Read Poumei Naga 1 KORINTHMAI 10 Bible Online

1 KORINTHMAI 10 - Poumei Naga bible

1 KORINTHMAI 10

¹Athaihou jürai maitao, Moses thaifüa laiyu Eh puo-paomaitao hisü dai paresa touyu sü Enou neletaoye panou lilou nüwe. Puletao hrülaiye sü teihao nou zütoupeie, alia puletao hrülai sü kao-zhou ashi alia daomoa Zai Aho nasü tacho paloue.

²Alia puletao hrülaiye sü Moses vei thaifümaitao soua teihao hinou ea zai hinou dzükhao dapeire,

³puletao hrülainou rako hilovei kheihaoyu touso sü toue

⁴alia puletao hrülainou rako hilovei kheihaoyu dzü sü küe. Daiolouzü puletao nou puletao thaifüa laiyu rako hilovei chuhdu hinou dzü sü küe, alia chuhdu sünasü Khrista puh baie.

⁵Sütoukhaia Ramai nou puletao mai poulo pei hi sü rukha more, alia südonou puletao vei thai pfüphao sü rekou hi porarou laire.

⁶Chuo puletao nou ashi züpayu kua Eletao-a züpalou more donou haitao teitei sü Eletaoye donou tukhayu alie,

⁷moa puletao kamainou souyu büa basharataoye thowuso; haisü haibüa rüthouyu büa, “Maikhemai taonou toure-shore donou kou buloure, alia do sou-a kore donou lashu loure.”

⁸Alia puletao kamainou khulou vah souloua teithe ali hinou mai the kaisü thaiyu kua Eletaowo khulou vah soulai moe.

⁹Puletao kamainou Mapaoye zhai zhua puletaoye nghounou daotheayu büa Eletao nou Mapaoye zhai zhuwu laimoe,

¹⁰alia puletao kamainou mülealealoua puletaoye Athai rakivamai nanou souhayu büa Eletao nou mülealeawu laimoe.

¹¹Haitao veishi sü mai kukhetaoye donou nada büa paloure, alia sütaosü Eletaoye tukha peire donou rüthou khaitoue. Daiolouzü Eletao sü akhai velaiyu teile hinou hrüa bue.

¹²Südonou laloure tea choa buyu maitali sü leikeilo, molouzü puh sü kaotalai.

¹³Emai hi zhai thaifüa vedaoyu athao süna moanou kukhe athao talinou neletaoye thaowu laimoe. Ana Ramaiwo louchelou veie, puhnou neletaoye panou neletao nou shamealou hoyu koute panou neletaoye thaowu laimoe, ana neletao nou sünasü shamea loure donou athao süna hinou tupa loure ludu-a houpeilai.

¹⁴Südonou leshiyu Asamaitao, bashara taoye thoyu sü thaowuwo.

¹⁵Tsüveimai hi paoyu büa Enou neletao hi paowe; Enou paoyu sü neletao lahnou chi kulo.

¹⁶Eletao nou Ramai hi kalo paowu-a Mapao Lito touyu ki seiyu pai süna hinou poa keyu kisü, Eletao sü Khrista vei zhe nasü koa zha ngaozho loure mowu? Alia Eletao nou soukhoyu raokhao süsü Eletao nou po touyu kisü, Eletao sü Khrista vei pfüphaoye koa zha ngaozho loure mowu?

¹⁷Daiolouzü Eletao sü poushokhaia raokhaopho alibaie, alia pfüphao alibaie, daiolouzü Eletao hrülainou raokhaopho ali süna hinou koa lou zha ngaozho loure.

¹⁸Israel maitaoye likhaio; posheelayu natao touyu maitaosü sheelabuh hinou koa Ramai kuvah souzhowe.

¹⁹Sübüyu thaisü, basharali hai moa sünaye popei khaitouyu touso nahai chechenou hatali vuzüe tea Enou paowu?

²⁰Moe! Enou paoyuwo louzü zhaohshomai vei sheelabuh hi posheelayu süwo louzü Ramai hi moe, rashitao hi baie tea paobaie, alia Enou neletaoye panou rashitaoye koa zha ngao zhoyu sü züpa moe.

²¹Neletao nou Mapao vei pai hinou ea rashitao vei pai hinou-a po külou hoe; neletao nou Mapao vei arübuh hinou ea rashitao vei arübuh hinou-a toulouhoe.

²²Molouzü Eletao nou Mapaoye southou rarou peiwu-a panou ngaoraia buyu züpawu? Eletao hai puh jünou khouhie tea chowu?

²³Puletao nou, “Eletao sü hatali soua bailai,” tea paowe. Süsü cheche-e, ana hateitei sü veimoe. “Eletao sü hatali soua bailai” — ana hateitei nou soudu papeimoe.

²⁴Maitalinoua lahvei züpa nasü phouso, ana kukhemai züpa nasü phoulo.

²⁵Lekhetsüna donou ha chilia noumoa hupobuh hinou zhoyu sou tali sü toukhaio.

²⁶Daiolouzü haisü sheeyu larübvü hi rüthouyu kue, “Deiphao alia sühi buyu teitei sü Mapao veibaie.”

²⁷Lü louchemomai alinou neye puh kihinou ve vaire donou kulouzü, alia nenou talai tea lalouzü, nevei lekhetsüna donou chilia noukhaimoa ne nghojühi khaipei khaitouyu touso talisü touwo.

²⁸Ana maitalinou nehi, “Touso haina hai basharatao hi sheelare,” tea paolouzü, süthaisü nehi popeiyu mai süna donou ea lekhe tsüna donou—

²⁹süolouzü lah nevei lekhe tsüna moa, kukhemai vei lekhetsüna donou touso sünasü touwuso. Ana kamainou noulai, “Sükuyu thaisü, daidonou kukhemai vei lekhetsü nanou, Amado naye chikulai?

³⁰Enou Atouso donou Ramai hi kalo paolouzü, daidonou Enou kalo paowu-a touyu touso süna vanou maitalinou mah dukhailai?”

³¹Sübülouzü veire, neletao nou tou-a sho-a moa hatali soupfü-a hateitei sü Ramai kathe donou soukhaio.

³²Jihudimai, tahrüh kukhemai moa Ramai vei lüloumai meye panou phi sülou more hrünou hrüloukhaio.

³³Enou soupfüyu sübüa soupfülo; Enou lah E veire donou chomoe, ana mai hrülai veire donou choa, puletaoye khailu loure donou Enou soupfüyu teitei hinou mai hrülaiye le sousa loure donou tewe.