Read Poumei Naga 1 KORINTHMAI 15 Bible Online

1 KORINTHMAI 15 - Poumei Naga bible

1 KORINTHMAI 15

¹Athaihou jürai maitao, Enou neletao hi paodou peikhaitoua neletao nou polouyu ea süvanou neletao vei lü soushu palouyu Ko Avei sünasü chuo Enou neletaoye panou li-cholou nüwe.

²Enou neletao hi paodouyu chipao sünasü Ko Avei sünasüe. Neletao nou Ko Avei haina hai potouloua bulouzü, sünanou neletaoye khailu peire— molouzü neletao sü raohanou louchebaire.

³Daiolouzü E-a ngaolouyu matsü tsülaina süsü Enou neletao hi thoupeire, süolouzü sheeyu larübvü thaifüa Khrista nou Eletao mah donou thaipeire,

⁴süolouzü sheeyu larübvü thaifüa puhye sü povure ea teithe asüzhou puhsü hrishu loure;

⁵alia puhnou Kephas hi ea süthainou sei-atamai kiahaitao hi ngaopeie.

⁶Süthaisü puhnou lüh ali hinou thaihou jüraimai kaihngoujü lah-a buyu taohi ngaopeie, puletao hronou poulo chukoute hrihie, ana kamaiwo zhitare.

⁷Süthaisü puhnou Jems hi ngaopeie, alia süthaisü sei-atamai hrülai hi ngaopeie.

⁸Alia akhai khailai hinou, hrü chemoa nakouyu nah büyu Ahi-a puhnou ngaopeie.

⁹Daiolouzü Ehai sei-atamai tea kuzü moyu, sei-atamaitao hrülai hronou tai-noukayu nasüe, daiolouzü Enou Ramai vei lüloumai meye souveapeie.

¹⁰Ana chu Enou haibüa hrüa buyu hai Ramai zhuvea vanou baie, alia puhnou Ahi peikhai touyu zhuveana hai hakonou moe, daiolouzü Enou sei-atamai kukhe hrülai jünou khoupua vah souloure; ana chechenou süsü Enou soumoe, anou süsü Eye koa buyu Ramai vei zhuvea sünanoue.

¹¹Südonou haisü Ahinou ve-a, puletao hinou ve-a, Eletao hrülainou paodouyu nasü hainare, alia sübüa neletao nou louche loure.

¹²Chuo Khrista hai athai hinou hrishu loure tea Ehnou paodou louzü, kabüa neletao hronou kamainou thaimai hai hrishu laimoe tea paowe?

¹³Thaimai donou hrishuyu hae toulouzü, süthaisü Khrista-a hrishu loumoe;

¹⁴alia Khrista hai hrishu loumoe toulouzü, süthaisü Ehnou paodouyu hai hako baire, ea neletao vei lü-a hako baire.

¹⁵Süjünou koua Ehye sü Ramai vei amada zhopaoh maitao tea ngaopeire, daiolouzü Ehnou Khristaye Ramai nou athai hinou souhrishu peie tea paoe, ana thaimai hai hrishumoe touyu hai chekhao louzü, süthaisü puhnou Khristaye souhrishu peimoe.

¹⁶Daiolouzü thaimai hai hrishu molouzü, Khrista-a hrishu moe.

¹⁷Alia Khrista hai hrishu molouzü, süthaisü neletao vei lü hai hakobaie ea neletao hai chu koutea neletao vei mah hinou buhie.

¹⁸Süthaisü Khrista hinou zhitayu puletao-a ha-kare.

¹⁹Chu hrü haina donou likhei Eletao nou Khrista hi rei-a bubailouzü, Eletaowo deiphaomai kukhe hrülai jünou zhuvea kayu maitaoe.

²⁰Ana athai hinou zhia buyu maitao hai hrishu vuzülai touyu lapeiyupao soure donou Khrista hai athai hinou hrishu cheche loure.

²¹Daiolouzü mai ali vanou athai veyu sübüa, mai ali vanou thaimainou hrishuyu-a veloure.

²²Daiolouzü Adam vanou mai hrülainou thaiyu süzhaibüa, Khrista vanou mai hrülaiye souhri peiwulai.

²³Ana mai ali lisü lah shoshonou hrishulai: Khrista nou mai hrülai jünou raikaie; süthaisü puhmaitao soua buyu puletao nou puh veyuki hrishulai.

²⁴Süthaisü akhai teile sü velai; sükisü Khrista nou teidei khomaitao, soulousü zü ea khouko teiteiye koloulai, alia süthaisü Vedei nasü Puo Ramai bah hi thoupeiwulai.

²⁵Daiolouzü Ramai nou Khristaye ngaobamai hrülaiye koloua puletaoye Khrista phihi pove khaimo koutesü puhnou Veo soua bulai.

²⁶Puhnou souhare akhai khailai ngaobamai süolouzü athai sünasüe.

²⁷Daiolouzü sheeyu larübvü nou paoe, “Ramai nou ha teitei sü puh phihi pove khaipeire.” Sütoukhaia haisü sheetoubaie, süolouzü “ha teitei” touyu hisü Khrista phihi ha teitei pove khaipeiyu Ramai puhwo loumoe.

²⁸Ana ha teitei hai Khrista khakhe hi pove khaiyu kisü, lah Nahpoutu puh-a ha teiteiye puh khakhe hi pove khaipeiyu Ramai puh khakhe hi ve bulai; alia ha teitei pei hi sü Ramai nou tukha khouloua bulai.

²⁹Chuo thaimai sühsoua dzükhao dayu puletao sü kabü khailai? Thaimai hai hrishu khailaimoe toulouzü, daidonou puletao sühsoua maikhe mainou dzükhao dawe?

³⁰Daidonou Eh hai teilecho tsünou hakalou veiyu hi buwe?

³¹Athaihou jürai khemai, teithetsünou Esü athaiye daoa buwe! Eletao nou Eletao Mapao Khrista Jisu ye koa ali soulouyu hinou neletao hi Akathe soulou vei buyu süna vanou Enou chi haisü paowe.

³²Enou emai zhaido hinou Ephesa hi khaosoutaoye reihzü bailouzü, sünanou Eye donou dai zhiyu bue? Alia thaimaitao sü hrishu molouzü, süthaisü haibüa paoyu kua, “Eletao sü tou-sho laikhe, daiolouzü Eletao hai doso thaibailai.”

³³Maiye panou lawuso, “Samai ashinou zhai avei souhawu baiwe.”

³⁴Leikeiyu tsü hi khaivelo ea neletao vei mah ludusü thaowuwo. Haisü Enou neletaoye panou ahrao loure donou paowe, daiolouzü neletao kamaisü Ramaiye sümoe.

³⁵Ana kamainou noukhailai, “Kabüa thaimainou hrishulai? Dai pfüphaonou pfüa puletao sü velai?”

³⁶Voyu maitaore! Neletao nou thoutai vuthouyu kisü, süsünou thaitamo koutesü paopata moe.

³⁷Alia neletao nou vuthouyu süsü thaikhai hi paopare süübe süna moe, ana thoutai likhei süolouzü southou tai moa kukhe thoutai talibaie.

³⁸Alia Ramai nou puh leli thaifüa thoutai sünaye sü pfüro ali peiwe alia puhnou thoutai alili hisü lah lah pfüro chekhai peiwe.

³⁹Daiolouzü vasou teitei hai zhobaimoe; ana emai vei vasounou tya alie, khaosouvei vasounou kukhe tya alikhaie, reihoutao veinou tyali khaie ea khah veinou kukhe tya alikhaie.

⁴⁰Alia raki hilovei pfüphaotao ea deiphao vei pfüphaotao-a bue; ana raki hilo pfüphao zhuvei süna hai deiphao pfüphao vei zhuvei süna jünou tyakuhie.

⁴¹Teinghi vei avali bue ea khou vei ava kukheli bue, alia teivutao vei ava kukheli bue; alia teivuhtao hrohia kukuyu ava bue.

⁴²Thaimainou hrishuyu kisü süzhaibü bailai. Pfüphaoye povuyu kisü, süsü hakalouvei pfüphao baie; hrishuyu kisü, süsü haka laimoyu pfüphao baie.

⁴³Povuyu kisü süsü zhu shishoe ea lelouhoe; hrishuyu kisü, süsü zhu veisholai ea khousholai.

⁴⁴Povuyu kisü, süsü vasouvei pfüphao baie, hrishuyu kisü, süsü rakovei pfüphaolai. Vasouvei pfüphao bulouzü, rako vei pfüphao-a bue.

⁴⁵Daiolouzü sheeyu larübvü nou paoe, “Mai raina Adam sü hrirai pfüyu mai ali souloure;” ana Adam nanawo hrirai peilouyu rako souloure.

⁴⁶Rako hilovei nanou veraimoe, ana vasou hilo vei nanoue, alia süthainou rako hilovei nasü ve.

⁴⁷Nainou souyu Adam raina sü deiphao hinou ve; Adam ahai chena sü raki vanou ve-e.

⁴⁸Deiphao hilonou veyu maitao sü, nainou soukhai touyu mai sünaye raiwe; raki hilo maitao sü rakinou veyu puhye raiwe.

⁴⁹Eletao nou chu nainou soukhai touyu mai sünavei kheihaoyu zhu pfüyu büa, Eletao sü raki hilovei mai sünavei kheihaoyu zhu-a pfülai.

⁵⁰Athaihou jürai maitao, haisü Enou neletao hi paowe, süolouzü ke-zhenou koa Ramai Vedei hisü ve zha ngaozho louhoe, moa ha-kalou veiyu sünanou ha-kalou hoyu sünaye koa zha ngaozho louhoe.

⁵¹Zhukhaio! Enou neletao hi kheitsüli paongaowe. Eletao hrülaisü zhikhai laimoe, ana Eletao hrülaisü

⁵²katou hinou, nghiphei alikho hinou, bekho nakaiyu na hinou datakhailai. Daiolouzü be houpayu kisü, thaimaitao sü ha-ka khailai moyuhi hrishulai, alia Eletao hrülai sü data bailai.

⁵³Daiolouzü hakalou veiyu zhai hainasü ha-kalai moyu hi data bailai; alia thailou veiyu zhai hainasü thailai moyu hi data vuzü bailai.

⁵⁴Südonou ha-kalou veiyu nanou ha-kalai moyuna bahnouyu kisü, alia thailou veiyu nanou thailai moyuna bahnou louzü, süthaisü sheeyu larübvü hinou paoyu nasü cheche-a velai: “Athainaye souhare; kolouyu hai chekhoure!”

⁵⁵“O Athaiwo, nevei kolouyu hai daiki bue? O Athaiwo, ne kei kahi bue?”

⁵⁶Athaivei kei hai mah nasüe, alia mahvei khouko hai razhai baie.

⁵⁷Ana Eletao Mapao Jisu Khrista vanou Eletaoye panou reih kolouyu Ramai puh hisü kalo paokhaio!

⁵⁸Südonou leshiyu Athaihou jürai khemai, latoulo ea lükhaiso. Mapaowo donou vah souyu hisü kou-noulo, daiolouzü Mapaowo donou te-a vah souyu hai hakia raohamoe touyu sü neletao nou süwe.