Read Poumei Naga 2 KORINTHMAI 3 Bible Online

2 KORINTHMAI 3 - Poumei Naga bible

2 KORINTHMAI 3

¹Ehsü lah Eh vanou kathe paopu tarewu? Moa kukhe kamaitao kua Ehnou aetou peiyu larü neletao hi peire moa neletao hinou poloure moshilaiyu buwu?

²Lah neletao hai mai hrülaiye panou süloure ea phouloure donou Eh lethou hi rüthoukhai touyu Ehvei aetou peiyu seikoe;

³haisü sheetoue süolouzü Khrista lahnou seiko hainasü rüloua panou Ehyenou seitae. Seiko hainasü larüdzünou moa hriyu Ramai Rakonou koa rükhaitoue, alia chuhkhaotao vahi moa emai lethou vahi rükhaitoue.

⁴Khrista vanou Ramai hilosü Ehvei haibüyu lü bue.

⁵Vah haina hai Ehnou soulousüe tea Ehnou halia paolou hoe. Ehnou soulou süyu khouko hai Ramai hinou vebaie;

⁶puhnou Eletao hi Vo Ashu naye kuvah souloure khouko sü peie. Vo Ashu hainasü bahnou rüyu razhaina moe ana rako veie. Bahnou rüyu razhai nanou athai povewe, ana rakonou souhri peie.

⁷Razhaina sü chuhkhao vahi chahnou daothoue, alia süna peiyu kisü Ramai vei khouko ava-a koa ve ngaopeie. Moses zhu hi varuyu nasü khailoukhaia, sünasü chihleloua maikhe mainou puh zhusü zhupailou hore. Athai poveyu razhai nanou vah soubuki sübüyu khouko avanou koa velouzü,

⁸Rako vei vah souyu hisü daizhozhou khouko ava sü dukoushoa bulai?

⁹Daiolouzü athai poveyu kuvah nahi khouko ava hai bulouzü; daizhozhou koua khailu peiyu poveyu kuvahna hisü khouko ava bulai!

¹⁰Chechenou chu Vo Ashuna vei vakou shoyu khouko ava süna vanou raiki vashoyu khouko ava sünasü hatare.

¹¹Daiolouzü phajü donou baiyu sühi khouko ava bulouzü, daizhozhou koushoa teisa bulaiyu süna hisü khouko ava bulaisa!

¹²Eletao hi areih haina buyu donou, Ehsü khu veishoa bue.

¹³Ehwo Israel maitaoye panou khouko ava hatayu akhai nasü ngaolou more donou puh pah hi pah-hosah pohoyu Moses bümoe.

¹⁴Chechenou puletao tsü sü petei tare; alia zhou koute-a puletao nou Vo Araina sü phoua bukhaia puletao tsü sü raiki pah-hosah sünanou hoteipoa bue. Mai alinou Khristaye koa ali soulouyu hinou likhei pah-hosah nasü hapa loulai.

¹⁵Zhou koute-a puletao nou Moses vei Razhai phoua busasü, puletao tsü hai pah-hosah nanou hopoa bue.

¹⁶Ana Moses vanou sheeyu larübvü nou paoyu büa pah-hosah süsü hapalou süe, süolouzü: “Puhnou Mapaowo hi reiveyu kisü, puhvei pah-hosah nasü halaire.”

¹⁷Chuo Mapaowo sü Rakoe, alia Mapaowo vei Rakonou buyu buh sühisü mado soupeiyu bue.

¹⁸Südonou Eletao hrülaisü pah homoa Mapao vei khouko ava nasü ngao-a bue; alia Rako baiyu Mapaowo hinou veyu khouko ava sünanou Eletaoye sü dukoulailaiyu khouko ava nahi puh zhu kheihao-a soudathou peire.