Read Poumei Naga 1 KORINTHMAI 4 Bible Online

1 KORINTHMAI 4 - Poumei Naga bible

1 KORINTHMAI 4

¹Neletao nou Ehye hai Khrista vei kilaimaitao ea Ramai vei kheitsü peipha-apei maitaoe tea popeilai.

²Süpeinou, peipha-apeimai alinou bumo shilaiyu matsü ko alinawo louzü puhvei paopuye panou loucheyu sünasüe.

³Chuo Eye donou louzü, neletao nou Apei hi chi kuyu moa emainou chikuyu haiwo louzü ha zhotu lia moe. Lah E koutea Eye chi kumoe.

⁴Avei lekhetsü louzü sheetoue, ana sü vanou Esü kho-la sükhaimoe touyu lapei louhoe. Eye chi kuyupuwo louzü Mapaowo süe.

⁵Südonou kao-züyu teile vemo koute sü neletaowo maitali pei hia chi kuso. Mapao vemo koutesü akhai chikuyu nasü khoa bulai; puhnou chu teizhi hinou kheia buyu taosü avahi popalai ea emai le hinou pokukhai touyu taosü paopa ngaolai. Alia sükinou mai hrülainou Ramai hinou lah lahye paosho peire sü ngaolai.

⁶Athaihou jürai maitao, “Kao-züyu zhai nasü reitoulo,” tea paokhai touyu ko nasü daisa touyu sü panou neletaoye süloure donou Enou hai teitei hai neletao veiloure donou Apollos Ahaiye pao nada-a chi paowe. Neletao maitalia mai tali vanou khaophu souwuso ea kukhe aliye ngaorawuso.

⁷Neye thaohnou kukhemai jü dukoua soupeie? Nenou buyu veishi sü Ramai nou peimowu? Sükulouzü veishore, nenou kabüa nehi buyu taosü sapeina moe tea khaophu souloulai?

⁸Neletaowo moshilaiyu pfüphou bucherewu? Neletaowo hani chelourewu? Ehwo mokhaia neletaowo vemai soukhai lourewu? Eh-a neletaoye koa veloure donou, neletao hai chechenou vemaitao souloure toulouzü daizhozhou veilaisa.

⁹Daiolouzü Enou haibüa chowe, süolouzü akhai khailai hinou Ramai nou sei-atamai Eletaoye thaire donou dopa peire; daiolouzü Ehye sü teideiphao, rakivamai ea emaiye panou zhuloure na ali büa khaipeire.

¹⁰Khristaye donou Ehsü avomai soutare; ana Khristaye koa ali soulouyu hinou neletaowo tsüdokai vei-a bue! Ehwo lelouhowe, ana neletaowo khouwe! Ehwo mainou ngaorawe, ana neletaowo mainou tsükhouwe!

¹¹Chu bühi hai Ehsü houzüa ea rei-a laiwe; Ehwo sahba shinou bahnouwe; Ehye sü tai-da peire; Ehsü buh lihki hi chaolai-a laiwe.

¹²Ehnou lah Eh bahnou te-a vah souloure. Ehye chapeiyu kisü Ehnou hapeiwe; Ehye souvea peiyu kisü, Ehnou shameawe.

¹³Ehye sou ahrao peiyu kisü, Ehnou khu-leshi chipaonou chila peiwe, chukoute hai Ehsü deiphao hi nghou kua ea hashi taa-ngiyu büwe.

¹⁴Enou haina hai neletaoye sou-ahrao peiyu züpa-a neletao hi rümoe, ana lah Enou leshiyu Anahmaitao kua neletaoye doupeire donou baie.

¹⁵Daiolouzü Khrista hinou neletaoye süthai-apeimai the kiruo bukhaia, neletao puowo, likheithe bubaie. Daiolouzü neletao hi Ko Aveina pove peiyu neletao nou Khrista Jisu ye koa ali soulouyu hinou Enou neletao vei puo souloure.

¹⁶Südonou Enou neletao hi khowe, Azhai douyumai soulo.

¹⁷Sünasü panou souloure donou, Khristamai hrü hilonou louchelou veiyu ea lah Enou khuleshiyu Timothiye Enou neletao hi seivewe. Puhnou neletao hi Enou buh liki hi buyu lüloumaime pfüphou hi doupeiyu sütao ea Enou Khrista Jisu ye koa ali soulouyu hrü ashuna hinou tayu zhaitao sü panou li-choloulai.

¹⁸Neletao hronou kamaisü khaophu souloure daiolouzü Enou neletaoye tave zhukhailai more tea neletao nou choloure.

¹⁹Sütoukhaia, Ramai nou aetou peilouzü, E hai neletao hi thala-a velai, alia sükinou Enou khaophu souyumai sütaovei puletao nou paoyu sünamoa puletao vei dai khouko busa touyu sü phoupa loulai.

²⁰Daiolouzü Ramai Vedei hai chipao hinou bumoe ana khouko hinou bubaie.

²¹Enou südali poa neletao hi velaiho, ho leshiyu ea nataiyu rakonou sa-a velai? Neletaowo kananou züpawe?