Read Poumei Naga ROMMAI 13 Bible Online

ROMMAI 13 - Poumei Naga bible

ROMMAI 13

¹Mai hrülainou teidei khomai khakhenou buloukhaio, daiolouzü Ramai hinou moa teidei khomai ali-a hae, alia bubuyu teidei khomaitao hai Ramai nou buh thoupei khaitoue.

²Südonou teidei khomaiye motouyu maitali sü Ramai nou dolouyu sünaye motoue, alia haibüa souyu maitali sü lah pei hi chikuyu povebaie.

³Daiolouzü teidei khomaiye sü avei souyu puletao nou piwu laimoe, ana ashi souyu puletao nou pilai. Teidei khomai puhye sü nenou pilai mowu? Sükulouzü avei nasü soukhaio, alia puhnou neye paosholai,

⁴daiolouzü puh hai lah nevei avei donou vah souyu Ramai vei kilaibaie. Ana nenou ashi soulouzü, süthaisü puhye sü piloukhaio, daiolouzü puhnou raoha-a khoche sü pomoe. Puhsü ashi souyumai pei hi Ramai vei rarou pove peilaiyu puhvei kilaie.

⁵Südonou Ramai vei rarou ngaolou more likhei baimoa, ana avei ashi süyu lekhe tsüna donoua neletao nou teidei khomai khakhe hi hrülai.

⁶Qo haina vanou neletao nou kikha peiwe, daiolouzü teidei khomaitao nou puletao vah souvete louyu kisü, puletao sü Ramaiye donou vah souwe.

⁷Südonou puletao hi peire teitei sü peikhaio; kikha peiremai hisü kikha peikhaio, nakha peiremai hisü nakha peikhaio, tsükhouremai hisü tsükhou peikhaio, khuhaoremai hisü khuhao peikhaio.

⁸Neletao alinou liye leshiyu likheithe baimoa maitali vei pao halia pfüso; daiolouzü puh kinapaye leshiyu puhnou razhai nasü rei chekhouwure.

⁹Chikhatao süolouzü, “Nenou khu-lou vah soulaimoe, nenou maiye southea laimoe, nenou vaolaimoe, nenou madayu zhopaoh soulaimoe, nenou mai na züpa laimoe,” haitao pfüphou, alia kukhe buyu chikha tali sü chikha haina likhei hinou podzü khaitoue: “Nenou lah neye leshiyu büa ne kinapaye leshilo.”

¹⁰Leshi nanou puh kinapa hisü soumah tamoe; südonou leshiyu hai razhai pfüphou reichekhouyu nasüe.

¹¹Süpeinou haihai dai teilechosa touyu süolouzü chu teile hai neletaoye donou zhia buyu hinou kaishuyu pha vuzüre touyu sü neletao nou süwe. Daiolouzü Eletao nou lülourai jünou chunou khailu peiyu hai Eletao hi nghipure.

¹²Kheipha hai cheyu laire, heapha sü ngheiteire. Südonou Eletao nou teizhi vei vah taosü thaowu laikhe ea teiva vei reih natao sü noulou laikhe.

¹³Heako teiva hinou hrüyu maitao büa lah Eletao hai zhai veishoa talou laikhe; me souloua soubvüyu, zhaoh shozhiyu, khu-lou souyu ea ke-zhe züpa souyu, züvayu, moa ngaoraiyu, haitao sü soulaimokhe.

¹⁴Ana Mapao Jisu Khristaye bahnoulo, alia vasou züpa vei rukha soure donou soudawuso.