Read Poumei Naga GALATIAMAI 6 Bible Online

GALATIAMAI 6 - Poumei Naga bible

GALATIAMAI 6

¹Athaihou jürai khemai, maitaliye mah soua buyu hinou niloure toulouzü, rako hinou tsüa buyu neletao nou puhye sü kaona-a souzü peikhaio. Ana lah neletao zhutoulo, molouzü neletaoye-a thaolou veie.

²Alinou likou pfükha peikhaio, alia sübüa Khrista vei zhai nasü souve tepeio.

³Daiolouzü maitalinou haliamo bukhaia puh hai halie tea chuwu louzü, puhsü lahye labaiwe.

⁴Maili linou lah lahvei vahsü zhai zhulai. Puhvei vahsü veie toulouzü, puhnou süna vanou kukhemai talinou soukhai touyu naye paokha khaimoa khaophu soulou veie.

⁵Daiolouzü mai hrülainou lah lahvei kou pfübailai.

⁶Ramai chipao doupeiyu ngaoloua bumai puhnou puh hi buyu avei pfüphousü puhye dou-apeio naye koa zhitouyu souloukhaio.

⁷Neletao lahnou lawuso; maitalinoua Ramaiye konü louhoe, daiolouzü maitalinou puhnou vukhai touyu süsü puhnou chiloubaiwe.

⁸Vasou züpa vei douhi vuthou khaitouyu puhnou sühinou athaisü chilou bailai; Rako vei hi vuthou khaitouyu puhnou, Rako hinou teisa halouho ahri nasü chiloulai.

⁹Südonou Eletao nou avei souyu hisü leveawu laimokhe; daiolouzü Eletao nou lekhaita molouzü, teile kao-avei hinou Eletao nou cha chilai.

¹⁰Südonou Eletao nou teile kao-avei ngaosasü maikhemai hrülaihi koulihsoua lüloumai kikhahi bumaitao hisü avei vah soupei laikhe.

¹¹Zhukhaio, chuo daizhozhou duyu larü chahnou Enou Abah vuzünou neletao hi rüsa!

¹²Neletaoye panou hee rode loure donou nutaiyu puletaosü vakou pfüphao hilonou khaophu soua aveikho sounüyu puletaoe. Sütoukhaia, puletao nou süsü Khrista vei kros donou puletaoye mainou souvea more donou likhei soubaie.

¹³Hee rodeyu puletao koute-a razhainou paoyu zümoe; ana neletao nou pfüphaovei naa haina soulouyu vanou puletao nou khaophu souloure donou neletaoye panou hee rode nüwe.

¹⁴Sütoukhaia Eye donou louzü Eletao Mapao Jisu Khrista vei krosna vanou likhei khaophu soubailai; daiolouzü puhvei krosna vanou deiphao hai Ahinou thaire, alia E-a deiphao hinou thaire.

¹⁵Daiolouzü hee rodeyu moa rode moyu sünanou halia moe, ana tsü chorewo louzü soushu louyu sünasüe.

¹⁶Zhai haina thaifüa tayu puletao hrülai ea Ramai vei Israel maitao pei hi kaonayu ea zhuvea buyu sü souloutheo.

¹⁷Akhai hinou, maitalinoua Eye souvea pupei khaiso, daiolouzü Apfüphao hi zheebuyu sünanou Ehai Jisu vei kilai baie touyu sü pongaowe.

¹⁸Athaihou jürai khemai, neletao hrülai pei hi Eletao Mapao Jisu Khrista vei zhuvea nasünou koa buyu souloutheo. Amen.