Read Poumei Naga 1 KORINTHMAI 3 Bible Online

1 KORINTHMAI 3 - Poumei Naga bible

1 KORINTHMAI 3

¹Ana thaihou jürai maitao, Enou neletao hi rako hilo mai hi chi paoyu kua paolou hore, ana vasou hilonou hrüyu mai ali kua ea Khrista hinou nahpu maitou ali kua Enou neletao hi chipaoa bue.

²Enou neletaoye chonaodzünou peiwe, touso khou peimoe, daiolouzü neletao sü süna donou souda moe; alia chu koutea neletao sü süna donou souda moe,

³daiolouzü chu koutea neletao sü vasou hilonou hrüa buyu maitao kua hrühie. Daiolouzü neletao hrohi ngaoraiyu ea züvayu busasü neletao hai vasou thaifüa hrümowu ea lüloumomai tali kua tabai mowu?

⁴Neletao hronou alinou, “Ewo Paul thaifüwe,” ea kukhe alinou, “Ewo Apollos thaifüwe” tea paolouzü, neletaowo deiphaomai tali kua tabai mowu?

⁵Sübüyu thaisü Apollos sü thaoh-e? Alia Paul sü thaoh-e? Neletaoye lü hi süthailou peiyu Eletao sü Ramai kuvah maitao baie. Eletao maili lisü Mapaowo nou lah lah hi peikhai touyu vah nasü soubaie.

⁶Enou shothou peie, Apollos nou dzü züpeie, ana Ramai nou soudu papeie.

⁷Südonou shothou peiyu puh-a dzü züpeiyu puh-a matsü moe. Haisü Ramai likheithe kobaie, daiolouzü puhnou süübe naye soudupeie.

⁸Süübe shopeiyu ea dzü züpeiyu puhai sü kheihaobaie, alia puhai maili linou lah lahnou souyu thaifüa Ramai hinou buu ngaobailai.

⁹Daiolouzü Eletaowo Ramaiye koa vah souzhoyu maitaoe, alia neletaowo Ramai vei ludoue. Neletaowo Ramai Ki-e.

¹⁰Ahi peikhai touyu Ramai zhuvea süna thaifüa, kaishoa ki souyu paopu alikua Enou kifü nasü seipaloue, alia kukhemai alinou süna pei hinou ki soupaloue. Ana mai hrülainou kakua süna vahinou ki soupasa touyu hisü zhutoulou khaio.

¹¹Daiolouzü khopawuyu kifü Jisu Khrista the baimoa maitalinoua kukhe kifü lia khopa louhoe.

¹²Chuo kifü haina vanou kamainou sana, pousha moa muhteiyu chuhnou soua ki soupalai; kukhe mainou süü, ngai moa rouvao sei-a ki soupalai.

¹³Alia Khrista vei Teithe sünanou mai ali linou soukhai touyu vah pfüphou vei avei-ashi sü popa ngaopeilai. Daiolouzü Teithe sükisü mai alili vah hai meinou popa ngaopeilai; alia mai ali linou soukhai touyu vahtaosü dai tyasa touyu sü meinou zhai zhulai.

¹⁴Kifü süna vahinou soukhai touyu maitali vah hai meinou deimore toulouzü, souyu pao puhsü buu ngaolai.

¹⁵Ana maitali vah hai meinou deiwure toulouzü, puh sü alaosou ha-kayu ngaolai, ana lah puhwo louzü mei hinou thainonoa tupa louyu mai alikua khailu loulai.

¹⁶Neletaowo Ramai vei rathokie ea Ramai Rakonou neletao lekhe hi bue touyu sü neletaowo sümowu?

¹⁷Südonou maitao linou Ramai rathoki sü souhare toulouzü, Ramai nou puhye sü souhalai. Daiolouzü Ramai vei rathoki hai sheewe, alia lah neletao sü puhvei rathokie.

¹⁸Maitalia lahye lawuso. Neletao hronou maita linou deiphao haina zhai hinou tsüveie tea cholouzü, puhye panou chekhaoa tsüvei loure donou avomai souloukhaio.

¹⁹Daiolouzü deiphao hainavei tsüdokaiwo louzü Ramai nghojünou voyuna baie. Daiolouzü haibüa rüthoure, “Ramai nou tsüvei maiye puletao vei dokaiyu süna hinou nilouwe,”

²⁰alia sheeyu larübvü buh kukhe ali hinou haibüa paokhaie, “Tsüvei mainou lichoyu hai hako baie touyu sü Mapaowo nou süwe.”

²¹Südonou maitalinoua emainou dai soulousüe touyu vanou khaophu souwuso. Daiolouzü ha teitei hai neletao vei baie.

²²Paul-a, Apollos-a, Pitar-a, deiphao haina-a, ahri-a, athai-a, chu teile haina-a, thaikhai-a; pfüphou haitao sü neletao vei baie,

²³alia neletao sü Khrista vei baie ea Khrista sü Ramai vei baie.