Read Poumei Naga 2 KORINTHMAI 5 Bible Online

2 KORINTHMAI 5 - Poumei Naga bible

2 KORINTHMAI 5

¹Daiolouzü Eletao nou hrüa buyu sahpao haina hai—deiphao hi Eletao pfüphao haina sü souhawu louzü, bahnou soumoyu, teisanou rakinou bubaiyu Eletao vei ki ali Ramai hinou bue touyu sü Ehnou süwe.

²Alia chekhaoa chu hai Eletao nou le-a bue ea Eletao vei raki hilovei ki nasü banou loure donou zhishoa bue;

³süsü banouloua Eletaoye baitoua panou ngaowu laimoe.

⁴Daiolouzü Eletao nou deiphao haina vei sahpao haina hi bubu kisü, Eletao sü le chorosou le-a bue; süsü Eletao nou Eletao vei deiphao haina vei pfüphao hainaye thaowu-a tanüyu süna vanou moe, anou thailou veiyu sünaye ahri nanou jaoloua raki hilovei sünasü Eletao nou banou loure züpayu donoue.

⁵Eletaoye donou hrümai soudayu haina tudapeiyu puhsü Ramai baie, alia puhnou Eletao hi peire donou podzükhai touyu ha teitei sütao vei lapeiyu pao soua puhnou puhvei Rako sü Eletao hi peikhaitoue.

⁶Südonou Ehnou teisanou khuvei-a bue. Eletao nou pfüphao vei ki hinou busasü Eletao sü Mapaowo vei ki hinou doua bue touyu sü Eletao nou süa bue.

⁷Daiolouzü Eletao sü lü vanou tabaie, nghithounou ngaoyu vanou tamoe.

⁸Eletaowo khu veishoa bue, alia Ehwo pfüphao vei ki haina hai thaowu-a Mapaoye koa puh ki hinou ve hrüre sünanou züpa kouhie.

⁹Südonou ha teitei jünou, Ehnou ki haina hinou bua, ki hona hinou bua, Ehnou puh züpasü sounüwe.

¹⁰Daiolouzü Eletao hrülaisü Khrista vei Chikubuh nghojühi tave lavuzülai. Sübüa mai hrülai nou vei-a, shi-a lah lahnou puhvei pfüphaona hinou bubuki soukhai touyu süna thaifüa ngaozü nasü ve ngaolai.

¹¹Südonou Mapaoye pia hrüyu hai daisa touyu sü Ehnou süloua, Ehnou maikhe maiye süpeire donou tewe. Ramai nou Eh lesü sükhaia bue ea nelenou-a nelevei lekhetsü hinou soutaosoua süpei shulai tea Enou chowe.

¹²Ehnou nele hi lah Eh vanou paoshoa chi paopure donou temoe; ana neleye panou Eh vanou kathe souloure veishoyu qosü paongao peiwu-a panou emai vei lekhe vanou moa vakou emai zhaido vanou khaophu soua laiyu puletao hi chila peire donou Ehnou tewe.

¹³Eh hai chechenou tsü veimoa burewu? Sütoulouzü süsü Ramaiye donoue. Moa Eh hai tsü veiwu? Sütoulouzü süsü neletaoye donoue.

¹⁴Daiolouzü Khrista vei leshinou Ehye tukhapfüa bue, daiolouzü mai hrülai donou mai alinou thaipeire touyu sü Ehnou sütou loure; südonou mai hrülainou puhvei athai hisü koa lou zha ngaozhokhai loure.

¹⁵Alia hria buyu puletao nou lah puletaoye donou hrimoa puletaoye donou thaipeiyu ea hrishu louyu puhye donou hriloure puhnou maikhemai hrülai donou thaipeire.

¹⁶Südonou chushonou Ehnou maitaliye emai zhai thaifüa chikukhai more. Teile alihi Ehnou Khristaye emai zhai thaifüa chikukhaia, chuo Ehnou puhye sübüa chikukhai more.

¹⁷Südonou maitalinou Khrista hi buloure toulouzü, puhsü basha ashu datare; aku nasü tare, zhukhaio, ashu nasü vere.

¹⁸Soupeiyu hai teiteisü Ramai hinou vebaie. Puhnou Khrista vanou Eletaoye sü puhye koa souchavei peire ea souchavei loure kuvah nasü Eletao hi peiwure.

¹⁹Ehvei chipaowo louzü Ramai nou Khrista vanou emai hrülaiye puhye koa souchavei loure. Ramai nou puletao vei mahpei sü choa puletao pei hi motouyu soumoe, alia puhnou Eletao hi maikhe maiye koa souchavei louyu chipao nasü peikhaitoue.

²⁰Südonou Ehsü Khristaye donou sühseita maitaoe. Eh vanou Ramai nou neletao hi khoa bue. Khrista süh soua Ehnou nele hinou khowe, Ramaiye cha veilo!

²¹Khrista hai mah lia hae, ana puhye koa ali soulouyu hinou Eletao nou Ramai vei acheche nahai koa zha ngaozho loure donou Ramai nou puhye sü Eletaoye donou Eletao vei mah nasü koa panou zha ngaozho loure.