Read Poumei Naga EPHESAMAI 1 Bible Online

EPHESAMAI 1 - Poumei Naga bible

EPHESAMAI 1

¹Ramai leli hinou Khrista Jisu vei sei-atamai ali soua buyu Paul hinou— Khrista Jisu hinou cheche-a buyu sheeyu maitao hi rüwe.

²Ramai, Eletao Puo ea Mapao Jisu Khrista nou neletaoye zhuvea ea kaonayu peiyu sü souloutheo.

³Eletao nou Ramai ea Eletao Mapao Jisu Khrista Puoye kalo paolaikhe! Daiolouzü Eletao nou Khristaye koa ali soulouyu hinou puhnou Eletao hi raki buhtaohi buyu rako hilovei ha teitei sü peiwu-a Eletaoye hapeire.

⁴Deiphao soumo jühinou, Eletaoye panou shee-a buloure ea puh nghojünou chaa alia ha-a buloure donou Eletao nou Khristaye koa ali soulouyu hinou puhvei souloure Ramai nou Eletaoye doloure.

⁵Puhvei leshi hinou Eletaoye Jisu Khrista vanou puh nahmaitao soupei loure donou Ramai nou le lachere—haisü puhvei khrayu ea soure vah nabaie.

⁶Ramai puhnou puhvei leshi Nahpoutu vanou Eletao hi sa-a peikhai touyu puhvei khupa zhuvea donou Eletao nou puhye paosho laikhe!

⁷Daiolouzü Khrista nou thaipeiyu vanou, Eletaoye do soupeire, süolouzü Eletao vei mahsü khaipeire. Ramai vei zhuvea hai daizhozhou dusa,

⁸haisü puhnou Eletao hi alaosou peikhaitoue!

⁹Ramai puhnou puhvei ratsü ea lekhe hinou zhingao-a buyu teiteinou koa puhnou soulai tea soudakhai touyu nasü souloure, alia Khrista vanou souche khowulai tea le layu puhvei kheikhei souyu leli nasü Eletao hi pongao peire.

¹⁰Teile kaovei hinou Ramai nou souche peilaiyu puhvei souda haina hai Khristaye panou pei hi buloua puh phihi raki ea deiphao hi buyu basha teiteiye pove khaipeire sünasüe.

¹¹Ha teitei hai Ramai nou soudayu ea puh leli thaifüa souloure; alia Khristaye koa ali soulouyu hinou Ramai nou Eletaoye lah puhvei maitao souloure donou doloure daiolouzü Ramai puhnou soudayu nahai shuraikai hinou puhnou le layu süna vahinou beih soua bue.

¹²Südonou Khrista hi raikai-a rei-a buyu Eletao nou Ramai vei khouko avanaye paosho laikhe!

¹³Neletaoye khailu louyu pove peiyu Ko Aveina, cheche chipao süna neletao nou choulouyu kisü neletao-a Ramai vei maitao souloure. Neletao nou Khristaye louche loure, alia Ramai nou neletao hi puhnou apaopei khaitouyu Rako Mashi nasü peiwu-a neletao pei hi puhvei paoshee nasü nokhaire.

¹⁴Ramai nou puh maitaohi peilai tea apaopei khaitouyu nasü Eletao nou ngaolai touyuhai Rakonou lapeiyupao nasüe, alia hainanou Eletao hi Ramai nou puhmaitaoye mado souchekhou peilai touyuhai paosheetou peiwe. Eletao puh kathe paolaikhe!

¹⁵Qo haina vanou, Enou neletao vei Mapao Jisu hi buyu lü ea sheeyumai hrülaiye neletao nou leshiyu süna choulourai hinou shua,

¹⁶Enou neletaoye donou Ramai hi kalo paoyuhai halia sokhai mohie. Enou neletaoye sü veachi paoyu hinou lichowe,

¹⁷alia khouko avavei Puo, Eletao Mapao Jisu vei Ramai hinou neletaoye tsü souvei peiloure ea neletao hi Ramaiye pongao peiwu-a neletaoye panou puhye süloure donou neletao hi Rako nasü peiloure Enou khowe.

¹⁸Puhnou neletaoye kulouyu hi areih nasü daisa touyu sü neletao nou süloure donou ea puhnou puhvei maitaohi apaopei khaitouyu khupa hataosü daizhozhou paoshalou hoa busa touyu sü süloure donou puhvei ava ngaoloure neletao tsü nasü houpapeio tea Enou khowe,

¹⁹alia louche louyu Eletao hisü daizhozhou duyu puhvei khoukonou koa vahsoua busa touyu sü neletao nou süloulai. Eletao hinou vah soua buyu khouko haina hai chihshoyu khouko

²⁰süolouzü puhnou Khristaye athai hinou souhrishu peiyuki ea raki hilovei deiphao hinou puhye panou puh bahkha zhoulovahi kou buyuki puhnou seiyu khouko sünaye kheihaobaie.

²¹Khrista nou sühinou raki hilo buyu teidei khomaitao, soulousü zü bumaitao, khouko bumaitao ea paopumaitao pei hinou tukha-a bue; deiphao hainahi ea thaikhai vere deiphao vei khouko bumai hrülaitaovei zhih teitei jünou veikou shoyu puhzhih bue,

²²Ramai nou ha teiteisü Khrista phihi pove khaipeire ea puhye sü ha teitei pei hi Mapao peichana soua lüloumai mehi peire.

²³Lüloumaime hai puhvei chekhouyu, ha teitei hinou buh liki hinou phoupeia buyu Khrista puhvei pfüphaoe.