Read Poumei Naga ROMMAI 1 Bible Online

ROMMAI 1 - Poumei Naga bible

ROMMAI 1

¹Jisu Khrista kilai ea Ramai puhnou puh Ko Aveina paodou loure donou dolouyu ea kulouyu sei-atamai Paul hinoue.

²Sheeyu larübvü hinou rüthouwuyu kua Ramai nou puhvei rachi paolamaitao vanou dao raikinou Ko Avei nahai apaopeire.

³Ko Avei haina sü puh Nahpoutu Eletao Mapao Jisu Khrista vanoue: vasou hilonou zhulai toulouzü, puh hai David tyaonah alisoua nakoue;

⁴puh vei sheeyu ramai hrü hilonou zhulai toulouzü; puhye sü athai hinou panou hrishu louyu vanou puh hai Ramai Nahpoutue touyu sü dushoyu khouko noupu pongao peire.

⁵Puh vanou Ramai nou Ahi Khristaye donou sei-atamai ali souloua tahrüh hrülaiye panou louche loua paoyu züyu hi süthai loupeire donou teile zhou avei peikhaitoue.

⁶Haisü Jisu Khrista hi buloure Ramai nou kulouyu Rom hi buyu neletao-a louwe.

⁷Südonou Enou Ramai nou leshiyu ea lah puhmai souloure donou kulouyu Rom hi buyu neletao hrülai hi rüwe: Eletao Puo Ramai ea Mapao Jisu Khrista nou neletao hi zhuvea ea kaonayu sü peitheo.

⁸Raikaia, neletao hrülai donou Jisu Khrista vanou Enou A Ramaiye kalo paowe, daiolouzü deiphao teiteinou neletao vei lü vanou choua bure.

⁹Enou puh Nahpoutu vei Ko Avei paodoua, Ale pfüphounou kuvah souyu Ramai puhnou kakua Enou neletaoye donou lichoa tobai soukhaimoa veachi pao-a busa touyu sü zhopaoh souwe:

¹⁰alia chuo akhai hinou Ramai leli vanou Eye panou neletao hi velou loure donou ludu houpei loure veachi paowe.

¹¹Daiolouzü neletaoye koa rako hilovei ha zha ngaozholoua neletaoye soukhou peiloure donou Enou neletaoye tave zhunüshoa bue.

¹²Enou pao-a buyu kowo louzü alinou liye süolouzü neletao vei lünou Eye ea Avei lünou neletaoye soukha loure donoue.

¹³Athaihou jürai khemai, neletao nou süpeikhaio, süolouzü vuh taoli Enou neletao hi vere donou soudawe, ana süsü vetelou more donou halinou Eye khua buloure. Enou tahrüh kukhe hrohia souyu kua neletao hrohia hayu rakoye Enou nilou nüwe.

¹⁴Daiolouzü Esü maikhemai hrülai hi süolouzü dushu louyu ea dushulou moyu, ha süyu ea sümoyu maitao hrülai hi soumo shilaiyu vah bue.

¹⁵Südonou Rom hinou hrüa buyu neletao hi-a Ko Avei paodou peire sü Enou züpashoa bue.

¹⁶Daiolouzü chipao Avei vanou Esü ahrao moe; haisü lü loucheyu mai hrülai süolouzü raikai-a Jihudimai ea süthai tahrüh kukhe maiye-a khailu peire Ramai vei khouko nasüe.

¹⁷Daiolouzü chipao aveinou kakua Ramai nou maikhe maiye puhye koa souzü peie touyu sü pongaowe; souzü peiyu hai shurainou akhai koute sü lü vanoue. Haisü sheeyu larübvü nou paoyu kue, “Lü vanou Ramaiye koa souzü louyu puh sü hrilai.”

¹⁸Daiolouzü Ramai vei rarou hai ramaiye sümoyu ea acheche naye süloure hinou nukhaiyu mai ashi maitao vei vah ashitao pei hi sü rakinou pongaowe.

¹⁹Ramai nou puletaoye tudeewe, daiolouzü puletaoye donou Ramaiye süloure sü lapa baiwe, daiolouzü Ramai puh lahnou süsü puletao hi pongao peire.

²⁰Ramai nou deiphao soushu rainou shua nghithounou ngaolou hoyu puhvei zhaido nasü süolouzü akhai hayu puh khouko ea puhvei razhu nasü soukhai touyu natao vanou sheesha-a sülouwe. Südonou puletaoye sü hatakia khaipei loure alia hae.

²¹Puletao nou Ramaiye sükhai-a puhye sü Ramai hie tea puletao nou tsükhou peimoe moa puh hi kalo paomoe. Süjüwo, puletao tsü sü voteih tare, alia puletao vei sakhaiyu le sü azhinou phouloure.

²²Puletao sü tsü veie tea paoe, ana puletao sü avomai khaire,

²³alia athai hayu Ramaiye thoyu tsü, puletao nou thailou veiyu emai moa raohou moa khaosou moa pounou sürou tayu khaonatao zhu raiyu bashara sütaoye thotare.

²⁴Südonou Ramai nou puletaoye sü lah puletao lenou züpayu shimoyu vahtao panou souloure thoupeire, alia puletao lahnou lah hi ahraoyu vahsü soua bue.

²⁵Puletao nou Ramai vei acheche naye sü amadaye polyawe, alia teisanou shozüyu sou-apeio puhye shoyu tsü puletao nou Ramai nou soukhai touyu sünaye thowe ea sünavei kuvah souwe! Amen.

²⁶Qo haina vanou, Ramai nou puletaoye sü ahraoyu pfüphao vei züpa hi thoupeire. Puletao vei naotumaitao koutenoua zhai thaifüa koa buyu sünasü zhai moyu vah sünanou lyaloure.

²⁷Sübüa poutu maitao nou-a zhai thaifüa naotumaiye koa buyu zhai nasü thaowu-a lah puletao alinou liye züpasho loure. Poutumai taonou alinou lihi ahraoyu vah souwe, alia sükuyu donou puletao vei mah vanou puletao nou ngaozüyu tudee nasü puletao nou lah puletao pei hi sü povewe.

²⁸Alia puletao nou Ramai vanou chekhaoyu tsü nasü puletao vei tsü hi khaibayu donou, puhnou puletaoye sü ashi tsü hi ea kao-zümoyu zhaido hi thoupeire.

²⁹Puletao hisü ashitya tyalinou phoupei loure, süolouzü: ashi, loküyu ea linou lihi ashi souyu bue; puletao sü maiye ngaoraiyu, maiye southeayu, tai-da vayu, maiye layu ea kukhemai pei hi ashi shilai chokhai peiyu sü bue. Puletao nou mai chi kuwe,

³⁰alia alinou li chi paoshiwe; puletao sü Ramai ngaoba maitaoe, puletao sü alinou liye sou ahrao peiwe, khaophu souwe ea adusho khawe; puletao nou ashi soupure tsü chowe ea pfüpuo chi zübawe;

³¹puletao hisü lekhe tsü hae; puletao sü puletao nou apao khaitouyu sü zümoa, alia maiye zhuveayu moa khuleshi peiyu hae.

³²Razhai hinou haikua hrüyumai sü thaizüe tea paokhai touyu sü puletao nou süwe. Sütoukhaia, puletao nou haitao likhei souyu baimoa sütao soua buyu maitaoye sü ae-ao toupeiwe.