Read Poumei Naga 1 THESSALONIMAI 5 Bible Online

1 THESSALONIMAI 5 - Poumei Naga bible

1 THESSALONIMAI 5

¹Ana thaihou jürai khemai, neletaoye donou sütaosü duki palaisa touyu teithe moa khou-teilena vanou panou nelehi rüvepeire matsü moe.

²Daiolouzü neletao lahnou sütoua bue, süolouzü Mapao vei teithe hai kheikou hinou avaomainou veyu sübüa velai.

³Maikhe mainou, “Kaona-a bure ea kao-zoushi hare,” tea paoyu teile sühinou naotu mainou nah nare kihi khya soungha palouyu büa sükhaimoa ha-kayu sü puletao pei hi velai, alia sükisü maitalia tupalou laimoe.

⁴Ana thaihou jürai khemai, neletaowo teizhihi bumoe, alia teithe sünanou avaomaili büa neletao hi panou sükhaimoa pawu laimoe.

⁵Daiolouzü neletao hrülaihai ava ea heakovei nahmaitaoe. Eletaowo khei moa teizhihi buyu mai moe.

⁶Südonou kukhemai büa Eletao zhia buwulai mokhe, ana Eletaowo zhaihe-a ea leikei-a bulaikhe.

⁷Daiolouzü zhiyu maisü khei hinou zhiwe, alia zhaoh shozhiyu maisü khei hinou shozhiwe.

⁸Ana Eletaowo teivahi buyu maitaoe, alia leikei-a buvu zülai. Eletao nou lü ea leshi hai reih khao-kha, alia khailu peiyuvei areih nahai reih peirü büa rülou vuzülai.

⁹Daiolouzü Ramai nou Eletaoye puhvei rarou nasü ngaoloure donou doloumoe, ana Mapao Jisu Khrista vanou khaipeiyu nasü ngaoloure donou doloubaie.

¹⁰Eletao nou kai-a bu-a, zhi-a bu-a puh veyu kisü Eletao sü puhye koa hrüre donou puhnou Eletao donou thaipeire.

¹¹Südonou neletao nou chu-a soua buyu büa neletao alinou liye le soudupeia ea soukhapeia bulo.

¹²Ana thaihou jürai khemai, neletao hrohinou te-a vahsoua buyu maitaoye ea Mapao hilonou neletaoye süthaipeia doupeiyu maitaoye tsükhou loure donou Ehnou khowe.

¹³Puletao nou soua buyu vah süna donou leshi hilonou puletaoye kushoa tsükhou peikhaio. Lah neletao hrohisü kaona-a buloukhaio.

¹⁴Thaihou jürai khemai, vah souhi-a bumaiye paodou peire, le vea-a bumaiye souva peiloure, lelouho maiye soukha peiloure ea maikhemai hrülaiye koa shamea peiloure Ehnou neleye süpeiwe.

¹⁵Neletao maitalinoua ashinaye donou ashinanou pao rülou more zhuloukhaio, ana teile veishi hinou alinou lihi ea maikhemai hrülaihi avei soupeire donou phoukhaio.

¹⁶Phabusa nou salo,

¹⁷tobai soumoa veachi paokhaio,

¹⁸teile veishi hinou kalo paokhaio; daiolouzü haisü Jisu Khrista hinou neletaoye donou Ramai leli nasüe.

¹⁹Rako Mashiye sounghiwuso;

²⁰rachi paolayu sü ngaophou moyu souwuso.

²¹Ana ha teiteiye sü zhai zhukhaio; avei nasü potouloukhaio,

²²alia ashi zhai teiteisü thaowuwo.

²³Eletaoye kaonayu peiyu Ramai puhnou neletaoye ha teitei hinou soushee peikhaio, alia puhye panou Eletao Mapao Jisu Khrista veyu kisü neletao rako, hrirai ea pfüphao teiteisü veishoa ea chaa ha-a khaipeiyu souloukhaio.

²⁴Neletaoye kulouyu puhsü louche louveie, alia puhnou süsü soupeilai.

²⁵Thaihou jürai khemai, Ehye donou veachi paopeikhaio.

²⁶Sheeyuvei mü mupeiyu sünanou thaihou jürai khemai hrülaiye sasa-a khurü peikhaio.

²⁷Seiko haina hai thaihou jürai khemai hrülai nghojühi phoungao peio tea Mapaowo zhih hinou Enou neletao hi khowe.

²⁸Eletao Mapao Jisu Khrista vei zhuvea nasünou neletaoye koa buyu sü souloutheo.