Read Poumei Naga 1 KORINTHMAI 6 Bible Online

1 KORINTHMAI 6 - Poumei Naga bible

1 KORINTHMAI 6

¹Neletao hrohinou maitalinou puh thaihou jüraiye züvei-a bulouzü puhnou sheeyumai nghojü hi tavemoa zhaohshomai vei chikuki hi panou chi süsü kure donou tavelou süwu?

²Sheeyumai taonou deiphaomaiye chikulai touyu sü neletao sümowu? Deiphao maiye neletao nou chikulai louzü hazholia moyu chitao sü neletao nou kulou howu?

³Eletao nou rakivamaiye chikulai touyu sü neletao sümowu? Sükuyu thaisü daizhozhou koua chu hrü haina vanou Eletao nou chikulai!

⁴Sükuyu thaisü, haibüyu chi panou kure donou daidonou neletao nou lüloumaime hi zhih hayu mai hi tawe?

⁵Haisü panou neletaoye ahrao ngaore donou Enou paowe. Chechenou neletao hrohi thaihou jürai maitao kole hi chikude peire tsüveimai ali koutea harewu?

⁶Ana süjünou thaihou jüraimai alinou ali pei hi chikuki hinou taho mah duka khaia lüloumo maiye panou chi kuwe!

⁷Neletao alinou lipei hi chikuyu haiwo louzü neletaoye donou padayu sünabaie. Neletao daidonou kao-zümoyu nasü popeiloumoe? Lah neletaoye donou panou maiye lawuyu nasü veibaimowu?

⁸Ana neletaowo lahnou linou liye süolouzü thaihou jüraimai kouteye-a soumahwe ea lawe!

⁹Cheche moyu mainou Ramai Vedei sü ngaolaimoe touyu sü neletao nou sümowu? Neletao lah lawuso; khu-lou souyumai, bashara thomai, mai chapfüna sapamai, lah poutu ea naotu hao-a koa buyu,

¹⁰avaomai, loküyumai, zhaoh shozhimai, chi-lashi paomai moa maivei saotoumai haitao sü mailikhei koutea Ramai Vedei sü ngaolaimoe.

¹¹Neletao kamai sü sübüyu maibaie. Ana neletaowo mah hinou soushee loure; neletaowo Ramai hi shee-a popeire, neletaowo Mapao Jisu Khrista zhih hinou ea Eletao Ramai vei Rako hinou Ramaiye koa souzü loure.

¹²Kamainou haibüa paolai, “Eye donou hatali soua bailai.” Ovai; ana hateitei hai neye donou veimoe. Enou, Eye donou hatali soua bailai tea paolousüe, ana Enou hataliye panou Eye puhvei kilai soulai moe.

¹³Kukhe kamainou paolai, “Touso hai pou donou baie, alia pou hai touso donou baie.” Ovai, ana Ramai nou ahaihaiye sü souhalai. Pfüphao hai khulou vah soure donou moe, ana Mapaowo kuvah soure donoue; alia Mapaowo hai pfüphao donoue.

¹⁴Ramai nou Mapaowoye sü souhri peie, alia puhnou puhvei khoukonou Eletaoye-a sou hrishu peilai.

¹⁵Neletao pfüphao hai Khrista vei pfüphao zhataobaie touyu sü neletao nou sümowu? Südonou Enou Khrista vei pfüphao zhatao hai poloua sütao sü khakhapfü vei pfüphao zha soulaiwu? Sütoukhai laimoe!

¹⁶Moa khakhapfü aliye koa lou ali soulouyu puhsü puhye koa pfüphao ali souloure touyu sü neletao nou sümowu? Daiolouzü haibüa rüthoure, “Puhai sü vasou ali soulai.”

¹⁷Ana Mapaoye koa lou ali soulouyu puhsü rako hilonou puhye koa ali souloure.

¹⁸Khulou vah thaowuwo. Mai alinou souyu mah kukhe talisü puh vei pfüphao vakounou baie, ana khulou vah hinou mah souyu puhwo lah puh vei pfüphao hi mah soukhaiwe.

¹⁹Nevei pfüphao hai ne lekhe hinou hria buyu ea Ramai nou nehi peikhai touyu Rako Mashi vei rathoki nasüe touyu sü ne sümowu? Neletaowo lah neletao vei moe ana Ramai vei baie,

²⁰neletaoye sü muhnou hrüloure. Südonou neletao vei pfüphao hinou Ramai kathe soulo.