünou souvei chekhou peire.

¹⁷“Alia Athaihou jürai maitao, neletao vei teidei khomai taonou souyu kua neletao-a sümoa soure touyu sü chuo Enou süloure.

¹⁸Ana Ramai nou dao rainou puhvei Khrista sü vea vuzülai tea rachi paolamaitao hrülai mü hinou paopakhai touyu sü panou haibüa vete loure.

¹⁹Südonou ledalo, alia Ramai hi dakhai velo, sükulouzü puhnou neletao mahsü soushee peilai. Neletao nou haibüa soulouzü,

²⁰Mapaowo hinou rako hilo khouko ngaoloure teile sü velai, alia sükua puhnou neletaoye donou dopa peikhai touyu Khrista puhye sü neletao hi seipeilai.

²¹Dao rainou Ramai nou puhvei sheeyu rachi paola maitaoye panou paopayu kua na teitei sü sou ashu khailoumo teile koute sü puhsü raki hinou bu vuzü bailai.

²²Daiolouzü Moses nou paoe, ‘Mapao, neletao Ramai nou Eye seive peiyu kua, neletao thaihou jürai hrohinou puhnou neletaoye donou rachi paolamai ali seive peilai. Puhnou neletao hi paoyu tasü neletao nou zülai.

²³Alia rachi paolamai süna chi zümoyu mai taliye sü Ramai nou dolouyu maitao hrohinou souku pawu-a souhalai.’

²⁴Alia Ramai ko paopa-a buyu rachi paolamai hrülai süolouzü Samuel hinou shu-a puh thainou veyu rachi paolamaitao hrülainou zhodo teile hi pa-a buyutao teitei vanou paopare.

²⁵Ramai nou puhvei rachi paolamaitao vanou apaopei khaitouyu taosü neletao donoubaie, alia Ramai nou neletao puopaomai taoye koa vo soukhai touyu hisü neletao-a zha ngaozhowe, süolouzü puhnou Abraham hi paoe, ‘Ne tao-nah vanou Enou deiphao mai hrülaiye hapeilai.’

²⁶Südonou Ramai nou puh kilaiye doloua neletao vei ashi vah hinou neletaoye panou le daloua neletaoye hapeire donou puhye sü raia neletao hi seive peire.”