Read Poumei Naga PHILIPPIMAI 4 Bible Online

PHILIPPIMAI 4 - Poumei Naga bible

PHILIPPIMAI 4

¹Südonou Athaihou jürai khemai, Enou neletaoye daizhozhou leshisa ea neletaoye vedao loure daizhozhou zhia busa! Neletao nou Eye daizhozhou souvapeisa, alia neletao vanou Ehai daizhozhou khaophu sousa! Südonou leshiyu thaihou jürai khemai, haibüa neletao vei hrümaihai Mapaowo hinou latouloua buvuzülai.

²Enou Eudia ea Suntikhi ye Mapaowo hinou alinou liye aetoupeio tea khokhai khokhaiwe.

³Alia Eye koa cheche-a kou pfüzhoyuna ne-a naotumai haitaoye soukha peikhaio tea Enou khowe; daiolouzü puletao nou Ko Aveina paodou loure donou E, Klement ea Ramai vei ahrimai larübvühi zhih rüthou khaitouyu kukhe Eye koa vah soumaitao hrülaiye koa te-a vah soue.

⁴Teisanou Mapaowo hinou lesalo, haisü Enou paopu khaiwe: lesalo!

⁵Mai hrülaiye panou neletao vei shameayu sü süloukhaio. Mapao thashoa laire.

⁶Hatali donou dowuso, ana hateitei hinou kalo paoyu noupu veachi pao-a ea kho-a neletao vei akho pfüphousü Ramai hi süngaokhaio.

⁷Alia tsü süyu teitei jünou koushoyu Ramai vei kaonayu sünanou Khrista Jisu ye koa ali soulouyu hinou neletao vei tsü-lesü khotou peiloulai.

⁸Akhai hinou Athaihou jürai khemai, checheyu teitei, tsükhoulou veiyu teitei, züyu teitei, sheeyu teitei, zhaivei shoyu teitei, zhuvea peiyu teitei, veishoyu hatali bue toulouzü, paosho züyu hatali bue toulouzü, na haitao vanou chotou loukhaio.

⁹Neletao nou Ahinou doulouyu, ngaolouyu, choulouyu ea nghithou nou ngaolouyu sütaosü soukhaio; alia kaonayu Ramai nou neletaoye koa bupeilai.

¹⁰Enou Mapaowo hinou le sashowe, süolouzü chuo akhai hinou neletao nou Eye donou chopu peiwure; chechenou neletao nou Eye donou dopeie, ana neletaoye donou teile zhou aveisü hae.

¹¹Eye donou moshilaiyu buyu vanou haisü Enou paomoe, daiolouzü Ahi buyu sünanou khra-a buloure sü Enou douloure.

¹²Enou kabüa hazhia moa alaosou bua hrülai touyu-a süwe. Buh tali kinou ea teile tali hinou Enou pou phou-a buyua, hou-a buyua moa alaosou buyua, chelouhoa buyua, khra-a buloure kheitsü nasü Enou douloure.

¹³Eye soukhou peiyu Khrista puh vanou Enou ha teitei soulousüe.

¹⁴Ana Enou veahoyuki neletao nou koa zha ngaozhopei-a veitoua soupeire.

¹⁵Alia Philippi maitao, Ko Aveina paodou shuraihi Enou Makedonia thaowu-a tayuki kukhe lüloumaime talia Eye koa peiyuhi-a, ngaoyu hi-a zha ngaozho moe, neletao likhei baie touyu sü lah neletao nou süwe;

¹⁶daiolouzü Enou Thessalonika hinou soukha peiyuhai moshilai-a bubuki neletao nou Ahi lüh ali jünou koua süsü seive peie.

¹⁷Süsü Enou sapeina nasü züpashoa phouyu nou moe; süjüwo, neletao vei thou-sha pei hi zhiyu thoupuyu sü Enou phouwe.

¹⁸Enou ngaochekhou loure ea kouh-lih-a ngaoloure! Chuo Enou moshilaiyu teiteisü buchekhou loure süolouzü neletao vei sapeina veishisü Epaphroditas nou Ahi povepeie. Sütaosü Ramai hi kai nüveiyu na pothoyu, puhnou polou veiyu ea züpayu posheelana nasüe,

¹⁹alia Aramai nou neletao vei moshilaiyu teiteisü khouko ava hinou puhvei kini alao buyu süna thaifüa Khrista Jisu hinou peiloulai.

²⁰Chuo Eletao Ramai ea Puo hi teisanou paoshoyu souloutheo! Teisanou! Amen.

²¹Khrista Jisu hinou sheeyumai hrülaiye sasa-a khurüpeio. Eye koa buyu thaihou jürai maitao nou neletao hi khurüyu chidoh seiwe.

²²Sheeyumai hrülainou, koulihsoua Kaisar kikha mainou neletao hi khurüyu chidoh seiwe.

²³Mapao Jisu Khrista zhuvea nou neletao hrülaiye koa buyu sü souloutheo.