Read Poumei Naga 2 KORINTHMAI 9 Bible Online

2 KORINTHMAI 9 - Poumei Naga bible

2 KORINTHMAI 9

¹Judea hi buyu sheeyu maitaohi soukha peiyuvei kuvah süna vanou Enou neletao hi rüyu koshoyu hae.

²Neletao hai soukha peinüwe touyu sü Enou süwe, alia neletao vanou Enou Makedoniamai hisü khaophu souwe. Enou, “Akhaia hi buyu thaihou jüraimai taosü daokou hinou shua soukha peire donou soudare,” tea paore. Neletao vei lenouyu sünanou puletao mai pouloye sü le souho peire.

³Chuo chi haina vanou Ehnou nele vanou khaophu souyu sü panou raohata more donou thaihou jüraimai haitaoye sü seivewe. Ana Enou paoyu büa, neletao nou soukha peire nasü souda-a bupeikhaio.

⁴Sütoukhaia, Makedonia hi maitao nou Eye koa veloua neletao nou souda moyu toulouzü, nelevei ahrao paobaimoa, Ehye donoua daizhozhou hraolai, daiolouzü Ehnou nele vanou haizhozhou louche-a bue!

⁵Südonou thaihou jüraimai haitaoye sü Ajünou raia neletao hi tavere donou paopeiwu-a neletao nou peilai tea paokhai touyu sapeina nasü raia tave souda loure sü matsü bue tea Enou chowe. Süthaisü Enou veyu kisü süsü soudawulai, alia sünanou neletao nou moshilaiyu hinou moa peinüa peibaie touyu sü süloulai.

⁶Ana haisü Enou paowe: Laishi-a vuthouyu puhnou laishi-a chilai; anou alaosou vuthouyu puhnou alaosou chiloulai.

⁷Südonou maili linou lah lahnou le layu thaifüa, le ngaiyu moa moshilaiyu hinou mo-a peikhaio, daiolouzü lesasa-a peiyu maiye Ramai nou leshie.

⁸Alia neletao nou lah neletao vei moshilaiyu teiteisü teisanou buloure donou ea vah avei pfüphou donou koushoa buloure donou neletao nou moshilaiyu süjünou koua Ramai nou neletaoye peilou süe.

⁹Haisü sheeyu larübvü nou paoyu kue, “Puhnou ha hayu mai hi pakhaimoa peie; puhvei zhuvea hai teisanou bue.”

¹⁰Thoutai vuyu mai hi thoutai peiyu ea touso donou raokhao peiyu Ramai puhnou neletao hi moshilaiyu thoutai teitei-a peilai ea süsü panou paopaloua neletao nou pakhaimoa peiyu cha nasü panou alaosou puloulai.

¹¹Eh hinou ngaolouyu neletao vei sapeina süna vanou mai alaonou Ramai hi kalo paore donou, teisanou neletaoye panou ledua peire donou puhnou neletaoye ha teitei hinou southou hani peilai.

¹²Neletao nou kuvah souyu haina vanou sheeyu maitao vei moshilaiyu hi soukha peiyuthe baimoa puletaoye panou alaosou Ramai hi kalo paoloure.

¹³Neletao vei kuvah hainavei zhopaoh vanou, neletao nou füa laiyu Khrista vei Ko Aveinaye sü neletao nou züa buyu donou, alia puletao ea kukhemai hrülaiye koa neletao nou ledua zha ngaozhoyu vanou, mai alaonou Ramaiye paosholai.

¹⁴Alia neletao vanou ngaopeiyu Ramai vei khupa zhuvea vanou puletao nou neletaoye donou leshishoa veachi paopeilai.

¹⁵Paoshalou hoyu puhvei sapeina donou Ramaiye kalo paowe.