Read Poumei Naga GALATIAMAI 1 Bible Online

GALATIAMAI 1 - Poumei Naga bible

GALATIAMAI 1

¹Emai hinou moa emai vanou vemoa Jisu Khrista ea puhye athai hinou souhrishu peiyu Puo, Ramai vanou sei-atamaili souloure kulouyu Paul hinou seivewe.

²Buh haihi buyu thaihou jürai maitao hrülainou Eye koa Galatia hi buyu lüloumaime taohi sasa-a khurüyu chidoh sü seiwe.

³Ramai Eletao Puo ea Mapao Jisu Khrista nou neletao hi zhuvea ea kaonayu peiyu sü souloukhaio.

⁴Eletaoye zhodo maikha ashi haina hinou khaipa peire donou, Eletao Ramai ea Puo puhvei li-choyu thaisü füa Khrista puh lahnou puhye sü Eletao vei mah donou thoupeiwure.

⁵Ramai puhye sü panou teisanou adusho souloutheo! Amen.

⁶Khrista vei zhuvea vanou neletaoye kupeiyu puhye sü neletao nou süzhozhou thashoa thaowu-a kukhe ko aveili polouyu vanou Enou khupashowe.

⁷Chechenou “Kukhe ko avei” alia hae, ana Enou sübüa paoyuwo louzü mai kamainou neletaoye paothou tsü-bo souha peiyu ea Khrista vei Ko Avei nahai poda loure tewe.

⁸Ana Enou neletao hi paodou peiyu Ko Avei sübaimoa kukhe takuyu Ko Avei ali neletao hi Ehnou moa raki hinou kou rakivamai talinou doupeire toulouzü puhye sü panou cha ngaolou theo!

⁹Ehnou raia paoyu büa chu-a Enou paopuwe: maitalinou neletao nou ngaolouyu süjünou takuyu ko avei kukheli neletao hi paodou peire toulouzü puhye sü panou cha ngaoloutheo!

¹⁰Chu Enou emai vei ae-ao touyu phouho, Ramai vei ae-ao touyu phouwe? Moa Enou maikhe maiye sousa loure tewu? Chukoutea Enou maikhe maiye sousa loure te-a bulouzü, Esü Khrista vei kilai ali soua bulaimoe.

¹¹Athaihou jürai khemai, Enou neletao hi paongaolai süolouzü Enou paodouyu Ko Avei nasü emai mado hinou velou moe.

¹²Daiolouzü süsü Enou maitali hinou ngaoloumoe, moa maitalinou süsü Ahi doupei moe, ana Jisu Khrista puh lahnou süsü Ahi pongao peibaie.

¹³Daiolouzü Enou kabüa zhuveayu ali-a ha-a Ramai vei lüloumaimeye souvea peisa ea sünaye souhare donou Enou kabüa tesa touyu Enou Jihudimai vei rahrü zhaihi hrübuki Avei hrü araina kosü neletao nou choloure.

¹⁴Alia Eh puo-pao zhai hilova Enou tsü-le peiyule-a Eye hrükhayu Jihudimai maipoulo jünou Jihudimai razhaihrü hisü Enou rai-a takoue.

¹⁵Ana Eye namo jühinou Ramai puhvei zhuvea hinou Eye sü doloure, alia puhye kuvah souloure kuloure.

¹⁶Alia puhnou Ahi puhnah Poutuye pongao peiwua panou Eye puh vanou Ko Avei nasü tahrüh kukhe maitao hi paodou peire le lalouyu kisü, Enou maitali hi-a talou chipha kumoe,

¹⁷moa Ajünou raia sei-atamaitao soua buyu puletaoye daore donou Enou Jerusalem hi takhemoe, ana Enou chaokhaimoa Arabia teideihi tahoe, alia süthai Damaska hi khaive.

¹⁸Süthai po asü shosü Pitarye daore donou Enou Jerusalem hi takhe, alia puhye koa teithe kiangou nai-a bue.

¹⁹Ana Mapao vei thaihou Jems likhei baimoa kukhe sei-atamai taliye Enou ngaomoe.

²⁰Enou rüyu hai chechewe, Enou madamoe touyu sü Ramai nou süwe!

²¹Süthaisü Enou Suria ea Silisia teidei taohi tahoe.

²²Sükisü Judea hi buyu Khrista vei lüloumaime taonou Azhu sü shiloumoe.

²³Puletao nou haibüa mai kukhe mainou phakuyu likhei choubai hie, süolouzü: “Raiki Eletaoye souvea souhoyu mai sünasü lüh lihi puhnou souhare teyu lü sünasü chuo puhnou paodoua bure!”

²⁴Alia sübüa puletao nou Avanou Ramaiye paosho loure.