Read Poumei Naga 1 KORINTHMAI 1 Bible Online

1 KORINTHMAI 1 - Poumei Naga bible

1 KORINTHMAI 1

¹Ramai leli hinou Khrista Jisu vei sei-atamai panou souloure donou kulouyu Paul, alia Eletao thaihou jürai Sosthenes hinou —

²Korinth hi buyu Ramai vei lüloumaime hi, süolouzü Khrista Jisu ye koa ali soulouyu hinou puh hi buyu Ramai vei sheeyu maitao souloure donou kulouyu puletao hrülai ea puletaoye koa buh veishi hinou puletao ea Eletao vei Mapao soua buyu Jisu Khristaye thoa buyu mai hrülai hi rüwe:

³Ramai Eletao Puo ea Mapao Jisu Khrista nou neletao hi zhuvea ea kaonayu peiyu sü souloutheo.

⁴Khrista Jisu vanou Ramai nou neletao hi peikhai touyu zhuvea süna donou Enou teisanou neletaoye donou Aramai hi kalo paowe,

⁵daiolouzü Khristaye koa ali soulouyu hinou neletao sü chipao pfüphou hinou ea tsü teitei hinoua, ha teitei hinou hanisho loure.

⁶Khrista vanou paokhai touyu chipao sü neletao hronou soutaosoua poloure,

⁷süolouzü neletao nou Eletao Mapao Jisu Khristaye ngaopeire sü khoa buyu hinou neletao nou ngaolou chemoyu ha ali koutea hare.

⁸Eletao Mapao Jisu Khrista teithe kihi neletao sü cha lia ha-a buloure donou, akhai koute puhnou neletaoye khotou peilai.

⁹Puhnah Poutu, Eletao Mapao Jisu Khristaye koa meime ali souloure donou neletaoye kulouyu Ramai puhye hai louche louveie.

¹⁰Athaihou jürai maitao, Eletao Mapao Jisu Khrista zhih hinou neletao hi khowe, süolouzü neletao hrohi me souku kuyu palou more donou alinou liye chi veivayu sü thaowuwo, alia sübüa neletao tsü-le alikhei soua bulo.

¹¹Daiolouzü Athaihou jürai maitaore, neletao hrohi zhüva-a bure tea Kloe kikhamai kamainou Ahi sheesha-a paongao peire.

¹²Enou paoyu süolouzü neletao maili linou haibüa taku kua paowe: Alinou paowe, “Ewo Paul thaifüwe;” kukhe linou, “Ewo Apollos thaifüwe;” kukhe linou, “Ewo Pitar thaifüwe;” alia kamainou, “Ewo Khrista thaifüwe;” tea paowe.

¹³Khristaye zhirewu? Neletaoye donou Paulye kros vanou veathearewu? Moa neletao hai Paul zhih hinou dzükhao dalouwu?

¹⁴Enou Ramaiye kalo paowe süolouzü Khrispas ea Gaias baimoa neletao kukhe talia Enou dzükhao dapeimoe.

¹⁵Sübüyu thaisü, maitalinoua neletaoye Azhih hinou dzükhao dapeie tea paolou hoe.

¹⁶(Oh Ovai, Stephanas ea puh kikha maiye-a dzükhao dapeie, ana süjünou Enou maitaliye dzükhao dapu peiho peimosa E sükhai more.)

¹⁷Khrista nou Eye dzükhao dapeire donou seimoe. Puhnou Eye Ko Aveina paodou peire donou seibaie, alia Khrista nou kros vanou thaiyu sünavei khouko sü souhawu more donou chipao süsü emai tsü-dokainou paolou more donou seipeie.

¹⁸Daiolouzü kros vei chipao hai ha-kare ludu hinou ta-a bumaitao donou louzü avochi baie; ana khailupoa buyu Eletaoye donou louzü haisü Ramai vei khoukoe.

¹⁹Haisü haibüa rüthouyu kue, “Enou tsüsümai ratsü nasü souhawulai alia hasümai vei sü-ngaoyu nasü potawulai.”

²⁰Sübüyu thaisü, tsüveimai daiki bue? Razhai sümai daiki bue? Moa deiphao haina vei chi veilousüwona daiki bue? Ramai nou deiphao hainavei tsüvei hai avoyu baie touyu sü ngaopeire.

²¹Daiolouzü Ramai nou puhvei ratsü hinou emaiye panou lah puletao vei tsüdo avei vanou puhye panou hakia sülou more soudawure. Süjüwo, Ehnou paodouyu, maikhe mainou “voyu chipao” tea sayu süna vanou lülouyu puletaoye khailu peiloure Ramai nou le laloure.

²²Chechena vanou lapei loure Jihudimainou shee khowe, alia Greek mainou tsüvei phouwe.

²³Ana Ehwo louzü kros vanou thaipeiyu Khrista vei ko paodouwe, chipao hainasü Jihudimai donou phisü loure süe ea tahrüh kukhemai donou avoyu süe;

²⁴ana Jihudimai-a, tahrüh kukhemai-a Ramai nou kulouyu puletaoye donou louzü chipao haisü Ramai vei khouko ea Ramai vei ratsü soua buyu Khrista puh baie.

²⁵Daiolouzü Ramai vei avoyu sünanou emai vei tsü veiyu süna jünou veikouhie, alia Ramai vei lelou hoyu sünanou emai vei khouko jünou khoupuhie.

²⁶Athaihou jürai maitao, Ramai nou neletaoye kulouyu kisü, neletao hai kakua busa chuo lichokhaio. emai zhai hinou zhulai toulouzü, neletao maitaolinou tsüveimai moe, maitaolinou khouko bumai moe moa maitaolinou du-shomai moe.

²⁷Ana Ramai nou sübüa tsüvei maiye sou ahrao peiloure donou deiphao hinou voyu sünaye doloue, alia khouko bumaiye sou ahrao peiloure donou deiphao hinou lelou hoyu sünaye Ramai nou doloue.

²⁸Deiphao mainou dushoe tea choyu sünaye souhare donou deiphao hinou mainou zhodüyu ea ngaorayu sünaye Ramai nou doloure.

²⁹Süvei kowo louzü maitalia Ramai nghojünou khaophu soulou hoe.

³⁰Ana Ramai nou neletaoye panou Khrista Jisu ye koa ali souloure, alia Ramai nou Khristaye Eletao vei ratsüna soupeire. Puh vanou Eletaoye sü Ramaiye koa souzü peire; Eletao sü Ramai vei sheeyu maitao souloure ea Eletaoye sü do soupeire.

³¹Südonou sheeyu larübvü nou paoyu kua, “Kathe souyu puhnou Mapaowo hinou kathe souloukhaio.”