Read Poumei Naga 1 KORINTHMAI 11 Bible Online

1 KORINTHMAI 11 - Poumei Naga bible

1 KORINTHMAI 11

¹Südonou Enou Khrista zhai douyu kua neletao-a Azhai doulo.

²Enou neletaoye paoshowe daiolouzü neletao nou Eye teisanou licho peiwe ea Enou neletao hi peikhai touyu doupeiyu sütaosü neletao nou thaifüa tawe.

³Ana Enou neletaoye panou sülou nüwe süolouzü poutumai hrülai peichanawo louzü Khristae, naotumai pei hi chanawo louzü puh chaa-e, alia Ramai nou Khrista pei chanae.

⁴Südonou maisou koa rathoyuki puhpei doloua veachi paoyu moa Ramai chipao shayu poutumai sünanou Khristaye sou ahrao peiwe.

⁵Alia maisou koa rathoyuki puhpei domoa veachi paoyu moa Ramai chipao shapayu naotumai talinou puh chaaye sou ahrao peiwe; daiolouzü puh hai peishu sailaiyu naotumai ali jünou takuyu hae.

⁶Naotumai alinou puh peihai domore toulouzü, puh peishua beiwuwo; ana naotumai ali donou peisaiyu moa peishu beiyu hai ahraoyu alie toulouzü puhye panou peidoloukhaio.

⁷Poutumai ali donou puhpei doyu matsü hae, daiolouzü puhsü Ramai vei zhu ea khouko ava baie. Ana naotumaiwo poutumai vei khouko ava baie.

⁸Daiolouzü poutumaiye sü naotumai hinou soupeimoe, ana naotumaiye sü poutumai hinou soupeie.

⁹Moa poutumaiye sü naotumai donou soupeimoe, ana naotumaiye sü poutumaiye donou soupeire.

¹⁰Südonou, rakivamaitao vanou, naotumai alinou puh hai puh chaa kharo khehi bue touyu pongaore donou puh peisü doloulai.

¹¹Sütoukhaia, Mapaowo hinou Eletao hrümai hai, naotupai-a poutupu hinou do soumoe, moa poutupu hai naotupai hinou do soumoe.

¹²Daiolouzü naotupaiye poutupu hinou soulouyu süzhaibüa poutupuye sü naotupai hinou naloure alia hateitei sü Ramai hinou veloubaie.

¹³Naotumai aliye donou maisouye koa rathoyuki puhpei domoa Ramai hi veachi paoyu hai züho zümoe touyu sü neletao lahnou chikukhaio.

¹⁴Lah zhainoua netaoye poutumai donou peishu shoa pfüyu hai ahrao baie touyu sü doupeibaie,

¹⁵Ana naotumai ali donou louzü haisü puhvei kathebaie. Daiolouzü puh peishu shoyu sünanou puhye sü peidopeire.

¹⁶Ana maitalinou süna vanou veiva nülouzü, Enou paore pfüphou süwo louzü Eh-a moa Ramai vei lüloumaimetao-a rathozhai kukhe talia hare.

¹⁷Sütoukhaia, khekou hi paodou peiyu taosü, Enou neletaoye paosho moe, daiolouzü neletao nou rathore donou tave dzüyu hai veipure donou moe ana shipure donou baie.

¹⁸Daiolouzü rairailai hinou neletao nou lüloumaime alisoua vedzüyu hisü neletao hrohi hai me kukuyu bue tea Enou chouwe; alia süsü Enou taoli louchewe.

¹⁹(Veikhaimoa, neletao hrohi sü cheche-a, buyu puletaoye sü panou sheesha-a ngaoloure donou me kukua buvu zülai.)

²⁰Me alisoua neletao nou tave dzüyu kisü, neletao nou toua buyu süsü Mapao vei Lito sünamoe.

²¹Daiolouzü neletao nou toua buyu hisü, maili linou lah lah tovaisü potouwe, sükua kamaisü houwe ea kukhemai taonou shozhia bue.

²²Neletaoye donou toure, shore ki hawu? Moa neletaowo Ramai vei lüloumaime donou tsükhouyu hawu, alia toure hamaitaoye sou ahrao peiwu bailaiwu? Haina vanou Enou neletao hi dai paopei shulai tea neletao chowe? Enou neletaoye paosho laiwu? Moe, Enou paosho laimoe.

²³Daiolouzü Enou neletao hi pei-a buyu doupeiyu haina hai Enou Mapaowo hinou ngaoloue; süolouzü Mapao Jisu nou puhye thoupeiyu khei sühinou raokhao pho ali poloue,

²⁴alia puhnou Ramai hi kalo paowu-a süsü soukhoe, alia haibüa paoe, “Haisü neletaoye donou soukhoyu Apfüphaoe. Eye licho loure donou haisü soukhaio.”

²⁵Süzhaibüa, vailouyu thaisü puhnou pai poloua paoe, “Pai hainasü Azhenou paoshee soukhai touyu Ramai vei Vo Ashu nasüe. Neletao nou haina pokütsüsü Eye licho loure donou soukhaio.”

²⁶Daiolouzü neletao nou raokhao haina touyu tsü ea pai haina pokütsü sü, Mapaowo khaivemo koute sü puhvei athaisü neletao nou shangaoa bue.

²⁷Südonou maitalinou züdoumoyu zhai hinou Mapao vei raokhao toulouzü ea puh pai pokülouzü Mapaowo vei pfüphao ea zheye zhaiwuyu vei mah bue.

²⁸Südonou mai hrülainou lahye raia chikutou louyu thainou raokhao nasü toulai ea pai nasü külai.

²⁹Daiolouzü maitalinou Mapao vei pfüphao hai daisa touyu vei kosü sümoa raokhao nasü toulouzü ea pai nasü pokülouzü, puhsü lahnou puh vahi Ramai vei chikuyu sü touthou, shothou baiwe.

³⁰Sükuyu vanou neletao hrohinou mai taolisü lelou hoe, sou-noua bue, alia kamaisü thaitare.

³¹Ana Eletao nou raia lah Eletaoye chiku loure toulouzü, Eletao sü Ramai vei chikuyu sü daowu paimoe.

³²Ana deiphao maiye koa Eletao pei hi mah dukakhai more donou Mapaowo nou Eletaoye chikuwure ea tudee peire.

³³Sübüyu thaisü, Athaihou jürai maitao, neletao nou Mapao vei Lito toure donou tave dzüyu kisü, alinou aliye kholo.

³⁴Alia maitalinou houa bulouzü, neletao vedzüyu hisü Ramai vei chikuyu sü panou velou more donou, houyu puhsü raia puh ki hinou toulo. Chi kukhe taosü E veyu kinou ve paoshee peilai.