Read Poumei Naga 1 KORINTHMAI 7 Bible Online

1 KORINTHMAI 7 - Poumei Naga bible

1 KORINTHMAI 7

¹Chuo neletao nou rüveyu chi sütao vanou phalai. Mai aliye donou shee moyu nanou veie.

²Ana khulou vah souloure athao buyu donou poutumai hrülainou lah lahvei chapfü sü buloukhaio, alia naotumai hrülainou lah lahvei chaa sü buloukhaio.

³Mai alinou chaa ali soua puhnou soure vah nasü souvete loulai, alia naotumai alinou chapfü ali soua puhnou soure vah nasü souvete loulai, alia sübüa puhai alinou li rukha sü soupeilai.

⁴Chapfü hai puh lah puh pfüphao vei paopu moe, ana puh chaanoue; sübütoua chaa hai puh lah puh pfüphao vei paopu moe, ana puh chapfünoue.

⁵Lah nelenou leipua veachi paore donou teile phajütou alinou li hinou raloure ae-ao touyu sü likhei baimoa alinou liye bayu ali-a souso; ana süthaisü khailou kilo souyu hrüna hisü hrüloukhaio, molouzü lah pfüphaoye tukhalou hoyu vanou neletaoye Saitannou thaowu shulai.

⁶Haisü kharochi ali büa Enou neletao hi paomoe ana souloua bailai tea Enou paobaie.

⁷Chekhaoyuwo louzü neletao hrülai hai E büa buyu sü Enou züpawe; ana mai hrülainou lah lahvei takushoyu sapeina, alinou tya ali hinou ea kukhe alinou tya kukhe ali hinou Ramai hinou ngaoloure.

⁸Chuo Enou kilo soumoyu ea meamaipfü taohi paowe süolouzü neletaoye donou E büa lia buyu sünanou veikouhie.

⁹Ana neletao nou lah neletao vei züpa nasü tukhalou holouzü, sheenghi louwo. Daiolouzü züpa nou choroa buyu jünou sheenghiyu nanou veikouhie.

¹⁰Sheenghiyu maitao hi Enou chikha peiwe, süsü Enou moe ana Mapaowo nou peiwe, süolouzü chapfü alinou puh chaa hinou rata laimoe;

¹¹ana puhnou soure toulouzü, puhsü mi-a bubailai molouzü puh chaa hi khaive zholoulai; alia chaa alinou puh chapfüye rawu laimoe.

¹²Kukhe taohi Enou paowe (haisü Enou paobaie, Mapao nou moe); süolouzü thaihou jüraimai tali vei lü louche moyu chapfü bue toulouzü ea puhnou puh chaaye koa buyu aetouwe toulouzü, puhnou puhye sü phawulaimoe.

¹³Alia naotumai tali vei lü louche moyu chaa bue toulouzü ea puhnou puh chapfüye koa buyu aetouwe toulouzü, puhnou puh hinou ratawu laimoe.

¹⁴Daiolouzü lü louche moyu chaa sünaye sü puhvei chapfü vanou soushee peire, alia lü louche moyu chapfü sünaye sü puhvei chaa vanou soushee peire. More toulouzü puhai vei nahmaitao sü sheelaimoe, ana sübüa souloure toulouzü, puletao sü sheeloure.

¹⁵Sütoukhaia lü louche moyu sünanou rayu züpawe toulouzü; puhye panou süsü souloutheo. Haikuyu paitya hisü, thaihou jürai, chaa moa chapfü taliye nuyu hae. Daiolouzü Ramai nou Eletaoye panou kaona-a buloure donou kuloure.

¹⁶Oh naotupai, nenou ne chaaye khailu loulai, khailulou laimoe touyu sü kakua süe? Oh poutupu, nenou ne chapfüye khailu loulai, khailulou laimoe touyu sü kakua süe?

¹⁷Ana mai hrülainou Mapaowo nou puh hi zhihpei khaitouyu ea kupei khaitouyu süna thaifüa hrülo. Haisü Enou lüloumaime pfüphou hi doupeiyu zhai nasüe.

¹⁸Hee rodeyu mailiye Ramai nou kulouwu? Puhnou hee rodeyu shee nasü souhare donou tewuso; hee rode moyu mailiye Ramai nou kulouwu? Puhnou hee rodere donou tewuso.

¹⁹Daiolouzü mai alihai hee rodeyu, rode moyu sünanou soukuyu halia hae, ana soukure louzü Ramai vei chikha züyu sünasüe.

²⁰Mai hrülainou lah lahye kulouyu hrü süna hinou hrüa bulou khaio.

²¹Neye kilai ali soua buyu hinou kulouwu? Süvanou le veawuso. Ana nenou do souloure kao-zhou avei bue toulouzü, teile süsü soutaosoua seitoulo.

²²Daiolouzü kilai ali soua Mapao nou kulouyu puhsü Mapao vei do soulouyu mai baie, süzhaibüa do soua buyu hinou kulouyu puhsü Khrista vei kilaibaie.

²³Ramai nou neletaoye muhnou hrüloure; südonou emai kilai soudata khaiso.

²⁴Athaihou jürai maitao, neletao ali linou neletaoye kulouyuki hrüa buyu hrü süna hinou Ramaiye koa bulo.

²⁵Chuo neletao nou sheenghi moyu maitao vanou chi nouyu süna vanou Enou Mapaowo hinou chikha ngaolou moe, ana Mapao vei zhuveana vanou louchelou veiyu mai ali kua Enou Avei lelisü paowe.

²⁶Chu teilehi veahoyu haina sü licholoua mai ali donou puhnou hrüa buyu sübüa bubaiyu sünanou veikouhie tea Enou chowe.

²⁷Newo chapfü burewu? Sükulouzü puhye phare donou teso. Newo sheemohiwu? Sükulouzü sheere donou chapfü phouso.

²⁸Ana nenou sheelouzü, newo mah soumoe; alia loumaina alinou nghilouzü puhsü mah soumoe. Ana sheenghiyu maitao sü deiphao hi vei veahoyu daolai, alia Enou neletaoye panou sühinou palou nüwe.

²⁹Athaihou jürai maitao, Enou paoyu kowo louzü haire: apaokhaitouyu teile nasü jüsho loure, chu shonou chapfü buyu maitao nou hayu büa hrülouwo;

³⁰alia krayu maitao nou kramoyu büa, alia sayu maitao nou samoyu büa, alia na hüyu maitao nou halia hayu büa,

³¹alia deiphao hi natao vanou tsü loushoa bah deiyu maitao nou halia chokhai moyu büa bulo. Daiolouzü chu deiphao haina zhaisü thashoa talaire.

³²Neletao nou le choroa buyu sü Enou züpa moe. Sheemoyu mai sünanou Mapao vei kuvah donou, kabüa Mapaowoye le sousa laisa tea tewe.

³³Ana sheelouyu mai sünanou deiphao vei vahtao donou, kabüa puh chapfü le sousa laisa tea tsüchowe;

³⁴alia sübüa puhvei lenou nasü ahai soua zhire. Nghimoyu naotupai moa loumaina puhnou lah puhvei Mapaowo kuvah donou kabüa pfüphao-a rako-a sheetoua bulai tea tsü chowe; ana nghitayu naotupai sünanou, kabüa puh chaa le sousa loulai tea choa deiphao vei hrümai vanou doa bue.

³⁵Enou chi haisü neletaoye soukha nüyu vanou paowe, neletaoye panou sheenghi khailaimoe tea numoe. Ana Enou neletaoye panou kao-züyu nasü sounüwe, alia lah neletao hrümai teitei hai panou tsü vakukhaimoa Mapaowo kuvah souyu sü Enou züpae.

³⁶Maitalinou puhnou noutokhai touyu naotupai hisü zhai kaomoa tare toulouzü ea puhvei kezhe züpa hai dushoa buloure toulouzü ea puhai sü sheenghi molouzü shire tea puhnou cholouzü, süthaisü puhnou liyubüa puhaiye panou sheenghi loukhaio. Sühisü mah hae.

³⁷Ana maitalinou nutaiyu hinou moa puh lekhe hinou sheelaimoe tea latou loure toulouzü, alia puh leli hai tukhatsüa khaiwua puhnou nouto khaitouyu paiye sü panou lou-a bubailai tea puh le hinou laloure toulouzü, süsü veishoe.

³⁸Südonou puhnou noutokhai touyu loumaina sünaye nalouyu puhsü veia souloue, ana sheemoa buyu puhnou veikoua souloue.

³⁹Chapfü ali hai puh chaanou hrisasü puh hi phukhaitoua bue; ana puh chaa hai thaire toulouzü, süthaisü puhsü puh züpamai ali kihi nghive-a bailai, ana mai sünasü Khristamai ali souvu zülai.

⁴⁰Ana Avei chikuyuwo louzü, puhnou nghipu khaimoa bulouzü puhye donou vapu bailai. Alia Enou paoyu haisü Ramai vei Rakonou kozhopeia paoe tea Enou chowe.