Read Poumei Naga EPHESAMAI 4 Bible Online

EPHESAMAI 4 - Poumei Naga bible

EPHESAMAI 4

¹Südonou Mapaoye kuvah souyu donou hukhahi loua buyu Enou neletao hi khowe, süolouzü Ramai nou neletaoye kulouyuki puhnou panou talai touyu hrüzhai süna hinou züdoua talo.

²Teisanou natai-a, kaona-a shamea-a bulo. Alinou liye shamea peiyu nou koa neletao vei leshisü pongaokhaio.

³Kaonayu vei phukhai touyu hinou rako vei lero zhoyu nasü khailoure donou telo.

⁴Ramai nou neletaoye kulouyu hi areih ali buyu sübütoua sühisü pfüphao ali ea Rako ali bubaie.

⁵Mapao ali, lü ali ea dzükhao dayu ali bubaie;

⁶alia maikhemai hrülai pei hi buyu, mai hrülaiye zhüpoa buyu ea maikhemai hrülai lekhehi buyu emai hrülai Puo Ramai ali bubaie.

⁷Ana Khrista vei sapeinavei kha thaifüa Eletao mai alilihi zhuvea sü peiwure.

⁸Südonou sheeyu larübvü nou haibüa paoe, “Puhnou kushoyu buh hi takheyu kisü, puhnou hukhahi bumai alaoye puhye koa sapoa tare; alia puhnou emai hi sapeinatao peie.”

⁹Chuo, “Puhnou takheyu” touyu vei kosü daie? Süvei kowo louzü raikai-a puhnou deiphao vei thou-thoulai buh hi takou loure touwe.

¹⁰Südonou ha teiteisü puhnou phoupei loure donou, takouyu puhsü rakitao teitei jünou kua ea dou koushoa takheyu puhbaie.

¹¹“Emai hi sapeinatao peiyu” sü puh baie; puhnou kamaiye sü sei-atamai, kamaiye sü rachi paolamai, kukhe maiye sü Ko Avei paodou-apeimai ea kukhe maiyenou zhaokho-apeimai ea dou-apeimai panou souloure donou dowure.

¹²Puhnou haisü Khrista vei pfüphao soudu puloure donou sheeyu mai hrülaiye Khristamai vei kuvah vei vah donou souda peire souloure.

¹³Alia sübüa Eletao hrülaisü Eletao vei lü alikhei souyu nahi ea Ramai Nahpoutuye alikheisoua süyu tsünahi koa vezholai; Eletao sü Khrista vei sah shotouyu sünahi khe-a licheyu maitao soutalai.

¹⁴Südonou Eletaowo lah puletao nou chopa louyu do sünanou kukhe maiye sümah sümo peiyu madayu maitao vei doupeiyu teikhai teiteinou hükou-hükhe-a pfüa laiyu nahmaitao büwu laimoe.

¹⁵Süjüwo, leshi hinou acheche chi nasü pao-a Eletao vei pei soua buyu Khrista hisü ha pfüphou hinou dushu palou vuzülai.

¹⁶Puhvei khakhe hinou pfüphaovei kukuyu zha teiteisü pove thaokhaitoue, alia pfüphao pfüphouye bou teiteinou sühi peikhai touyu sütaonou paimupoa bue. Südonou kukuyu zha ali linou puletao nou souzüyu vahtaosü souyu kisü, pfüphao pfüphounou leshi vanou duzhupa louwe ea lah puhye soushupa peiwe.

¹⁷Südonou Mapaowo zhih hinou Enou haisü neletaoye tukha-a paowe: hako tsü pfüa buyu zhaohsho maitao büa neletaowo hrüpu khaiso;

¹⁸puletao tsüwo maitare. Puletaowo Ramai nou peiyu hrü nahi zha alia hae, daiolouzü puletao hai halia sükhaimoe ea le khoushoe.

¹⁹Puletao sü hraongu lia hae; lah puletao hrümaisü sheemoyu vah hi thoupeire ea nuyu ali-a hazheia ngaoshiyu vah teitei sü puletao nou souloure.

²⁰Ana neletao nou Khrista vanou sübüa doulou moe!

²¹Veimosoua neletao nou puh vanou chouloure, alia puh thaifümaitao soua Jisu hi acheche buyu nasü neletao hi doupeire.

²²Südonou neletao vei hrü akunahi buyu zhai ea madayu ke-zhe züpa thaifüa souhao-soushiyu neletao vei hrü akunasü thaowuwo.

²³Neletao le ea tsüsü teiteinou sou ashu vuzüwulai,

²⁴alia acheche vuzüyu ea sheeyu hinou Ramai vei zhu rai-a soupeikhai touyu zhai ashu nasü banoulo.

²⁵Südonou madayu sü thaowu-a mai hrülainou lah lahvei kinapamai hisü chichenou pha-kukhaio, daiolouzü Eletao hrülaisü Khrista vei pfüphao hinou vasou ali baie.

²⁶Neletao nou raroubukhaia mah souwuso, alia neletao nou rarouyu hisü panou teinghiye louwuso.

²⁷Rashinahi teile zhou-avei peiwuso.

²⁸Avaomai nanou vaopu khaiso, ana puhnou toure hamaiye soukha peiloure donou lah puh bahnou vah avei taosü te-a souloukhaio.

²⁹Neletao mü hinou chi-lashi paopawuso, anou nelenou paoyu sünanou keia buyu maitaohi avei soupei loure donou teile kao-zhou zhua soudu papei loure chi sütaonou paolouwo.

³⁰Alia Ramai vei Rako Mashiye le souveaso, daiolouzü puh vanou neletaoye sü khailupapei laiyu teitheki donou paoshee soupeire.

³¹Neletao hrohinou khataoyu, züsüyu, rarouyu, shusoua züvayu, maichi paoshiyu ea maiye ngaoba-ngaoshiyu teiteisü thaokhaiwuwo,

³²alia Khrista vanou Ramai nou neletaoye khaipeiyu sübüa neletao alinou liye khuhao-a ea zhuvea leshi peia alinou li mah khaipeikhaio.