Read Poumei Naga 1 THESSALONIMAI 3 Bible Online

1 THESSALONIMAI 3 - Poumei Naga bible

1 THESSALONIMAI 3

¹Südonou Ehnou neleye daomoa buyu hisü shamea louho vuzüyu kisü Ahai lahnou Athens hi buyu nanou veibailai tea Eletao nou chokouloure,

²alia sübüa neletaoye lü hilonou soutsü peiloure ea neleye le soudu peiloure donou Ehye koa Khrista vei Ko Aveina paodoua laiyu Ramai kilai Eh thaihou jürai Timothiye Ahainou seivewe,

³süolouzü souveayu haitao vanou neletao maitalia thaikhaitawu laimoe. Daiolouzü sükua souveayu hai Eletaoye donou Ramai nou souda khaiyu alie touyu hai neletao lahnou süwe.

⁴Daiolouzü Ehnou neleye koa bubuki hinou Eletaoye souvea vuzülai tea raia Ehnou nelehi paopeire; alia neletao nou süa buyu sübütoua paloure.

⁵Moshilaiyu ko haina vanou Enou shamea louho vuzüa neletao vei lü nasü süloure donou Enou Timothiye seivewe, daiolouzü bo ali hilonou rashi nanou tave neletaoye thaoloua Eletao nou te-a vah soukhai touyu teiteisü raoha bailai moma touyu sü Enou ngaopiwe.

⁶Ana chuo Timothi hai khaivere ea neletao vei lü ea leshina vanou sashoyu ko nasü Eh hi pove peie. Puhnou Eh hi nelenou Ehye donou tobai soumoa leshishoa choa bue alia Ehnou neleye daonüshoa buyu kua nele-a Ehye dounüshoa bue touyu kosü Eh hi ve paongao peie.

⁷Südonou, thaihou jürai khemai, Ehvei kao-ashi ea vea-hoyu veishi hinou Ehye sü nele vanou neletao vei lü nanou le soudupeie;

⁸daiolouzü neletao nou soutaosoua Mapaowo hinou la-a buloure toulouzü, chuo Ehsü chechenou hria bure.

⁹Ehnou nele vanou Eletao Ramai nghojünou sashoyuna ngaolouyu sütao teitei vanou kalo kazhou koute Ramai hi peilou sülai.

¹⁰Ehye panou zhu kheihao-a tave neleye daoloure ea nele lühi chemoa buyu taosü peiloure donou Ehnou Ehle teiteinou khei-hea puh hinou khoa bue.

¹¹Eletao Puo Ramai puhnou ea Eh Mapao Jisu nou Ehye panou nelehi veloure du nasü souda peiyu souloukhaio!

¹²Ehnou neleye leshishoyu süzhou Mapao nou neleye panou alinou liye leshiyu ea maikhemai hrülaiye leshi pulailaiyu souloukhaio.

¹³Haibüa puhnou neletaoye soutsü peilai, alia Eletao Mapao Jisu nou puhvei sheeyu maitao hrülaiye koa veyu kisü Eletao Puo Ramai nghojünou neletaosü liche loulai ea sheeloulai.