Read Poumei Naga 1 KORINTHMAI 16 Bible Online

1 KORINTHMAI 16 - Poumei Naga bible

1 KORINTHMAI 16

¹Chuo neletao nou Judea hi buyu sheeyumai taoye pousha soukha peire vanou chi nouyu süna vanou phalai. Enou Galatia hi buyu lüloumaime hi paopeiyu sübüa neletao-a souvu zülo.

²E veyuki pousha khata more donou, neletao nou Mapao vei teithetsü hisü, lah lahnou ngaolouyu süna thaifüa pousha daodaotu pokupa podzü khailouwo.

³Alia Enou veyu kisü, neletao nou ae-ao touyu mai sütaoye sü Enou zhu shingaoyu vei seiko sü peiwu-a puletaoye panou neletao vei sapeina nasü Jerusalem hi pove peire donou seitalai.

⁴Eye donou tare koyu bue toulouzü, süthaisü puletao nou Eye koa talai.

⁵Enou Makedonia hi taveloua neletaoye ve daolai, daiolouzü Esü Makedonia hi tavere bue,

⁶alia E hai neletao hi phajü ve chao-a bua malae, molouzü saikiphao vebua malae, alia süthaisü Enou tavere veihdu tali hisü neletaoye panou soukha peilai.

⁷Daiolouzü chu Enou neletaoye ludu chonou tave daoyu züpa moe, ana Mapaowo nou aetou peilouzü Enou neletaoye koa ve phaso buyu sü zhia bue.

⁸E Ephesa hai hinou Pentekos teithe koutesü chao-a bulai,

⁹daiolouzü buh haihisü ngaobamai alao bukhaia, Eye donou vah du-sho soulou vei phasü houpei khaitoua bue.

¹⁰Timothi hai neletao hi velou louzü, puhye sü shetoupeio, daiolouzü puhsü E büa Mapaowo donou vah souwe.

¹¹Südonou maitalinoua puhye ngaophou moyu souwuso, anou puhvei veihdu hai kaona-a taloure donou neletao nou puhye soukhapeio, sübüa puhye panou Ahi khaivelo; daiolouzü puhnou thaihou jüraimai taoye koa khaiveyu sü Enou zhia bue.

¹²Eh thaihou jürai Apollos vanou louzü, Enou puhye sü thaihou jüraimai kukheye koa neletaoye tave daore donou süshoa bure, ana puhsü chu neletao hi vere rokhai mohie. Sütoukhaia puhnou teile kaozhou avei ngaolouyu kisü neletao hi velai.

¹³Leikeilo, lü hinou latoulo, khu veilo ea khou-chilo.

¹⁴Neletao nou sou-pfüyu teitei sü leshi hinou soulo.

¹⁵Thaihou jürai maitao, Stephanas kikhamai hai Akhaia teidei hinou raikaia lou Khristamai soulouyu maitaoe ea lah puletao hai sheeyumaitao vei kuvah donou le loushoa vah souwe touyu sü chuo neletao nou süloure.

¹⁶Enou neletao hi khowe süolouzü haibüyu maitao ea puletaoye koa te-a vah souyu maitao thaisü fülo.

¹⁷Stephanas, Fortunatas ea Akhaikas puletao velouyu donou Enou lesawe, daiolouzü neletao hakhaia neletao buh hisü puletao nou tave thaoloure,

¹⁸alia puletao nou neletaoye le sousa peiyu büa Eye-a le sousa peire. Haibüyu maitaoye sütou peikhaio.

¹⁹Asia teidei hi lüloumaime taonou neletao hi khurüyu chidoh seiwe; Aquila ea Priskilla, alia puhai kinou vedzüa rathoyu lüloumaimenou Mapaowo zhih hinou sasa-a neletao hi khurüyu chidoh seiwe.

²⁰Haihi buyu thaihou jüraimai hrülainou khurüyu chidoh seiwe. Thaihou jüraiye leshia mümuyu zhai süna hinou alinou liye khurükhaio.

²¹Paul, Enou lah Abah vuzünou khurüyu chidoh haisü rüwe.

²²Maitalinou Mapaoye leshi molouzü, puhsü cha ngaotheo! Maranatha — Eh Mapao, thala-a vepeio!

²³Mapao Jisu vei zhuvea neletaoye koa buyu soulouwo.

²⁴Khrista Jisu hinou Avei leshisü neletao hrülaiye koa buyu sü souloutheo. Amen.