Read Poumei Naga 2 KORINTHMAI 10 Bible Online

2 KORINTHMAI 10 - Poumei Naga bible

2 KORINTHMAI 10

¹Neletaoye koa bubuki sü nataiyu, ana koa bukhaimoa doutakhaie khuvei shoyu Paul, lah Enou Khrista vei nataiyu ea kaonayu hinou neletao hi khowe!

²E velouzü Eye panou poushia chi paoloure donou nutsü peiso tea Enou neletao hi khowe; daiolouzü Eh hai deiphao vei tsüdo hinou vah soubaie tea paoyu puletaoye sü Enou khuveia dulou süe tea louchewe.

³Daiolouzü Ehsü deiphao hinou hrükhaia, Ehsü deiphao vei zhaido hinou reih soumoe.

⁴Ehnou reih züyuki seiyu baseitao sü deiphao vei basei moe, ana chihyu reihmaibuh taoye souhare donou Ehnou seiyu süolouzü khouko buyu Ramai vei baseitaoe.

⁵Madayu chi veivayutao ea Ramai tsüye ngaoraia khuyu khaophu souyu tsü teiteiye Ehnou souphe-soukhowe; Ehnou tsü teiteisü nibewu-a panou Khrista chi züwe.

⁶Alia neletao vei paoyu züyu sü chekhoure toulouzü, Ehnou paoyu zümoyu teiteiye tudeire donou souda-a bue.

⁷Neletaowo vakounou buyu nataoyenou zhuwe. Mai kamainou puh hai Khrista hi bue tea louche-a bulouzü, puhye panou puhnou Khrista hi buyu büa Eh-a bue tea liloukhaio.

⁸Daiolouzü Mapao nou Eh hi neletaoye souhare donou moa soudupa peire donou peikhai touyu khouko vanou khaophu soule phoukhaia Ewo ahraomoe.

⁹Avei seikotaonou neletaoye soupiyu büa panou cholou more donou haisü Enou paowe.

¹⁰Daiolouzü puletao kamainou paoe, “Puhvei seikotao hai chi süshowe ea chi souwe, anou puh pfüzhonou Ehye koa bubu kisü, puhsü lelouhoe ea puh chipaosü raohabaie.”

¹¹Sübüyu maitao nou süloukhaio süolouzü Ehnou habuki Ehvei seiko hinou rüyu sünasü Ehnou neletao hi buyuki soulaiyu süjünou halia takuyu hae.

¹²Daiolouzü lahye paoshoyu puletaoye koa Ehnou me souku paloure moa poda-a zhuloure khuhae. Ana puletao nou lah puletao vei tsünou linou liye podouyu kisü ea puletao lahnou linou liye poda-a zhuyu kisü, puletaosü daizhozhou vosa!

¹³Ana Ehwo khaophu soulah laimoe, anou süsü Ramai nou Eh hi vah soure khadapei khaitouyu sühinou bubailai, alia khadapei khaitouyu süsü neletao hrohinou Ehnou vah soure süna-a louwe.

¹⁴Daiolouzü Ehnou nelehi vemoyu büa Ehnou Ehvei khaophu sü soulawu laimoe; daiolouzü Khrista vei Ko Avei naye koa nelehi veyu hai Ehnou raikai baie.

¹⁵Khada peikhai touyu jünou koua Ehnou lou kukhemai vei kuvah hinou khaophu soumoe; ana Ehnou rei-a buyu sünawo louzü, neletao vei lü pukheyu sünaye koa Ramai nou khada peiyu süna hinou Ehnou neletao hronou dukoushoa lou kuvah souloure sünasüe.

¹⁶Süthaisü Ehnou Ko Avei nasü nele jünou doua buyu teidei kukhetaohi paodouta lousüe ea mai kukhenou soucheyu kuvah buh sünavei vah donou khaophu soukhai laimoe.

¹⁷Ana sheeyu larübvü nou paoyu büa, “Maitalinou khaophu sounü louzü, puhye panou Mapaowo nou soucheyu süna vanou panou khaophu souloukhaio.”

¹⁸Daiolouzü maitalinou lah puhye paoshoyu hinou moa Mapaowo nou paosho peiyu mai sünaye nou ae-ao tea popeire.