Read Poumei Naga EPHESAMAI 2 Bible Online

EPHESAMAI 2 - Poumei Naga bible

EPHESAMAI 2

¹Raikisü neletao hai paoyu zümoyu donou ea mah vanou rako hilonou thaia bue.

²Süpha kisü neletaosü deiphao hi ashi luduna thaifüa tae; Ramai chi zübayu maitaoye chu tukha-a buyu rako, rateihi buyu rako hilo khoukotaovei peichana chi sü neletao nou züwe.

³Chechenou Eletao hrülai-a puletao bübaie ea lah Eletao pfüphao ea tsünou züpayu tali soua Eletao vasou züpa thaifü-a hrüe. Alia südonou Eletao sü zhai thaifüa deiphaomai kukhe büa Ramai rarou lekhavei nahmaitao baire.

⁴Ana Ramai vei zhuveahai alaosou buloure, alia Eletaoye donou puhvei leshihai dusho loure,

⁵süolouzü Eletao sü Eletao vei paoyu zübayu vanou rako hinou thaia buyu phahinou puhnou Eletaoye sü Khristaye koa souhri peire. Neletaoye khailu peiyuhai Ramai zhuvea vanou baie.

⁶Eletao nou Khrista Jisu ye koa ali soulouyu hinou puhnou Eletaoye puhye koa rakiva buhtao hinou buloure donou puhye koa souhri peire.

⁷Haisü puhnou thaikhaihi vere teile teiteitao hinou Khrista Jisu hinou puhnou Eletao hi leshi peikhai touyu paoshalou hoyu puhvei zhuvea nasü pongaore donou baie.

⁸Daiolouzü zhuvea nou neletaoye lü vanou khailu peire; alia haisü lah neletao nou te-a soulouyu vanou moe, haisü Ramai vei sapeina baie—

⁹haisü emainou souyu vah hilonou moe, molouzü maitalinou khaophu soushulai.

¹⁰Daiolouzü Eletao hai Khrista hinou vah avei panou soua bure donou soupeikhai touyu puhvei vahmaitao baie süolouzü Eletaoye panou vah aveitao soua buloure raia Ramai nou Eletaoye donou soudachere.

¹¹Südonou li-chokhaio, süolouzü teile lihisü neletaosü vasou hilonou tahrüh kukhe maitaoe ea vasou hilonou emai bahnou soukhai touyu hee rodeyu tea kuyutao nou neletaoye sü hee rodemoyutao tea kue.

¹²Teile sükisü neletao sü Khrista hinou ku-a bue. Neletaosü vakou teidei maitaoe ea Ramai nou dolouyu maitao hi lou zhomoe. Neletaosü Ramai nou puh maitao hi apaopei khaitouyu hinou soushukhai touyu votao hi lou koa zha ngaozho moe, alia neletaosü deiphao haina hinou areih lia ha-a ea Ramai loumo-a hrüe.

¹³Ana chuo, Khrista Jisu ye koa ali soulouyu hinou lüh lihi doushoa buyu neletaoye sü Khrista vei zhe nanou pove nghei peire.

¹⁴Daiolouzü Khrista puhnou Jihudimai ea tahrüh kukhe maitaoye alikhei soupeiwu-a Eletao hi kaonayu pove peire. Puhnou lah puhvei pfüphaonou puletaoye kuku-a dekhaiyu ea panou alinou liye ngaoba-a buyu bouvou sünasü dakhaore.

¹⁵Khrista puhye koa ali soulouyu hinou tahrüh ahai hinou mai ashuli soupa loure donou puhnou Jihudi maivei chikhatao ea zhaitao vei razhai nasü souhare, alia sübüa soukaona peire.

¹⁶Kros vanou thaiyu Khrista puhvei athainanou puletao alinou liye ngaoba-a buyu sü souhare; kros vanou puhnou tahrüh ahaiye sü pfüphaoli soupeire ea puletaoye sü Ramai hi sakhaive peire.

¹⁷Südonou Khrista nou tavelou-a Ramai hinou doua buyu tahrüh kukhe neletao hi, alia puhye nghei-a buyu Jihudi maitao hi kaonayu vei ko avei nasü mai hrülai hi paodou peire.

¹⁸Jihudimai ea tahrüh kukhemai Eletao hrülaisü Khrista vanou rako ali hinou Puo nghojü hi veloure.

¹⁹Sükuyu thaisü tahrüh kukhe neletaosü vakou teideimai more moa shevai-shesükhai more; neletao hai chuo sheeyu maitaoye koa lah teidei maibaie ea Ramai kikhavei maitao baie.

²⁰Khrista Jisu puh lahnou ki kainghouvei chuh nasü soua, neletao-a sei-atamai taonou ea rachi paola maitao nou soushupa khaitouyu kifüna hinou soupa loure.

²¹Ki teiteiye paimua buyu ea sünaye panou Mapao hi posheela khaitoua sheeyu rathoki ali soua panou dushu palouyu hai puhnou baie.

²²Puhye koa ali soulouyu hinou neletao-a kukhemai hrülaiye koa puh rako vanou Ramai nou buloure buh ali koa soushupa loure.