Read Poumei Naga ROMMAI 9 Bible Online

ROMMAI 9 - Poumei Naga bible

ROMMAI 9

¹Khrista hinou Enou acheche nasü paowe, Ewo damoe, Rako Mashi hinou, Avei lekhe tsü nanou Eye koa zhopaoh peiwe,

²süolouzü Alethou hi pfüpailou hoyu veayu ea thaokhaimoa souyu sou bue,

³daiolouzü vasou thaifüa Atarai souyu, Athaihou jürai maitao donou lah Ehai Ramai cha ngaoa, Khrista hinou soukupa khaiyu Enou daizhou züpasa.

⁴Puletao hai Ramai vei maitaoe; puhnou puletaoye puh nahpoutu maitao soupeire ea puletao hisü puhvei khouko ava nasü ngaopeie, puhnou puletaoye koa Vo nasü souloue ea puletao hi razhai nasü peie; puletao hi cheche rathoyu nasü bue; puletao nou Ramai vei apaopeiyu nasü ngaoloure;

⁵puletao hai zhih tashoyu Ebria puo-paomaitao hilonou ve; alia Khrista hai emai ali soua puletao vei tahrüh hinou ve. Ha teitei pei hi khoa buyu Ramai puhye teisanou paosholou khaio! Amen.

⁶Ramai vei apaopeiyu nahai vetemore tea Enou paomoe; daiolouzü Israelmai hrülainou Ramai vei maikhaimoe.

⁷Moa Abraham tyaonah hrülai sü Ramai nah khaimoe. Ramai nou Abraham hi paoe, “Enou nehi apaopei khaitouyu tyaonah taosü nenou Isak vanou ngaoloulai.”

⁸Süvei kowo louzü Ramai nahtao hai vasou vei nahmaitao moe, ana Ramai nou apaopeiyu thaifüa nalouyu puletaoye nou chekhaoyu tyaonah maitao tea pobaie.

⁹Daiolouzü Ramai vei apaopeiyu chipao sünanou haibüa paoe, “Kao-züyu teile hinou Esü khaivelai, alia Sarah nou nahpoutu mai ali ngaolai.”

¹⁰Alia hai likheibai mohie. Daiolouzü Rebeka nahpoutu ahai-a puo alikhei baie, puhsü Eh puopao Isak süe.

¹¹Alia nah sühaiye namo jühinou ea veiyu, shiyu touyu hatalia soumo jühinou, vah vanou moa ana Ramai nou kulouyu vanou Puhnou dopayu vei lichoyu süsü thaokhaimoa takoure donou,

¹²haikua Ramai nou Rebeka hi paoe, “Tsü nanou nana kuvah soulai.”

¹³Haisü haibüa rüthouyu kue, “Enou Jakob ye leshie, ana Esau ye Enou ngaorawe.”

¹⁴Sükulouzü Eletao nou Ramai hai chechemoe tea paolaiwu? Süsü movuzüe.

¹⁵Daiolouzü puhnou Moses hi paoe, “Enou zhuveapei nüyu puh hisü Enou zhuvea peilai; Enou leshipei nüyu puh hisü Enou leshi peilai.”

¹⁶Südonou ha teitei sü emai züpa mo-a emai nou souyu pei bumoe, ana Ramai vei zhuvea pei hi bubaie.

¹⁷Daiolouzü sheeyu larübvü nou Pharaoh hi paowe, “Nenou Akhouko pongaore donou ea deiphao teitei hi Azhih hai paongao peire donou Enou neye panou veo souloue.”

¹⁸Südonou Ramai nou zhuveapei nüyu maitali hisü puhnou zhuvea peie, alia puhnou le soukhoupei nüyu maitali hisü puhnou le soukhou peiwe.

¹⁹Ana neletao hronou kamainou Ahi paolai, “Haibüyu thaisü Ramai nou kakua maitali vei mah phoupa loulai? Ramai vei leli nasü thaohnou nulousüe?”

²⁰Ana Asawo, Ramaiye chi veiva-a buyu ne sü thaohwe? Nailee alinou sünaye soupeiyu pao nahi, “Daidonou nenou Eye haikuyu zhai hinou soupeiwe?” tea chi nou tamoe.

²¹Lee souyu pao nanou puh züpa thaifüa naike ali vanou lee ahai souloua lee alinou khonühki seire donou ea kukhe alinanou teisa seire donou souyu hai puhvei zü hawu?

²²Alia Ramai nou soukhai touyu hia sükheihao-a chekhaobaie. Puhnou puhvei lekhasü pongao nüwe ea puhvei khouko sü panou sülou nüwe. Ana souhare donou likhei soukhai touyu puhvei lekha vei leetaoye sü puhnou alaosou shamea-a khopeie.

²³Alia puhvei khouko ava ngaoloure donou soudapei khaitouyu süolouzü puhvei zhuvea lee Eletao pei hi lakou thoupei khaitouyu puhvei alao souyu khouko ava nasü puhnou panou pongaoyu sü züpae.

²⁴Daiolouzü puhnou kulouyu Eletao hai Jihudimai hrohinou likhei baimoe ana tahrüh kukhemai hrohinou-a kuloue.

²⁵Hosea vei larübvü hinou haibüa puhnou paoe: “Amai moyu maitaoye nou ‘Amaitao’ tea Enou kulai. Enou leshimoyu tahrühyenou ‘Aleshipai’ tea Enou kulai.

²⁶Alia puletao hi ‘Neletao Amai moe,’ tea paoyu buh süna hinou puletaoye sü hriyu Ramai vei nahpoutu maitao tea kuloulai.”

²⁷Alia Isaiah nou Israel mai vanou haibüa shapae: “Israel maitao hai pouthou zaihi vünai zhoukhaia, puletao daotu likhei khailulou bailai;

²⁸daiolouzü Mapaowo nou thala-a deiphao hainaye koa puhvei palouchi teitei sü kuchelai.”

²⁹Alia haisü Isaiah nou raia paopayu kue, “Khoukhoulai Mapaowo nou Eletao hi tyaonahmai shodai peimore toulouzü, Eletao sü Sodom bübailai ea Gomorrah büa soupeiwu bailai.”

³⁰Südonou Ehnou paowe süolouzü Ramaiye koa souzü loure phoumoyu tahrüh kukhemai taosü lü vanou puhye koa souzü loure.

³¹Ana Ramaiye koa souzü loure razhaiye phouta-a buyu Israel maitaowo louzü süsü ngaolou more.

³²Daidonou ngaolou moe? Daiolouzü puletao nou süsü lü vanou phoumoa puletao nou sou-pfüyu vah sünaye lüa phouyu donoue. Alia südonou puletao hai “Phisü loure chuh” süna vanou phisü loure.

³³Haisü haibüa rüthouyu kue, “Zhukhaio, maikhe maiye panou phisü loure chuh, puletaoye soukaore chuhdu ali Enou Zion hi pokhai khaitoue. Ana puhye loucheyu mai taliye sü panou ahrao ngaolaimoe.”