Read Poumei Naga ROMMAI 5 Bible Online

ROMMAI 5 - Poumei Naga bible

ROMMAI 5

¹Südonou chuo lü vanou Ramaiye koa Eletaoye souzü peiwuyu vanou, Eletao Mapao Jisu Khrista vanou Eletao hai Ramaiye koa kaonayu buloure.

²Lü vanou chu Eletao nou hrüa buyu Ramai vei zhuvea haina hi puhnou Eletaoye save thoupeire. Alia Eletao nou Ramai vei khouko ava zha ngaozhore rei-a buyu hisü lesa-a buwe!

³Süthe baimoe, ana Ehnou Ehvei veahoyu hia lesawe, daiolouzü veahoyu nou shameayu povewe,

⁴shameayu nou Ramai nou ae-ao touyu sü povewe, alia puhvei ae-ao touyu sünanou areih nasü panou veloue.

⁵Alia areih nanou Eletaoye panou le veamoe, daiolouzü Eletao hi sa-a peikhai touyu Rako Mashi vanou Ramai nou puh leshi hai Eletao lethou hi lathou peire.

⁶Daiolouzü Eletao nou khouko hazhia bubuki hinou, Khrista nou mai shimai donou teile kaoveibü hinou thaipeire.

⁷Maitalinou chechemai ali donou thaipeire hai tateishoe. Sütoukhaia maitalinou mai veimai ali donou khuvei-a thaipeirewo louzü bua malae.

⁸Ana Ramai nou Eletaoye daizhozhou leshisa touyu sü ngaopeire, süolouzü Eletao nou mahmai soua bubukinou Khrista nou Eletaoye donou thaipeiwure!

⁹Puh zhe vanou Ramaiye koa Eletaoye souzü peire; süthaisü daizhozhou koua puhnou Eletaoye Ramai vei rarou hinou khailupa peilai!

¹⁰Eletao sü Ramai vei ngaoba maitaoe, ana puhnah poutu athai vanou puhnou Eletaoye puh samai soupeire. Chuo Eletao sü Ramai samai soulouyu vanou, daizhozhou koua Khrista vei ahrü nanou Eletaoye khailu peilai!

¹¹Alia süthe baimoe, ana Ehnou Eh Mapao Jisu Khrista vanou Ramai hi lesawe, daiolouzü puh vanou chuo Ehnou Ramaiye koa chaveilouyu nasü ngaoloure.

¹²Mai ali vanou mah hai deiphao hi velou loure, alia mah vanou athai sü veloure. Haikuyu donou athai sü emai hrülai hi velou loure daiolouzü mai hrülainou mah soure.

¹³Razhai peimo jühinou mah sü deiphao hi bure; ana razhai hayu buh hisü mah pei chokhai tamoe.

¹⁴Ana Adam teile hinou Moses teile koute hisü athai nanou emai hrülai pei hi süolouzü Adam nou Ramai chikha züba-a mah souyu sübüa soumoyu maitao pei hi-a tukha-a buloure. Adam hai thaikhai hi vere mai sünavei zhuraiwo nasüe.

¹⁵Ana sühaisü kheihao moe, daiolouzü Ramai vei sapeina hai Adam vei mah bümoe. Mai alivei mah donou mai alaosou thaire touyu sü chekhaoe. Sübüyu thaisü daizhozhou koua Ramai zhuvea ea mai ali süna süolouzü Jisu Khrista vei zhuvea hinou veyu sapeina sünasünou mai alao pei hi bupeiloulai!

¹⁶Alia Ramai vei sapeina ea mai alivei mah kole hisü takuyu bue. Mahali thaisü, “Mah souyu” touyu vei chikuyu sü ve; ana mah alao thaisü “Mah hae!” touyu vei ngaozü moyu sapeina nasü veloue.

¹⁷Daiolouzü maili mah vanou athainanou mai süna vanou tukha sahrü loure toulouzü, mailinou süolouzü Jisu Khrista nou soukhai touyu sünanou daizhozhou dukou laisa! Ramai vei zhuvea alao ngaoloumai hrülai ea puhye koa sakhai-a souzülouyu maitao sü Khrista vanou puletao hrümai hisü acheche nanou tukha sahrü loulai.

¹⁸Sükuyu thaisü, maili mah vanou emai hrülaiye mah dukhaiyu büa, maili vei acheche vah süna vanou emai hrülaiye do soupeire ea puletaoye ahri sü peire.

¹⁹Alia mai alinou paoyu zübayu vanou emai hrülaiye panou mahmai soulouyu büa, mailinou paoyu züyu vanou puletao hrülaiye Ramaiye koa souzü peilai.

²⁰Mah sü panou pupa loure donou razhai hai vepeie; ana mah alaosou buyu hisü, zhuvea nou alaosou koua bue.

²¹Südonou athaina vanou mahnou tukha sahrüyu büa achechena vanou Ramai zhuvea nou tukha sahrüa Eletao Mapao Jisu Khrista vanou Eletaoye teisa ahri hi süthai thoupeie.