Read Poumei Naga 1 KORINTHMAI 9 Bible Online

1 KORINTHMAI 9 - Poumei Naga bible

1 KORINTHMAI 9

¹E do soulouyu mai mowu? E sei-atamai ali mowu? E Eletao Mapao Jisu ye ngaoloure mowu? Neletao sü Enou Mapaowo donou vah souyu vei thou mowu?

²Kukhemaiye donou Ehai sei-atamai mokhaia, neletaoye donou louzü Ehai sei-atamai vuzüe; daiolouzü Ehai sei-atamai ali vuzüe touyu vei paoshee hai lah neletao nou Mapaowoye koa ali soulouyu hrü süna süe.

³Eye zhai zhure maitaohi dua chila peire sü haire:

⁴Avah donou Eye panou toushoyu zü hawu?

⁵Sei-atamai kukhetao, Mapao vei thaihou jüraimai ea Pitar zhaibüa E-a lü loucheyu chapfü aliye sa-a Aveih duhi tayu zü hawu?

⁶Molouzü Barnabas Ahai likheithe lah hriloure donou pou kutou bailaiwu?

⁷Lah pou kutoua reihmai souyu thaoh bue? Darkha kipei soukhaitoua sühinou ha shilia haitou moyu thaoh bue? Zhao kholi bua sühinou naodzü sütou moyu thaoh bue?

⁸Haisü Enou emai zhai likhei hinou paobaiwu? Razhainoua süzhaibüa paomowu?

⁹Daiolouzü Moses vei razhai hinou haibüa rüthoure, “Thou taia buyu chode naye sü nenou mü phuwu laimoe.” Haisü Ramai nou chode donou choa paobaiwu?

¹⁰Haisü Eletaoye donou likhei puhnou paobai mowu? Veikhaimoa haisü Eletaoye donou rüthoubaie, daiolouzü dou shayu puh-a ea chachiyu puh-a chathou nasü koa zha ngaozhore donou rei-a vah souvu zülai.

¹¹Ehnou neletao hi rako vei thoutai vuthou peilouzü, neletao hinou Ehnou pfüphao hilovei chachiyu sü pouyulewu?

¹²Kukhemainou neletao hinou touso, sabanüh koa zha ngaozhore zü bue toulouzü, Ehye donou zü dukoushoa bumowu? Sütoukhaia Ehnou zü hainasü poa vah soumoe. Süjüwo, Khrista vei Ko Avei ludu nasü panou khulou more donou Ehnou ha teitei hinou shamealoue.

¹³Rathoki hinou kuvah soumai sü rathoki hinou puletao vei touso ngaotouwe ea sheelabuh hinou kuvah soumai sü sheelabuh vei sapeina taosü zha ngaozhowe touyu sü neletao nou sümowu?

¹⁴Süzhaibüa, Ko Avei paodouyu maitaosü süna hinou puletao vei touso kutoulai tea Mapaowo nou kharochi peire.

¹⁵Ana Enou zü haitao talia poa vah soumoe, moa chuo Enou lah Eye donou zü haibüyu bue tea paore donou haisü rümoe. Sübüa souyu jüwo Enou raia thaibailai. Maitali noua Avei kathe souloure zü hainasü raohayu chipao hi soudathou louhoe!

¹⁶Enou Ko Avei paodouyu vanou Eye donou kathe souloure zü hae. Daiolouzü sübüa souloumo shilaiyu sünanou Apei hi kangi khaitoua bue. Enou Ko Avei nasü paodou molouzü Eye donou daizhozhou ngaopisa!

¹⁷Daiolouzü Enou vah hainasü Alelinou souwe toulouzü, süthaisü Mapao nou Eye buu peilai; ana Aleli thaifüa soumoe toulouzü, Eye sü vah haina soure donou Ramai nou seipei khaitoue.

¹⁸Sükulouzü Avei buusü daie? Enou Ko Avei paodouyu hisü, Ko Avei süna vei vah donou Avei zü alia tsükhaimoa sakhaia paodouyu süsüe.

¹⁹Ewo do souyu maibaie, Ewo maitali vei kilai moe; ana soulou veisa maitaoliye koloure donou lah Enou Eye sü mai hrülai vei qila panou souloure.

²⁰Jihudimai donou vah souyu kisü, puletaoye koloure donou Enou puletao büa hrüwe; alia Esü Moses vei razhai khehi hrümokhaia, süna khehinou hrüyu puletaoye koa vah souyu kisü, puletaoye koloure donou razhai khehinou hrüyu büa Esü hrüwe.

²¹Süzhaibüa, tahrüh kukhe maiye koa vah souyu kisü, puletaoye koloure donou, Jihudimai vei zhai vakounou Enou tahrüh kukhemai büa hrüwe, süolouzü Esü Ramai vei razhai thaifüa hrümoe touyu moe; daiolouzü Esü chechenou Khrista vei razhai khehinou hrüwe.

²²Lelouho maitao hisü, puletaoye koloure donou, Enou lelouhoa hrüwe. Sübüa, ha do tyali hinou mai kamaiye khailu loure donou Enou mai hrülai hisü ha teitei dalou baire.

²³Ko Avei navei ha nasü koa zha ngaozhore donou haitao teitei sü Enou Ko Aveinaye donou souwe.

²⁴Tuvayu hisü tuvayumai alaonou lou zha ngaozhokhaia mai alikheinou buu ngaobaiwe touyu sü neletao nou sümowu? Südonou neletao nou buu ngaoloure donou tukhaio.

²⁵Koyumai alinou soudoubu kisü ha teitei hinou lah pfüzhoye tukhawe. Puletao nou haisü hakalou veiyu veo peirü ngaore donou souwe; ana Eletaowo louzü haisü teisa hakalou hoyuna vei donou souwe.

²⁶Südonou Enou shirumoyu hinou moa, nghojü hilo tutoupoa laiwe; sübüa Esü raoha-a khungu hi bahkha khakhai moyu maiye davayu mai kuwe.

²⁷Ana Enou Apfüzhoye tukhatsü loua sünaye sü panou Akharo khehi khaibaiwe, sübümo louzü kukhemai hi paodou peiyu thainou Esü züdoumo bailai.