Read Poumei Naga 2 KORINTHMAI 6 Bible Online

2 KORINTHMAI 6 - Poumei Naga bible

2 KORINTHMAI 6

¹Südonou Ramaiye koa vahsoumaitao soua, nelenou Ramai vei zhuvea hai raoha-a ngaolou more donou Ehnou nele hinou khowe.

²Ramai nou dai paosa touyu sü keilo: “Aetou peiyu teile hinou Enou neye keipeire, alia khailu peiyu teitheki hinou Enou neye soukha peire.” Zhukhaio! chuhai aetou peiyu teile-e; zhukhaio, chuhai khailu peiyu teithe-e.

³Ehvei kuvah hi maitaliye panou mah phoupalou more donou, Ehnou maitaliye panou phisü loure halia soumoe.

⁴Süjüwo Ehnou ha teitei hinou lah Ehhai Ramai kilaitao baie touyu sü chihshoa shameayu hinou, souvea peiyu hinou, toure-shore hayu hinou ea pepoyu ve daoyu hinou zhopaoh souwe.

⁵Ehye sü dapeie, hukha hi thoupeie, soubvüroyu daoe; te-roua vah soue, zhai heyu moa khü-a buyu daoe.

⁶Ehnou sheeyu hinou, tsü hinou, shameayu hinou ea zhuvea peiyu hinou, Rako Mashi nou phoupeiyu hinou ea cheche-a leshiyu hinou,

⁷chechevei chipao hinou, alia Ramai vei khouko hinou lah Ehhai Ramai vei kilaitaoe touyu zhopaoh soue. Duloure ea khuloure donou lah Ehvei acheche vei basei bue.

⁸Ehye tsükhou peie ea sou ahraopeie; Ehye paoshi peie ea paosho peie. Ehye madayumai tea chopeie, sütoukhaia Ehnou chechenasü paowe;

⁹Ehye sü mainou süpeimoyu maitao büa popeikhaia mai hrülainou Ehye sü sükhaiwe; Ehye thaimai büa chopeie, ana zhukhaio, Ehsü hria bue. Ehye tudee peikhaia, southeawu moe;

¹⁰le souvea peiwukhaia, Ehsü teisanou le sawe; Ehhai toure hayu bükhaia, mai taoliye Ehnou southou hanipeie; halia hayu büa bukhaia Ehsü ha teitei buchewe.

¹¹Korinth hi buyu leshiyu samaitao! Ehnou nelehi dukhya-a chi paowe; Eh lehai nelehi houpha papei khaitoua bue.

¹²Nelehi Eh le khuyu hai Ehnou moe; Eh hi nelevei le khuyuhai neletao nou baie.

¹³Neletao hai Anahmaitao büa chuo Enou chi paowe: Ehnou neleye leshiyu büa, Eh hia sübüyu le nasü ngaopeiwo. Neletao le-a houpha papeikhaio!

¹⁴Lüloumo maiye koa ali kheisoua kou pfüzhoso, daiolouzü süsü souloushie. Kabüa checheyu ea chechemoyu sü koa meimelai? Kabüa ava ea teizhi nasü koa hrüloulai?

¹⁵Khrista ea Rashi kolehi ae-ao touyu dai bue? Moa lüloumai alinou lüloumomai aliye koa samai soure dai bue?

¹⁶Alia Ramai vei rathoyuki hai basharataoye koa ae-ao touyu dai bue? Daiolouzü Eletao hai hriyu Ramai vei rathokie! Haisü lah Ramai puhnou paoyu kue, “Aki hai Amaitaoye koa soulai ea puletao hronou hrülai; Esü puletao vei Ramai soulai; ea puletaosü Amai soulai.”

¹⁷Alia haibüa Mapaowo nou paoe, “Neletao puletaoye thaovuzüwo ea lah neletaosü puletao hinou souku palo, Sheemoyu sünaye halia deikhaiso, süthaisü Enou neletaoye popeilai.

¹⁸Esü neletao Puo soulai, alia neletaosü Anahpoutu mai ea Anah naotumaitao soulai tea khoukhoulai Mapaowo nou paoe.”