Read Poumei Naga 2 KORINTHMAI 13 Bible Online

2 KORINTHMAI 13 - Poumei Naga bible

2 KORINTHMAI 13

¹Zhovu Enou neletao hi velaiyu hainanou lüh asü chenare. Sheeyu larübvü nou paoyu büa, “Mah dukhaiyu talihai zhopaohmai ahai moa asü vei chi sünanou laloulai.”

²Raiki mah souyu maitaoye ea kukhemai hrülaiye tukha-a Enou paowe, alia Enou neletaoye lüh ahai chena ve zhuyu ki paoyu büa chu Enou habuki hinou puletao hi tukha-a paopuwe, süolouzü Enou veyu kisü, puletao sü tudee peiyu hinou halia tupa louhoe.

³Khrista nou Avanou chi paowe touyu vei zhopaoh neletao nou züpayu nasü Enou ve peilai. Khrista nou neleye koa vah souyu kisü, puh hai lelouho moe; ana puhnou puhvei khouko hai neletao hrohi ngaopeie.

⁴Daiolouzü lelou hoyu hinou puhye sü kros vanou southeawu khaia, puhsü Ramai khouko hinou hriwe. Puhye koa ali soulouyu hinou Eletao-a lelouhoe; ana Ehnou neleye koa tyarai soulouyu hinou Eh-a puhvei hrümai hinou Ramai vei khouko nasü zha ngaozholai.

⁵Neletao hai lühi bubu mosa neletao lahnou zhai zhukhaio ea chikukhaio. Neletao nou zhai zhuyu süna hinou laloumo baiyuwo deinou, Khrista Jisu hai neletao hi bue touyu sü veimosoua neletao nou süwe?

⁶Eh hai laloumoyutao moe touyu sü neletao nou süwulai tea Enou louchewe.

⁷Ana neletaoye panou soumahlou more donou Ehnou Ramai hinou veachi paowe, süolouzü Eh hai zhai zhuyu hinou laloure touyu pongaore donou moe anou Eye sü lalou moyu büa ngaokhaia neleye panou cheche nasü souloure donoue.

⁸Daiolouzü Ehnou chechenaye motoua hatalia soulou hoe, ana sünaye donou likhei ha teitei soubaie.

⁹Ehnou lelou hoyu kisü sawe, ana neletaowo khouwe. Alia südonou neleye panou liche loure donou-a Ehnou veachi paowe.

¹⁰Daiolouzü Mapao nou Ahi hakhaore donou moa soudu paloure donou peikhai touyu soulousü khouko nasü E veyuki Enou sei-a neletao hi poushi chi paolou more donou hainasü Enou neletao hinou doua bubukinou rüwe.

¹¹Akhai hinou, thaihou jürai maitao, vei-a buwo! Liche loure donou telo; Enou khoa buyu hisü keipeikhaio; alinou liye aetoupeio; kaona-a hrüpeio. Alia leshi ea kaonayu vei Ramai nou neletaoye koa bupeilai.

¹²Thaihou jüraiye leshia mü muyu zhai süna hinou alinou liye khurükhaio.

¹³Sheeyu maitao hrülainou puletao vei khurüyu chidoh neletao hi seiwe.

¹⁴Mapao Jisu Khrista zhuvea, Ramai leshi, alia Rako Mashinou koa bupeiyu sünanou neletao hrülaiye koa bupeiyu souloutheo. Amen.