Read Poumei Naga GALATIAMAI 4 Bible Online

GALATIAMAI 4 - Poumei Naga bible

GALATIAMAI 4

¹Ana Enou paopukhaiwe süolouzü puovei kaa polaiyu nahpoutu sünaye sü ha teiteinou puhvei khaia puh taibu kisü puhye sü kilai alikua powe.

²Puhnou taibu kisü puh puonou puhye donou teile khada peimo koutesü puhye sü mainou khoa ea puh vah sü mainou zhua bue.

³Sübüa Eletao-a rako hilonou liche loumo jühisü teideiphaoye tukha-sahrüyu rakotao vei kilaitao soua bue.

⁴Ana apaokhai touyu teile süsü velouyu kisü, naotumai ali vanou panou razhai khehinou naloua Ramai nou lah puhnah Poutuye seive peie,

⁵süolouzü razhai khehi bumaitaoye khailupa peiwu-a Eletaoye panou Ramai nahtao souloure donoue.

⁶Alia neletao hai puh nahmaitao touyu sü pongaore donou Ramai nou puhnah Poutu vei Rakosü Eletao lehi seive thoupeie, alia rako sünanou, “Abba! Apuo!” tea raopawe.

⁷Südonou newo kilai khaimore ana nahpoutu ali souloure. Alia ne hai puh nahpoutu baiyu donou Ramai nou nehi puhnah Poutu maitao hi peire teiteisü peilai.

⁸Raikihi neletao nou Ramaiye sümoa buyu phaki hisü neletaosü zhai thaifüa ramai moyu sütao kilai soue.

⁹Ana chuo neletao nou Ramaiye sülouyu donou moa Ramai nou neletaoye sülouyu donou, kakua neletao nou lelou hoyu moa tainou shoyu rakotaovei khakhehi khailou hrüloulai? Daidonou neletao puletao vei kilai khailou soupu khaiyu züpawe?

¹⁰Neletaowo teithe, khou, khou-teile ea po kamaisü matsü tsülai soua rei-a bue!

¹¹Enou neletaoye donou te-a vah souyu sü hako baire moma tea ngaopiwe.

¹²Thaihou jürai khemai, E-a neletao zhai büa tayu kua neletao-a Azhaibüa tapeilo tea Enou neletao hi khowe. Neletao nou Ahi kao-zümoyu hatalia soukhaimoe.

¹³Enou neletao hi raikaiki daidonou Ko Avei nasü paodou peisa touyu sü neletao nou li-cho khaio: süsü Enou leshia buyu vanoue.

¹⁴Ana Apfüphao vei kao-zhoushi nanou neletaoye donou zhai zhuyu ali soukhaia, neletao nou Eye ngaorayu moa motouyu soumoe, ana neletao nou Eye sü Ramai vei rakivamai ali kua moa Khrista Jisu puhye shepeire büa sasa-a shepeie.

¹⁵Neletao vei sashoyuhi dai pare? Daiolouzü sükisü soulouveie toulouzü neletao nou lah neletao vei nghithou koute-a reila paloua Ahi peiloure büa bue touyu sü Enou neletao vanou zhopaoh peilou süe.

¹⁶Chuo Enou neletao hi acheche nasü paopeiyu vanou Esü neletao vei ngaobamai soutarewu?

¹⁷Maikukhe mainou neletao vanou rako loushoa bue, ana puletao nou li-choyu sü avei vanou moe. Puletao nou züpayu süwo louzü neletaoye Ahinou süku paloua puletao nou neletaoye donou lepeishoyu sübüa neletaoye nou puletao hi lepei loure süna baie.

¹⁸Enou neletaoye koa bubuki likhei baimoa avei vah soure donoue toulouzü sübüa lepeishoyu hai teisanou veishoe.

¹⁹Enou leshiyu Anahkhemai, Khrista vei zhaidou nasü neletao lekhe hinou buloumo koutesü Enou neletaoye donou pfümai alinou nah nareki veashoyu kua veawe.

²⁰Chuo Enou daizhozhou neletaoye koa bua Avei pai-la sü souda loure züpasa, daiolouzü Esü neletao vanou lekisho loure!

²¹Razhai khehinou hrünüyu neletao hi Enou chili noulai; razhainou paoyu sü neletao choumo hiwu?

²²Daiolouzü haibüa rüthoure, süolouzü Abraham hai nahpoutumai ahai bue, alinou kilai naotupai nah-e, alia kukhe ali nanou mado souyu naotupai vanoue.

²³Kilai naotupai vanou nalouyu puhnah Poutu sünawo vasou thaifüa naloue, ana mado souyu naotupai süna vanou nalouyu puh nahpoutu sünawo Ramai nou apaopei khaitouyu süna thaifüa naloue.

²⁴Chuo pao-a buyu haisü nada lahinou paokhaitoue: naotupai sühainou vo ahai sühsou la-a bue. Kilai soure donou nakoukhai touyu nah sütao pfüsü Hagar-e, alia puhnou Sinai Deichi hinou soukhai touyu vo süna sühsoua la-a bue.

²⁵Chuo Arabia teideihi buyu Sinai Deichina sühsou la-a buyu Hagar hai zhodo puhvei maikhemai taoye koa kilai soua buyu Jerusalem nuhdu naye paonadawe.

²⁶Ana raki vahi buyu Jerusalem sünawo louzü mado souyu pai nasüe, alia puh hai Eletao pfüe.

²⁷Daiolouzü haibüa rüthoure: “He nahahpai, ne lesalo! Nah nare donou khya soukhai moyupai, sasa-a shaphobou khaio! Daiolouzü chaanou thaokhaimoa koa buyu süpai jünou lah mi-a buyu painou nahmai bukou shohie.”

²⁸Chuo Athaihou jürai khemai, neletaowo louzü Isak büa apaopei khaitouyu nahkhe maitaoe.

²⁹Teile sükihi sü vasou zhai thaifüa nalouyu puhnou Rako vei khouko vanou nalouyu puhye sü souvea-souho peie; alia chuo sübütou loure.

³⁰Ana sheeyu larübvü nou kabüa paokhaitoue? Sühinou haibüa paoe, “Kilai naotupai ea puhnah Poutuye vakou hi seitawo, daiolouzü kilai naotupai sünavei nah Poutuwo nou mado souyu naotupai sünavei nah Poutuye koa puo vei kaasü pozho laimoe.”

³¹Südonou, Athaihou jürai khemai, Eletaowo kilai naotupai vei nahmaitao moe, ana mado souyupai vei nahmaitaoe.