Read Poumei Naga ROMMAI 3 Bible Online

ROMMAI 3 - Poumei Naga bible

ROMMAI 3

¹Sükuyu thaisü Jihudimainou tahrüh kukhemai jünou dai koyu bue? Moa hee rodeyu vei muh dai bue?

²Hatali hinou koshoyu bue! Rairailai hinou, Ramai nou puh chipao hai paodou peire donou Jihudimai bah hi thoupeie.

³Ana puletao hronou kamainou louche molouzü kakulai! Puletao vei louche moyu sünanou Ramai vei louchelou veiyu sünasü souha bailaiwu?

⁴Süsü movuzüe! Emai hrülaiwo mada khaia, Ramaiwo cheche vuzü bailai. Haihai sheeyu larübvü nou paoyu kue, “Nenou chi paoyu kisü nenou züe tea pongao vuzülai; Neye chikuyu kisü nenou kolou vuzülai.”

⁵Ana Eletao nou kaomoa souyu sünanou Ramai nou kao-a souyu sünasü sheesha-a popa ngaopei louzü, kakulai? Ramai nou Eletaoye tudee peiyu kisü, puh hai soumare tea Eletao nou paolou süwu? (Emai zhai thaifü louzü chi haina hai nouzüe.)

⁶Süsü movuzüe! Ramai hai cheche molouzü, kabüa puhnou deiphao maiye chikulai?

⁷Ana Avei cheche moyu nanou Ramai vei cheche naye sü sheesha-a popa ngaopei-a Ramai kathe soupei louzü dailai? Sükulouzü Eye sü daidonou chu koute mahmai alie tea mah dukalai?

⁸Sükuyu thaisü daidonou haibüa, “Aveina veloure donou Eletao ashi soulaikhe” tea paomoe? Chechenou mai kamainou chi haina hai Enou paowe tea paodua Eye sou ahrao peiwe! Sükuyu mai pei hi sü Ramai nou mah dukhaizüa dukhai peilai.

⁹Sükulouzü veire, Eh Jihudimainou Tahrüh kukhemai jünou halia veikou koumoe? Moe, halia veikou khaimoe! Jihudimai ea Tahrüh kukhemai hrülai hai kheihao-a mah khouko khehi bure touyu sü Enou pongao chere.

¹⁰Haisü sheeyu larübvü nou paoyu kue: “Chechemai ali-a hae, alikhei-a hae,

¹¹tsü veiyu mailia hae, moa Ramaiye phouyu mailia hae.

¹²Mai hrülainou Ramai hinou tala tare; puletao hrülai sü koyu ali-a hare; avei souyu mai ali-a hare, maili koutea hare.

¹³Puletao rao hai houkhai touyu khüh-e; puletao mali nou tobai soumoa madawe, puletao tai khehisü shishoyu nghou tu bue;

¹⁴puletao mü hai khayu chaanou phoua bue.

¹⁵Puletao phi hai zhe soupare hisü thashoe;

¹⁶puletao ludu hisü ha-kayu ea veahoyu bue,

¹⁷kaonayu ludu sü puletao nou süloumoe,

¹⁸puletao nghojü hi Ramaiye piyu hae.”

¹⁹Chuo Eletao nou süloure, süolouzü emai hrülaiye panou paikhaimoa ea deiphao teiteiye Ramai vei chikuyu khehi pove khailoure donou, razhainou paokhai touyu pfüphou sü razhai khehinou hrüa buyutao donou paokhai toubaie.

²⁰Daiolouzü razhainou sou-pfüwo touyutao souyu donou maitaliye Ramai nghojünou souzü peimoe; daiolouzü razhai vanou mah vei tsü nasü vebaie.

²¹Ana chuo Ramai nou puhye koa emaiye souzü peire ludu nasü ngaopeiwure. Süsü Moses vei razhai ea rachi paolamai taonou zhopaoh soukhaia sünasü razhaiye koa vah soure halia hae.

²²Ramai nou maikhe maiye puletao nou Jisu Khrista hi lü buyu süna vanou souzü peire. Ramai nou haisü Khristaye loucheyu mai hrülai hi soupeire, daiolouzü sühisü taku kuyu halia hare.

²³Daiolouzü emai hrülainou mahre, alia Ramai vei khouko ava hinou khaitare.

²⁴Ana Ramai zhuvea vei sapeina sünanou maikhe maiye mado soupeiyu Khrista Jisu vanou puhye koa puletao hrülaiye souzü peire.

²⁵Puhvei athai vanou puhye panou maikhe mainou puhye lüyu vanou puletao mah khailu peire bo nasü souloure donou Ramai nou puhye sü thoupeire. Ramai nou puh hai chechebaie touyu ngaopeire donou haisü soubaie. Raikiwo puh hai shamea-a ea maikhemai mahsü ngaomo kheikheisoua bubaie;

²⁶ana chu teile hiwo puhvei acheche nasü pongaore donou puhnou maikhemai mah vanou chi kuwe. Haibüyu zhai hinou Ramai nou puh hai chechewe ea Jisu ye lüloumai taliye hai puhnou souzü peiwe touyu sü ngaopeiwe.

²⁷Sükulouzü Eletao nou khaophu souloure dai bue? Halia hae! Alia hainavei qosü daie? Haisü Eletao nou razhai nanou paoyu züyu vanouwo? Moe, ana Eletao nou louche louyu vanoue.

²⁸Daiolouzü Eletao nou süloure süolouzü maitali hai razhai reiyu vanou moa nou lü vanou likhei Ramaiye koa souzü peibaie.

²⁹Molouzü Ramai hai Jihudimai Ramai baiwu? Puh hai tahrüh kukhemai vei Ramai-a mowu? Ovai, puh hai tahrüh kukhemai Ramaia-e.

³⁰Ramai sü alikhei baiyu donou puhnou Jihudimaiye sü puletao vei lü hinou souzü peilai, alia Tahrüh kukhe maiye sü puletao vei lü vanou souzü peilai.

³¹Sükuyu thaisü lü haina vanou Eletao nou razhai naye sü souharewu? Moe, sütoukhai moe; süjüwo, Eletao nou razhai naye sü khoua polouwe.