Read Poumei Naga ROMMAI 16 Bible Online

ROMMAI 16 - Poumei Naga bible

ROMMAI 16

¹Kenkhria hi buyu lüloumaime vei vahlümaipai soua buyu Eletao tupai Phoebe ye Enou neletao bah hi thoupeiwe.

²Mapaowo zhih hinou sheeyu maitao nou ngaozüyu sühinou puhye sü popeio, alia neletao hinou puhye donou molou shilaiyu hatali bulouzü puhye sü soukhapeio; daiolouzü puh hai maitaoli donou ea Eye donoua samai aveili soua bue.

³Khrista Jisu vei kuvah hinou Enou koa vah souzhoyu Priscilla ea Aquila hi Enou khurüyu chidoh seiwe.

⁴Ahrirai donou puhai vei ngu daodere kaozhoushi koute pfüdopeie. Puhai hisü E likheithe baimoa tahrüh kukhemai vei lüloumaime pfüphounou kalo paowe.

⁵Puhai ki hinou tave meime-a buyu lüloumai meye-a khurüyu chidoh sü seiwe. Asia deizha hinou raikaia Khristaye louche louyu Enou leshiyu asa Epinetas ye khurüwe.

⁶Neletaoye donou teshoa vah souyu Meri ye khurüwe.

⁷Atarai soua buyu ea Eye koa hukhahi louzhoyu Andronikas ea Junias ye-a khurüwe; puhai sü sei-atamaitao hrohinou zhih tashowe, alia Enou Khristamai soutamo jühinou puhai sü souloure.

⁸Mapaowo hinou Enou leshiyu asa Amphiatas ye khurüwe.

⁹Khrista vei kuvah hinou koa vah souzhoyu Urbanas ea Enou leshiyu asa Stakhi ye-a khurüwe.

¹⁰Khrista hinou, veahoyu hronou chechea ngaolouyu Apelles ye khurüwe. Aristobulas kikhamai taoye khurüwe.

¹¹Atarai Herodion ye khurüwe, alia Narkisa kikhahi buyu Khristamai thaihou jüraitaoye khurüwe.

¹²Mapao vei kuvah soua buyu Truphina ea Truphosa hi Avei khurüyu chidoh sü seiwe, alia Mapaowo donou vah alao soulouyu leshiyu asa Parsis ye khurüwe.

¹³Mapao vei kuvah hinou Mapaowo nou lah puhvei souvu züre donou dopa louyu Rufus, alia Eye puh nahpoutu büa phabusanou popeiyu puh pfü hi Enou khurüyu chidoh seivewe.

¹⁴Asunkritas, Phelegon, Herme, Patrobas, Harmas, alia puletaoye koa buyu kukhe thaihou jüraimai hrülaiye khurüwe.

¹⁵Philologas ea Julia, Nereus ea puh tupai, Olimpas ea puletaoye koa buyu sheeyumai hrülaiye khurüwe.

¹⁶Thaihou jüraiye leshia mümuyu zhai süna hinou alinou liye khurükhaio. Khrista vei lüloumaime teiteinou puletao vei khurüyu chidoh sü neletao hi seivewe.

¹⁷Athaihou jürai khemai, Enou neletao hinou khowe: neletao nou ngaolouyu doupeizhai sünaye motouyu, maikhe maiye southou me kuku peiyu ea maikhemai lü soudadou peiyu puletaoye sü leikei-a zhulo. Puletao hinou doua bulo!

¹⁸Daiolouzü haibüa souyu puletao sü Eletao Mapao Khristaye kuvah soumoe, ana lah puletao vei pou donou soubaie. Puletao vei lakovei ea müpouyu sünanou puletao nou khosümoyu maikhe maiye labaiwe.

¹⁹Neletao nou Ko Aveina hinou cheche-a buyu sü mai hrülainou choukhaire, alia qo haina vanou Esü neletao vanou lesawe. Enou neletaoye panou aveina vanou tsü veia buyu züpawe, ana ashina vanou khosümoa buyu sü panou sounüwe.

²⁰Süthaisü kaonayu vei Ramai nou Saitan ye thala-a neletao phi khenou taisasa-a khailai. Eletao Mapao Jisu zhuvea nou neletaoye koa buyu sü souloutheo.

²¹Eye koa vah souzhoyu Timothi ea Atarai soua buyu Lukia, Jason ea Sosipatar nou puletao vei khurüyu chidoh sü neletao hi seivewe.

²²Seiko haina rüyu Tartius Enou Mapaowo hilonou neletaoye khurüwe.

²³Lüloumaimeye panou puh ki hinou vedzüa buyu Avei shepao Gaias nou neletao hi puhvei khurüyu chidoh seiwe; nuhdu vei thou-sha podzü-apeio Erastas ea Eletao thaihou jürai Quartas puhai vei khurüyu chidoh sü neletao hi seivewe.

²⁴(Eletao Mapao Jisu Khrista vei zhuvea nou neletao hrülaiye koa buyu sü souloutheo.)

²⁵Eletao Ramaiye paosho laikhe! Enou Jisu Khrista vanou paodouyu Ko Aveina ea dao deiphao soushu rainou khei-a khaikhai touyu kheitsüna pongao peiyu thaifüa, puhnou neletaoye panou neletao vei lü hinou khouchi-a lalou süe.

²⁶Sütoukhaia chuo, rachi paolamaitao vei larübvütao vanou achechena süsü dua vakouhi popa ngaopeire; alia mai hrülaiye panou loucheloua züloure donou akhai hayu Ramai vei chikhanou süsü tahrüh hrülai hi paosü peire.

²⁷Likheithe tsü veibaiyu Ramai puh hisü, Jisu Khrista vanou teisanou paosholoutheo! Amen.