Read Poumei Naga 1 KORINTHMAI 8 Bible Online

1 KORINTHMAI 8 - Poumei Naga bible

1 KORINTHMAI 8

¹Chuo neletao nou bashara hi popeiyu touso vanou rüpeiyu süna vanou phalai. Puletao nou paoyu büa haisü chekhaoe, süolouzü, “Eletao hrülainou tsü bue.” Ana haibüyu tsü sünanou mai aliye sü panou khaophu souwe; ana leshi nanou soudupa peiwe.

²Maitalinou puh hai hatali süe tea cholouzü puhsü puhnou sürepha koutea sümohie.

³Ana Ramaiye leshiyu puhye sü Ramai nou süwe.

⁴Sübüyu thaisü, bashara hi popeikhai touyu touso touyu vanouwo louzü: Ehnou süwe, süolouzü “bashara hai deiphao hinou cheche-a bumoe,” ana Ramai ali kheithe baimoa kukhe lia hae.

⁵Daiolouzü raki hi moa deiphao hi “rakhemai,” tea kuyutao bukhaia— ea chekhao-a sübüyu rakhemai ea paopu khemai alaosou bukhaia,

⁶Eletaoye donou louzü Puo, Ramai puh likheithe bubaie. Puh hinou ha teitei vebaie ea Eletao sü puhye donou hribaie, alia Mapao alikhei süolouzü Jisu Khrista bubaie. Puh vanou na teitei sü souloue ea puh vanou Eletao sü hribaie.

⁷Ana mai hrülainou acheche hainasü sükhai peimoe. Mai kamainou bashara hai chechenou hriwe tea chopha souloua zhou koutea puletao nou haibüyu touso touyu kisü puletao nou chechenou bashara vei touso touvuzü baiwe tea chowe; puletao vei lekhetsü sü lelou hoe, alia puletaoye sü touso sünanou souzhai peiwe tea chowe.

⁸Sütoukhaia, tousonou Eletaoye panou Ramai hi nghipuyu hae; Eletao nou toumo-a shipuyu lia hae, moa Eletao nou tou-a veipuyu lia hae.

⁹Sütoukhaia leikeilo, molouzü nevei do souyu hainanou lü hinou lelou hoyu maitaoye panou phi sülou shulai.

¹⁰Daiolouzü maitalinou, tsü buyu neye bashara vei rathoki arübuh hinou toua buyu ngaolouzü, sünanou puhye sü puhvei lekhetsü sü lelouhokhaia, bashara hi popapeikhai touyu touso toure donou southou khuvei peilai mowu?

¹¹Alia sübüa nevei tsü sünanou Khrista nou puhye donou thaipeiyu lelou hoyu ne thaihou jürai hainaye sü souhare.

¹²Sübüa neletao thaihou jüraimai pei hi mah soupeiyu ea lelou hoyu puletao vei lekhetsü zhupeiyu süsü neletao nou Khrista pei hi mah soukhaiwe.

¹³Südonou touso nou Athaihou jüraiye mah southou peilouzü, Athaihou jüraiye panou mah hi kaodulou more donou Esü hakia sou toupu khailai more.