Read Poumei Naga 2 KORINTHMAI 12 Bible Online

2 KORINTHMAI 12 - Poumei Naga bible

2 KORINTHMAI 12

¹Veiloure ali-a hakhaia, Enou khaophu souvu zülai. Ana chuo Mapao nou Ahi peikhai touyu zhotao ea ngaopeiyutao vanou Enou chi paotalai.

²Khrista hinou buyu mai aliye po kiadai jühinou raki asü chenahi pohah kheyu sü Enou süwe (pfüphao noupu pokheho pfüphao loumosa Ewo sümoe, Ramai likhei nou süwe),

³Enou paopuwe, mai hainaye shofühi pohah khere (Pfüphao noupu pokheho pfüphao loumosa Ewo sümoe, Ramai likhei nou süwe),

⁴alia sühinou puhnou emai chipaonou paopalou hoyu ea emai malinou paolou shiyu chipaotao sü choue.

⁵Südonou mai haina vanou Enou khaophu soulai, ana Ehai daizhozhou lelou hosa touyu pongaoyuna sütao vanou baimoa nou, Enou lah Avanou khaophu soulaimoe.

⁶Enou khaophu souyu züpa louzü, Esü voyumai laimoe, daiolouzü Esü cheche chi paobailai. Ana Enou khaophu soulaimoe, daiolouzü maitaliye panou puhnou Ahinou ngaoyu ea Ahinou chouyu süna jünou koua Eye chopeiyu sü Enou züpa moe.

⁷Ana Enou khupa tyali ngaoyu sütao vanou Eye panou khaophu soua baotaitai-a talou more donou Avasou hisü shu büa khüyu sou ali peire, sünanou Saitan vei vahlaimai büa Eye dapeire ea panou khaophu soulou more donou vah souloure.

⁸Süna vanou Enou Mapaowo hinou lüh asü veachi paoe ea süna pota peire donou puh hinou khoe.

⁹Ana puhnou Ahi paopeie, “Avei zhuvea nou neye donou khrabaie, daiolouzü nenou lelouhoa buyu hinou Avei khouko hai khoushoa bue.” Khrista vei khouko hai Apei hi buloure donou Avei lelou hoyu hisü Enou koulihsou lesa-a khaophu soupulai.

¹⁰Südonou Khristaye donou lelou hoyu hia, sou ahrao peiyu hia, touso raiyu hia, souvea peiyu hia, alia kaozhou ashi hia Esü lesa-a bue. Daiolouzü Enou lelou hoyu pha hinou, Esü khouwe.

¹¹Ehai voyumai büloure! Neletao nou nutailoua süsü panou Eye soue. Eye ae-ao toupeiyu pongao peiresü neletao nou souzüe. Daiolouzü Ehai hazholia mokhaia, Esü neletao vei “Veiveilai sei-atamai” puletao jünou khaia lelou hoyu soumoe.

¹²Shameayu alao noupu sheetaonou, khupa tyali ea mainou souloho vahtaonou koa Ehai checheyu sei-atamai alie touyu vei sheetao hai neletao hrohinou soungao peire.

¹³Daiolouzü neletaoye panou thou-sha soukha peire hinou Enou neletaoye souvea khaimoyu süthe baimoa lüloumaimetao kukhe jünou Enou neletaoye kahinou leshiyu khaitare? Soumahyu haina vanou leshia Eye khaipeio!

¹⁴Chuo haisü Enou neletaoye tave zhure donou soudayu lüh asü chenare, alia Enou neletao hinou halia kholai moe. Enou züpayuwo louzü neletao baie, neletao vei pousha moe. Daiolouzü nahmai taonou pfüpuomai donou kini podzüwu laimoe, ana pfüpuo mainou puletao nahmai donou podzülai.

¹⁵Eletaoye soukhare donou Enou Avei buyu teitei ea lah Apfüzho-a sashoa peilai. Enou neletaoye alaosou leshi peiyu donou neletao nou Eye khai-a leshi peilaiwu?

¹⁶Süthaisü, Enou neletaoye southou kou süpeimoe touyu sü neletao-a aetouwulai. Ana mai kamainou Ehai do kaishowe ea dadoua neletaoye niloure tea paowe.

¹⁷Ana kabüa? Enou neletao hi seiveyu maitali vanou Enou neletao hinou zhiloure phoulouwu?

¹⁸Enou Titaye tapeio tea khoe, alia Enou puhye koa kukhe thaihou jüraiye seive-e. Tita nou neletao hinou zhiloure phouloure tea neletao nou paowu? Ahaisü tsü alikhei hinou vah soubai mowu ea ludu alikhei hinou tabai mowu?

¹⁹Enou lah Eh vanou neletao nghojünou dua chi paobaie tea neletao nou cho vuzübaiwu? Khrista nou Ehye panou Ramai nghojünou paonüyu chi sünanou Ehnou paobaie, alia leshiyu samaitao, Ehnou souyu teitei hai neleye soukhare donou soubaie.

²⁰Daiolouzü Enou velouzü neletaoye Aleli büa ea neletao nou Eye neletao vei leli büa ngaolou paimoe tea Enou piwe, alia sühisü züvayu, maiye ngaoraiyu, lekhayu, loküyu, maiye sou ahrao peiyu, mai chi paoshiyu, khaophu souyu ea bvüroyu haitao hai ngaolou shulai tea Enou ngaopiwe.

²¹Enou naki vepu khaiyu kisü Aramainou Eye neletao nghojünou southou natai peishulai ea raiki mah souwu-a puletao vei kezhe züpayu hinou ea khulou vah hinou le dalou moyu sheemoyu vah sütao vanou Ehai do-a krashulai tea ngaopiwe.