Read Poumei Naga KOLOSSEMAI 1 Bible Online

KOLOSSEMAI 1 - Poumei Naga bible

KOLOSSEMAI 1

¹Ramai leli hinou Khrista Jisu vei sei-atamai ali soulouyu Paul ea Eh thaihou jürai Timothi hinou —

²Kolosse hi buyu Khristaye koa ali soulouyu hinou cheche-a Eh thaihou jürai soua buyu Ramai vei maitaohi rüwe: Ramai Eletao Puonou neletao hi zhuvea ea kaonayu peiyu sü souloutheo.

³Ehnou neletaoye donou veachi paoyuki, Eletao Mapao Jisu Khrista Puo Ramai hi teisanou kalo paowe.

⁴Daiolouzü Ehnou Khrista Jisu hi neletao vei lü buyu ea Ramai vei mai hrülaiye neletao nou leshiyu sü chouloure.

⁵Raikai-a neletao hi acheche chipao, Ko Aveina velouyu kisü, neletao nou sünanou pei-a buyu areihna vanou chouloure. Südonou neletao vei lü ea leshisü neletaoye donou raki hinou pokukhai touyu neletao nou rei-a buyu süna vanou soushupa khaitoua bue.

⁶Neletao nou Ramai zhuvea choulou raiki ea süsü chechewe tea sülourai kihinou shua neletao hronou buyu büa, Ko Avei nanou thaokhaimoa ha pove peiwe ea süsü deiphao teiteihi-a paodoupoa tawe.

⁷Neletao nou Ramai zhuveasü Eletao süh Khrista vei acheche vah soumai soua buyu Eletao nou koa qila soua laiyu leshiyu Epaphras hinou süloure.

⁸Puhnou Eletao hi Rakonou neletao hi peikhai touyu leshi süna vanou paongao peiwure.

⁹Qo haina vanou, Ehnou nele vanou choulourai hinou shua neleye donou teisanou veachi paowe. Ramai vei Rakonou pei-a buyu ratsü teitei ea hatali sülousüyu tsü sütaoye koa neletao hisü puhvei leli tsü sünanou phoupei-a buloure donou Ehnou Ramai hinou khowe.

¹⁰Süthaisü neletaosü Mapao vei züpa thaifüa hrülou süe ea teisanou puh züpa vah taonou soubailai. Neletao hrümai hinou vah aveivei shithou teiteisü shilai, alia neletaosü Ramai vei tsüna hinou dushu loulai.

¹¹Neletao nou shameayu noupu ha teiteisü teisanou shameapoa buloure donou, neletaoye sü puhvei avavei khouko hinou veyu achaa sütao teiteinou soukhou peiyu souloukhaio.

¹²Ramai nou puhmaitaoye donou avavei vedei hinou khaida khaitouyu sü neletao zha ngaoloure donou neletaoye ngaozü doumai soupei khaitouyu Puo puh hi sasa-a kalo paokhaio.

¹³Puhnou Eletaoye teizhivei khouko hinou khaipa peiwure ea Eletaoye podave puhvei leshiyu Nahpoutu vedei hi khaipeire,

¹⁴puh vanou Eletaoye mado soupeire, süolouzü Eletao vei mah taosü khaipeire.

¹⁵Khrista hai nghithounou ngaomoyu Ramai puhvei zhuraiwo nasüe. Puh hai basha teitei jünou dukayu nah naraiwo süe.

¹⁶Daiolouzü puh vanou raki ea deiphao hi buyu, ngaoyu ea ngaomoyu natao, süolouzü rako hilovei khoukotao, paopumaitao, teidei khomaitao, alia peicha maitao-a loua, ha teiteiye sü Ramai nou soupeie. Puh vanou ea puhye donou Ramai nou teideiphao teiteiye sü soupeie.

¹⁷Na veishi jühinou Khrista hai bue, alia puh hinou na veishiye sü paimupoa bue.

¹⁸Puhnou puhvei pfüphao, lüloumaivei pei nasüe; puhnou shurai nasüe, athai hinou naraiwo nasüe, sübüa puhnou ha teitei hinou raikhana soulai.

¹⁹Daiolouzü Nahpoutu nou lah puh hi Ramai zhai chekhoua buyu sü Ramai puhvei leli nasüe.

²⁰Südonou Nahpoutu vanou Ramai nou teideiphao teiteiye sü lah puhye koa chavei loure donou le laloure. Ramai nou puh Nahpoutu vei kros vanou thaiyu athai süna vanou kaonayu pove peire ea sübüa deiphao hi ea rakihi buyu na teiteiye sü lah puhye koa sou chavei peiwure.

²¹Teile lihisü neletaosü Ramai hinou doua bue ea neletao vei ashi vah ea ashi tsü sütao vanou puhvei ngaoba maitao soua bue.

²²Ana chuo, puh Nahpoutu pfüzho hilonou thaipeiyu athai süna vanou, neletaoye sheetou-a, chaalia ha-a, alia mah dukhaire ali-a hazhi-a puh nghojü hi pove khaire donou Ramai nou neletaoye puh samaitao soupeire.

²³Ovai, neletao nou lü hinou tobai soumoa, lü khaimoa ea latoupoa buvuzülai, alia neletao nou Ko Aveina choulouyuki ngaolouyu areih süna hinou lah neletaoye panou tala tayu sü aetou peiwulaimoe. Deiphaomai hrülaihi paodouyu Ko Avei haina vanou Paul Eye-a ku-vahmaili soupeire.

²⁴Alia neletaoye donou Enou veaho-a buyu hisü chuo Enou lesa loure, daiolouzü Apfüphao hinou veaho peiyu süna vanou Khrista nou puhvei pfüphao, lüloumaime süh soua veaho peiyu hi chelou moyusü panou cheloure donou Enou soukha peiwe.

²⁵Neletao veiloure donou vah haina souloure Ahi peiwuyu Ramai puhnou Eye lüloumaime vei kilai ali soupeie. Vah hainasü puh chipao chekhoua paodou loure sünasüe,

²⁶chipao haisü puhnou tala tayu maihrü teitei hi emai hrülai nghojünou poku khaitouyu kheitsü sünasüe ana chuo süsü puh maitao hi popa ngaopeiwure.

²⁷Ramai nou soudawuyu süwo louzü puhnou maikhemai hrülai donou khaikhai touyu toure nishoyu ea vashoyu puhvei kheitsü hainasü puhmaitaohi süngao peiyu süsüe. Alia kheitsü sünawo louzü neletao hi buyu Khrista süsüe, süvei kowo louzü neletao-a Ramai khouko ava hisü koa zha ngaozholai.

²⁸Südonou Ehnou maikhemai hrülaihi Khristaye paodouwe. Ehnou mai aliliye Khrista hinou licheyu maitao soua Ramai nghojühi save khaipeire donou ratsü teitei noupu puletaoye tukhapei-a doupeiwe.

²⁹Vah hainasü souche loure donou Khrista nou peiyu ea Alekhe hinou vah soua buyu chihshoyu khouko süsü sei-a Enou tewe ea nghojülo hukouwe.