Read Poumei Naga ROMMAI 14 Bible Online

ROMMAI 14 - Poumei Naga bible

ROMMAI 14

¹Lü hinou lülouhoa buyu puhye sü neletao nou sasa-a popeio, ana lah puhvei li-choyu vanou neletao nou veivawuso.

²Daiolouzü mailinou hatali toua veie tea louchewe, ana lü hinou lelou hoyu puhnou vu-pou likheithe toubaiwe.

³Hatali touyu puhnou toumoyu puhye sü ngaorawuso; alia vu-pou likhei toubaiyu puhnou-a hatali touyu puh pei hi sü chikuwuso, daiolouzü Ramai nou puhye sü popeire.

⁴Mai kukhe alivei kilaiye chikuyu ne sü thaoh-e? Puh hai laloue moa kaotare touyu chi kupeire sü lah puhvei paopunou bailai. Alia puhnou laloulai, daiolouzü Ramai nou puhye sü soula peilousüe.

⁵Mailinou teithe alinou kukhe teitheli jünou veikou hie tea chowe, mai kukhe alinou teithe pfüphou hai zho khaibaie tea chowe. Maili linou lah lahvei le hinou sheetoua lalouyu souloukhaio.

⁶Teitheli ku-a reiyu puhnou süsü Mapaoye tsükhoua reiwe; hatali toua buyu puhnou süsü Mapaoye tsükhoua toubaie, daiolouzü touso süna donou puhnou Ramai hi kalo paowe. Touso kamai toumoyu puhnou süsü Mapaoye tsükhoua toumobaie, alia puhnou süvanou Ramai hi kalo paowe.

⁷Eletao maitalinoua lah puhye donou likhei hrübai moe, alia Eletao maitalia lah puhye donou likhei thaibai moe.

⁸Eletao nou hrilouzü, haisü Mapaoye donou hribaie ea Eletao nou thailouzü, haisü Mapaoye donou thaibaie. Südonou Eletao sü thai-a hri-a Mapao veibaie.

⁹Südonou Khrista nou thaimai ea hrimai ahai pei hi Mapao souloure donou puhnou thai-a thaipeire ea hria hrida shuloure.

¹⁰Südonou vu-pou likhei toubaiyu ne daidonou ne thaihou jürai pei hi chikuwe? Alia hatali touyupu ne daidonou ne thaihou jüraiye ngaorawe? Daiolouzü Eletao hrülai hai Ramaiye panou chikure donou puhvei chikuyubuh nghojünou lalai.

¹¹Daiolouzü sheeyu larübvü nou paoe, “Mapaowo nou paoe, Enou hriyu donou, mai hrülainou Anghojünou kou khou khülai, alia mali pfüphounou Ramaiye paosholai.”

¹²Südonou Eletao hrülainou lah lah vei pa-louchi hai Ramai hi peilai.

¹³Südonou Eletao nou alinou liye chi kupu khailai mokhe, ana nenou hakia ne thaihou jüraiye panou phi süloure moa mah hi kaodu louloure hatalia soukhai laimoe touyu hisü le latoulo.

¹⁴Enou Mapao Jisu ye koa ali soulouyu hinou sütoua bue süolouzü touso talia süna vuzü hisü sheemoyu lia hae; ana maita linou touso kamai hai sheemoe tea louche louzü, süthaisü süsü puhye donou sheemo tare.

¹⁵Nenou touyu süna vanou, ne thaihou jüraiye le souveawu louzü, süthaisü leshi hinou nehai vah soukhai more. Nenou toua buyu touso sünanou Khrista nou puhye donou thaipeiyu mai sünaye souhawuso!

¹⁶Südonou neletao nou veie tea poyu nasü panou paoshiwuso.

¹⁷Daiolouzü Ramai Vedei hai ha tou-sho loure nali moe, ana acheche, kaonayu ea Rako Mashi hinou sayu süna süe.

¹⁸Alia haibüa maita linou Khrista kuvah souyu kisü, puhnou Ramai züpa souwe ea mai kukhenou ae-ao tea popeiwe.

¹⁹Südonou Eletao nou kaonayu pove loure ea alinou liye soutsü peiloure hi soukha peiyu na sütaoye zhia bulaikhe.

²⁰Touso donou Ramai vahsü souhawuso. Touso pfüphou hai sheekhaibaie, ana mai tali donou puhnou touyu sünavanou kukhe maiye panou phi sülouyu hai mah-e.

²¹Sou toumoyu, zhaoh shomoyu moa ne thaihou jüraimaiye panou phi süloure hatali soumoyu nanou veie.

²²Südonou ko haina vanou nenou louche-a buyu nasü Ramai nehai kole hi khaiwuwo. Puhnou kao-züe tea soukhai touyu hisü lahnou chi kumoyu puhsü rako veie!

²³Ana puhnou toua buyu süna vanou leki louzü, puhnou süna touyu kisü Ramai nou puhye mah dukhaire, daiolouzü puhnou lü vanou vah soulou moe. Alia lü vanou vemoyu hatali sü mahbaie.