Read Poumei Naga GALATIAMAI 3 Bible Online

GALATIAMAI 3 - Poumei Naga bible

GALATIAMAI 3

¹He avoyu Galatia maitao! Neletaoye thaohnou shupeire? Neletao nghojübü hinou Khristaye kros vanou veatheayu sü dua pongaopeire!

²Enou neletao hi chi haina likhei noulai: Neletao hai Razhai thaifüa moshilaiyu vah souyu donou Rako ngaolouho, Ko Aveina chouloua louche louyu vanoue?

³Neletao votei tarewu? Neletaosü Rakoye koa soushuloua, chuo vasouye koa akhai souwu bailaiwu?

⁴Neletao nou veahoyu daoyu veishisü hako bairewu? Moe, sühisü hali buvuzüe!

⁵Neletao nou razhai thaifüa moshilaiyu souyu vanou Ramai nou neletao hi Rako peiwu-a panou neletao hrohinou khupa vahtao souwu, ho neletao nou Ko Aveina chouloua sünaye louche louyu vanoue?

⁶Abraham ye lichokhaio; sheeyu larübvü hinou paoyu büa, “Puhnou Ramaiye lü-louche, alia puhvei lü vanou Ramai nou puhye sü chechemaie tea poloue.”

⁷Südonou Abraham vei cheche taonah maitao sü lü buyu maikhe maitaoe touyu sü süloukhaio.

⁸Alia lü vanou tahrüh kukhemai taoye sü Ramai nou souzü peilai touyu sü sheeyu larübvü nou raia paopa peire, alia Ko Avei nasü raia Abraham hi haibüa süngaopeie: “Ne vanou tahrüh hrülaiye hapeilai.”

⁹Abraham nou loucheloue ea puhye sü hapeie; südonou lülouyu maikhemai hrülaiye puhye büa hapeie.

¹⁰Daiolouzü razhaivei vahtao hinou lüa buyu maikhemai hrülaisü cha khehinou bue; daiolouzü sheeyu larübvü hinou haibüa rüthou khaitoue, “Razhai bvü hi rüthou khaitouyu teitei teisanou zülou moyu puletao hrülai sü Ramai vei cha khehi bue!”

¹¹Razhainou maitaliye Ramai nghojünou souzü peimoe touyu sü chuo sheetoure, daiolouzü sheeyu larübvü nou haibüa paoe, “Lü vanou Ramaiye koa souzü louyumai süna likhei hrilai.”

¹²Ana razhaiwo lü vanou soushu moe, daiolouzü sheeyu larübvü nou paoyu büa, “Razhai thaifüa moshilaiyu teitei souyu maitalinou hriloulai.”

¹³Ana Khrista nou Eletaoye donou cha daloua, Eletaoye sü Razhai vei cha hinou khaipa peire; daiolouzü sheeyu larübvü hinou haibüa rüthoure, “Süüvanou khiyukhai touyu mai taliye sü Ramai nou chapeire.”

¹⁴Ramai nou Abraham hi apaopei khaitouyu ha nasü Khrista vanou tahrüh kukhemai taohi veloure donou süolouzü lü vanou Eletao nou Ramai nou peilai tea paopei khaitouyu Rako nasü ngaoloure donou puhnou Eletaoye khaipeire.

¹⁵Athaihou jürai khemai, Enou emai zhai hilonou nada chili paolai: Hatali vanou mai ahai nou ae-ao tea vo souyu kisü maitalinoua süsü soukho louhoe moa sühi hatalia thoupulou hoe.

¹⁶Südonou chuo Ramai nou puhvei apaopeiyu taosü Abraham ea puh tyaonah hi paopeie. Sheeyu larübvü nou “alia tyao-nah khemai hi” tea mai taoli vanou paomoe, ana “alia ne tyao hi” tea maili vanou, süolouzü Khristaye paobaie.

¹⁷Enou pao-a buyu ko sünawo louzü Ramai nou Abraham ye koa vo ali soue ea puhnou süsü khopeilai tea apaopeie. Po 430 thainou peiyu razhai sünanou vo sünaye soukho moe ea Ramai vei apaopei khaitouyu nasü souhawu moe.

¹⁸Daiolouzü kaa thaoyu nasü razhaihi lüa bure toulouzü, süthaisü süsü puhvei apaopei khaitouyu hinou more. Ana Ramai nou puhvei zhuvea hinou kaa sünasü apaopeiyu vanou Abraham hi peie.

¹⁹Sübüyu thaisü razhainou dai soure bue? Soumahyu touyu hai daisa touyu pongao peire donou razhai hai vohi thoupupei khaitoue, alia razhai nasü apaopei khaitouyu Abraham vei tao süna vemo koute tabailai. Razhai nasü rakivamai taonou kolelou-apeimai ali vanou peie.

²⁰Ana kolehi loupeiyu vah hai me ali donou likhei baimoe: anou Ramaiwo ali baie.

²¹Sükulouzü razhai nou Ramai vei apaopeiyu taoye sü motuwu? Moe, süsü soukhai moe! Daiolouzü emainou ahri pove peilou süyu razhai ngaoloure toulouzü, süthaisü razhai süna reiyu vanou maikhemai hrülaiye Ramaiye koa souzü peilou süe.

²²Ana sheeyu larübvü nou paoe süolouzü deiphao teitei hai mah khakhehi butare; alia sübüa Jisu Khristaye lü-loucheyu vanou apaopei khaitouyu kaa nasü louche louyu puletao hi peilai.

²³Ana lüvei teile vemo jühisü razhainou Eletao hrülaiye vere lü hainaye pongao peimo koutesü hukha hinou bekhaire.

²⁴Sübüa lü vanou Eletaoye Ramaiye koa teithe süki souzü peire donou razhainou Eletaoye Khrista vemo koutesü khoa bue.

²⁵Alia chuo lüvei teithe sünasü veloure ea Eletao sü razhai khakhehi bupu khaimore.

²⁶Lü vanou neletao hrülaisü Khrista Jisu ye koa ali soulouyu hinou Ramai nah soukhai loure.

²⁷Daiolouzü Khrista hinou dzükhao dalouyu neletao hrülaisü Khristaye banou loure.

²⁸Südonou chuo Jihudimai ea tahrüh kukhemai kolehi, kilaitao ea mado souyu maitao kolehi, naotu-poutu kolehi halia soukuyu hare, daiolouzü neletao hrülaisü Khrista Jisu hinou ali souloure.

²⁹Alia neletao hai Khrista vei soua bulouzü, neletaosü Abraham vei tyaonahmaitao souloure ea Ramai nou apaopeikhai touyu nasü ngaolai.