Read Poumei Naga 1 KORINTHMAI 2 Bible Online

1 KORINTHMAI 2 - Poumei Naga bible

1 KORINTHMAI 2

¹Athaihou jürai khemai, Enou neletao hi veyu kisü, chi-la veinou moa tsü veinou sei-a Ramai vei pongaopei khaitouyu acheche nasü paongaopoa vemoe.

²Daiolouzü Enou neletaoye koa bubu kisü, Jisu Khrista ea puhye kros vanou veatheayu sü likhei baideinou kukhe ha teitei ngaiwu bailai tea Ale laloure.

³Südonou Enou neletao hi veyu kisü, Esü lelouhoa, pishoa ea ngudoudoua bue,

⁴alia Enou paodouyu ea Avei chipaotao sü dokai veishoyu emai chipaonou paomoe, ana paoposhu louchelou süyu Ramai Rako vei khouko hinou paobaie.

⁵Südonou neletao vei lü nasü emai vei tsüdokai hi moa Ramai vei khouko hi vüa bubaie.

⁶Sütoukhaia rako hilonou liche-a buyu puletao hisü Enou ratsü vei chipao sü paongaowe. Ana chipao hainasü deiphao haina vei tsüdokai hinou vemoe moa haisü haka bailaiyu deiphao hainaye tukhayu khouko süna hinou vemoe.

⁷Enou paodouyu tsü dokai hainawo louzü emai nghojünou kukhai touyu Ramai vei kheitsü baie, ana haina hai deiphao soumo jühinou Ramai nou Eletao vei khouko ava donou doche louyu ratsü nasüe.

⁸Deiphao hainavei teideikhomai talinoua ratsü hainasü sümoe. Daiolouzü puletao nou süe toulouzü, puletao nou khouko avavei Mapaowoye kros vanou veatheawu laimoe.

⁹Ana haisü haibüa rüthouyu kue, “Nghithou nou ngaokhai moyu, moa nounou choukhai moyu moa emai lekhe hinou chokhai moyu sünasü Ramai nou puhye leshiyu maitao donou souda khaitouyu na süsüe.”

¹⁰Sütoukhaia, Rako vanou Ramai nou süsü Eletao hi ngaopeire, daiolouzü Rakonou ha teitei süolouzü Ramai vei thoushoyu kheina teitei koute-a phoue.

¹¹Daiolouzü lah puh lekhehi buyu rako süna likhei baimoa thaohnou thaohvei lekhe tsü nasü süloulai? Sübüa Ramai Rako likhei baimoa maitalinou Ramai vei tsü sümoe.

¹²Eletao nou deiphao hainavei rako ngaolou moe; ana Ramai nou Eletao hi sa-a peikhai touyu teitei sü süloure donou Ramai hinou seive khaitouyu Rako nasü Eletao nou ngaoloue.

¹³Südonou emai tsüdokainou doupei khaitouyu chipaonou Ehnou paomoe, ana Ehnou Rako buyu puletao hi rako hilovei achechena paodou peiyu kisü Rakonou doupeiyu chipaonou paowe.

¹⁴Ana pfüphao zhai thaifüa hrüyu mainou Ramai Rakovei sapeina taosü ngaolouhoe, daiolouzü sütaosü puhye donou avobaie, alia puhnou sütaosü sülouhoe, daiolouzü sütaosü Rako hilovei tsü pfüa sülou bailai.

¹⁵Rako hilo mai sünanou ha teiteiye chi kuwe, ana puhye mai talinoua chi kumoe.

¹⁶Haisü sheeyu larübvü nou paoyu kuwe, “Thaohnou Mapao tsü süwe? Thaohnou puhye doupeilou süwe?” Sütoukhaia, Eletao hi Khrista vei tsü bue.