Read Poumei Naga KOLOSSEMAI 2 Bible Online

KOLOSSEMAI 2 - Poumei Naga bible

KOLOSSEMAI 2

¹Enou neletaoye donou, Laodikia hi maitao donou ea Azhu ngaomoyu puletao hrülai donou daizhozhou te-a vah sousa touyu sü neletao hi paongaolai.

²Haisü Enou puletaoye panou khuveisho loure donou ea leshi hinou alinou liye paimu loure donou soue, alia sübüa sücheche-a sülouyu nanou poveyu latou louyu vei kini teiteisü buloulai. Sübüa puletao nou Khrista puh baiyu Ramai vei kheitsü nasü süloulai.

³Puh hai Ramai vei ratsü ea tsüvei pokukhai touyu kinou teitei houpa peiloure khareih nasüe.

⁴Maitalinou neletaoye madayu chipao nou lalou more donou chi haisü Enou neletao hi paowe.

⁵Daiolouzü pfüzhonou neletaoye koa Enou bumo khaia-a, rako hinou Esü neletaoye koa bue, alia neletao nou veishoa koa buyu ea Khrista hinou neletao lü latoua buyu sü ngaoloua sawe.

⁶Südonou neletao nou Khrista Jisu ye nou Mapaowo süe tea polouyu donou, puhye koa ali soua hrülai.

⁷Neletaoye doupeiyu sübüa neletao maasü puh hi tsüloulo, puh vanou neletao hrümaisü soushu palo, alia neletao lüsü khoupu palo. Alia kalo paoyu nou phoupeia bulo.

⁸Südonou Khrista hinou moa emainou doupeiyu zhai hinou shoshonou lapoa kouyu ea teideiphaoye tukha sahrüyu rakotao hinou vebaiyu emai tsüvei muh hayu dokaina vanou maitaliye panou neletaoye kilai souwuso.

⁹Daiolouzü, puhvei emai hrü hisü, Ramai zhai teiteisü buchewe,

¹⁰alia puhye koa ali soulouyu hinou neletao hisü phoutaopfüa buyu ahri nasü peiwure. Puhnou rako hilo paopumai ea peichamai hrülai vei peichawo nasüe.

¹¹Khristaye koa ali soulouyu hinou neletaoye hee rode peiwure, süsü emai bahnou hee rodeyuna moe, ana mah pfüphao hainavei khouko hinou do soupeiwuyu Khrista nou hee rode peiyu sünasüe.

¹²Daiolouzü neletao nou dzükhao dalouyu kisü, neletaoye sü Khrista hinou povuwure, alia dzükhao dayu hinou Khristaye athai hinou souhrishu peiyu Ramai puhvei chihshoyu khouko nou neletao vei lü vanou neletaoye-a Khristaye koa souhrishu peiwure.

¹³Neletaosü teileli hisü neletao mah vanou ea neletaosü razhai hayu tahrüh kukhemai baiyu donou rako hilonou thaie. Ana chuo Ramai nou neletaoye Khristaye koa ahri hi pove peiwure. Ramai nou Eletao vei mah pfüphou hai khaipeire;

¹⁴zhai thaifüa Eletao pei hi motoua phukhai touyu raiphu süsü puhnou pheipa peiwure; haisü puhnou kros vanou veatheawu-a souhare.

¹⁵Alia kros süna vanou Khrista nou lah puhye rako hilo paopumai ea peichamaitao khouko hinou do soupeire; alia puhnou kolouyu hinou puletaoye popa dua sou ahrao peiwure.

¹⁶Südonou maitaliye panou neletaoye touso vanou moa kho-nüh reiyu vanou moa Khou Ashu reiyu vanou moa Soteithe reiyu vanou chi kuwuso.

¹⁷Haitao teitei hai thaikhai hi vere nataovei khu baie; chekhaoyu nawo louzü Khrista baie.

¹⁸Maitaliye panou puletao vei zho veishoa ngaowe touyu vanou, alia khao-zhai hinou natai-a hrüyu hrü vanou ea rakivamaiye thoyu vanou neletao vei khailu louyu vei buu nasü saopoa tayu souwuso. Daiolouzü ko lia hazheia haibüyu mainou puletao vasou vei tsüdo hinou khaophu souwe,

¹⁹alia pfüphao vei peina soua buyu Khristaye poa buyu sü thaowure. Khrista vei kharokhe hinou pfüphao teiteisü soudupa peiwe ea süna boutao ea soura taonou paimupoa bue, alia sünanou Ramai puhnou panou dushu nüyu thaifüa dushuloue.

²⁰Neletaowo Khristaye koa thaiwure ea neletaoye sü teideiphao vei paopumai souyu rakotao hinou do soupeire. Sükulouzü neletao daidonou deiphao haina vei maibüa hrüwe? Neletao daidonou haibüyu zhaitao sü züwe; süolouzü

²¹“Seiso, chiso, deiso?”

²²Zhai haitao teiteisü teile lihi tayu ana chuo hakobaiyu zhaitaoye paowe; sütaosü emainou souyu ea doupeiyu zhaitao baie.

²³Ovai, nutai-a panou rakivamaiye thoyu, khaozhai hinou natai-a hrüyu ea pfüphaoye tudei-tukhayu zhai haitaosü emai vei tsüdo hinou soushuloue: ana zhai sütaonou pfüphao vei züpa naye khaloure halia koyu hae.