Read Poumei Naga ROMMAI 7 Bible Online

ROMMAI 7 - Poumei Naga bible

ROMMAI 7

¹Athaihou jürai khemai, Enou paore haina sü neletao nou veimosoua süwulai, daiolouzü neletao hrülai nou razhai nasü süwe. Razhai nou mailiye tukha-a buyu hai puhnou hribuki likheithe baie.

²Nadali hinou, nghiyupai aliye hai razhainanou puh chaanou hribusa sü puh hi phukhai khaitoua bue; ana puh chaanou thaita louzü puhye sü sheenghiyu vei zhaina hinou do soupeire.

³Südonou puhnou puh chaa hribu kinou poutumai kukheli ki nghive louzü, puhye sü khulou souyupai tea kulai; ana puh chaanou thaita louzü, puhsü razhaina hinou do souloure ea kukhemai aliki hi nghivekhaia puhsü khulou soumoe.

⁴Athaihou jürai khemai, neletao hi-a zhai süsü büa bubaie. Razhai hilo sü neletao hai thaire daiolouzü neletao hai Khrista vei pfüphao zha alire; alia Ramai vei kuvah Eletao nou veipua souloure donou chuo neletao hai athai hinou hrishu louyu puhvei souloure.

⁵Daiolouzü Eletao nou kezhe thaifüa hrüyu phakisü, razhainou soulapapei khaitouyu mah vei züpa sünanou Eletao pfüphao hinou vah souloua Eletao hisü athai vei rashi shiloue.

⁶Sütoukhaia chuo Eletao sü razhaina hinou do souloure, daiolouzü Eletao sü vuh lihi Eletaoye phukhaiwuyu süna hinou thaire. Südonou chuo Eletao sü rüthoukhaiyu razhai vei ludu akuna hinou kuvah soukhai more, ana Rako vei ludu ashuna hinou soubaire.

⁷Sübüyu thaisü Eletao nou razhai hai mah-e tea polaiwu? Süsü movuzüe! Ana mah hai daisa touyu Eye panou sülouyu sü razhainou baie. Razhainou, “Ne maivei züpa laimoe,” tea paomo louzü haibüyu züpayu sü Enou süpaimoe.

⁸Ana chikha süna vanou mah nanou teile kao-avei ngaoloua Alekhe hinou vasou züpa tyatyali souhripa peire. Daiolouzü razhai hayu buh hisü mah hai athai nalibaie.

⁹Teile ali hisü E-a razhai loumoa hrie; ana chikha sünanou velou louyu kisü, mah sünou hridalou khaire,

¹⁰alia Esü thaire. Alia ahri pove peire chikha nasü Eye donou louzü athai pove baire.

¹¹Daiolouzü mahnou chikha vanou teile kao-avei ngaoloua, sünanou Eye lawu-a southeare.

¹²Südonou razhainawo louzü sheebaie, alia chikhanawo louzü sheebaie, kaozübai ea veibaie.

¹³Ana sükulouzü veiyu sünanou Avei athai panou velou baiwu? Süsü movuzüe! Süsü mahnou soubaie. Mah vei chekhaoyu zhai nasü sheesha-a popa ngaopeire donou, mahnou avei naye sü seiloua Ahi athai povepeie. Alia sübüa, chikha vanou mah hai alaosou ngaopisoua mahsoue touyu sü ngaopeiwe.

¹⁴Razhai hai rako hilonoue touyu sü Eletao nou süwe; ana Ewo thailou veiyu pfüphao hilonoue ea qila ali kua mah hi zhothou peire.

¹⁵Enou souyu sü Enou sümoe; daiolouzü Enou sounüyu nasü Enou soumoe, ana Enou ngaorayu sünanou Enou soubaiwe.

¹⁶Enou sounü moyu sünasü Enou soua bure toulouzü, Enou razhai hai veie touyu sü aetoue.

¹⁷Südonou süna souyu puhsü Emoe, ana süsü Alekhe hinou buyu mah sünanoue.

¹⁸Ahi süolouzü Avei pfüphao khele hisü ha veili-a bumoe touyu sü Enou süe. Daiolouzü avei souloure züpa nasü Ahi bukhaia, Enou süsü soulouhoa bubaie.

¹⁹Enou sounüyu avei sünasü Enou soumoe; süjünou Enou sounü moyu ashi sünasü Enou soubaie.

²⁰Enou sounü moyu sünasü Enou soulouzü, süna soua buyu puhsü Ekhai more; ana Alekhe hinou buyu mah sünanoue.

²¹Südonou razhai hainanou vah soua buyu sü Enou ngaoloue: Süolouzü Enou aveina sounüyu kisü, ashi nanou Eye koa bubaie.

²²Avei lekhe tsü hiwo louzü Ramai vei razhai hisünou lesashoa bue.

²³Ana Apfüphao hinou takuyu razhai alinou vah soua buyu sü Enou ngaoe. Razhai sünanou Atsünou ae-ao touyu razhai sünaye reih züa bue. Sünanou Eye Apfüphao hinou vah soua buyu mahvei razhai sünavei hukhaloumai panou souloure.

²⁴O Ehai daizhozhou rako shiyu maisa! Thaohnou Eye athai pfüphao haina hinou khailupa peilai?

²⁵Eletao Mapao Jisu Khrista vanou süna soupeiyu Ramai puh kaloe! Sükuyu thaisü, lah Atsü hiwo louzü Ehai Ramai vei razhaina kuvah souwe, ana Akezhewo mah vei razhaina kuvah souwe.