Read Poumei Naga EPHESAMAI 3 Bible Online

EPHESAMAI 3 - Poumei Naga bible

EPHESAMAI 3

¹Qo haina vanou, tahrüh kukhemai neletaoye donou Khrista Jisu vei hukhahi bumai soua buyu Paul Enou Ramai hi veachi paowe.

²Veimosou-a neletao nou chowulai süolouzü Ramai nou puhvei zhuvea hinou vah hainasü neletao veire souloure donou Ahi peikhaitoue.

³Ramai nou puhvei kheitsü nasü pongao peia süsü Ahi süngao peie. (Enou süvanou dzüshoa rüre,

⁴alia Enou rüyu nasü neletao nou phoulouzü, Enou Khrista vei kheitsü vanou süyu nasü neletao nou süloulai.)

⁵Daoraiki teile hisü kheitsü haina vanou emai hi paongao peimoe, ana chuo Rako vanou kheitsü hainasü Ramai nou puhvei sheeyu sei-atamai taohi ea rachi paola maitao hi pongao peire.

⁶Kheitsü sünawo louzü Ko Avei süna vanou tahrüh kukhe maitao nou Jihudimaiye koa Ramai vei hataosü zha ngaozho loure; puletaosü koa lou pfüphao ali souloure ea Ramai nou Khrista Jisu vanou apaopei khaitouyu hisü koa zha ngaozho loure.

⁷Puhvei khoukonou vah souyu süna vanou puhnou Ahi peikhai touyu Ramai zhuvea vei sapeina sünanou Eye sü Ko Avei vei kilai panou souloure.

⁸Sheeyu maitao hrülai jünou Esü tainoukakhai-a Khrista vei paoshalou hoyu kinina vanou tahrüh kukhe maitaohi paodou peire donou zhuvea hainasü Ahi peikhaitoue,

⁹alia peikhai touyu süsü ha teitei soupeiyu Ramai puh hi dao daonou poku khaitouyu kheitsüna vei aroh nasü daisa touyu maikhemai hrülaiye panou ngaoloure donoue,

¹⁰sübüa chuo Ramai ratsü tya tyali hai lüloumaime vanou rakiva buhtaohi buyu peichamaitao ea khouko taoye panou süloulai.

¹¹Haisü Ramai nou puhvei teisavei aroh thaifüa souloue, alia süsü Eletao Mapao Khrista Jisu vanou souloure.

¹²Khristaye koa ali soulouyu hinou puh hi Eletao vei lü buyuna vanou loucheshoa Eletao nou Ramai nghojühi takou loure khuveiyu nasü bue.

¹³Südonou Enou neletaoye donou veahoyu süna vanou le khaitayu souwuso tea Enou neletao hi khowe; haisü neletao vei kathe baie.

¹⁴Qo haina vanou Enou Puo nghojünou kou Akhou khüloua veachi paowe,

¹⁵puh hinou rakihi ea deiphao hi buyu kikhamai hrülainou puletao vei checheyu zhih nasü ngaoloue.

¹⁶Enou Ramai hi puhvei khouko ava vei kini süna hinou neletao hi puhvei rako vanou neletao vei lekhe mainasü soutsü peiloure donou khoukosü khowe,

¹⁷alia lü vanou Khrista nou puhvei kihai neletao lekhe hinou souloure donou Enou veachi paowe. Alia leshi hinou neletaosü maa tsülou loure ea kifü soushu paloure donou Enou veachi paowe,

¹⁸sübüa neletao nou Ramai vei mai hrülaiye koa Khrista vei leshihai daizhozhou du-shosa ea daizhou kusa ea thousa touyu süloure khouko buloure donoue.

¹⁹Ovai, Khrista vei leshihai teiteinou sülouho khaia puh leshihai neletao nou süloulai ea sübüa neletaoye sü Ramai zhaido vuzü nanou liche-a phoupei loulai.

²⁰Chuo Eletao lekhe hinou vah soua buyu khouko süna vanou Eletao nou khoyu moa choyu sütao teitei jünou alaosou koua soupeilou süyu,

²¹Ramai puh hisü lüloumaime hinou ea Khrista Jisu hinou maikha teitei hinou teisanou paoshoyu souloutheo! Amen.