Read Poumei Naga JOSHUA 1 Bible Online

JOSHUA 1 - Poumei Naga bible

JOSHUA 1

¹MAPAO kilai Moses thaiyu thai, Nun nahpoutu Joshua, Moses ye soukhana, puh hi MAPAO nou paoe,

²Avei kilai Moses hai thaire, südonou chuo tashulou-o, Jordan tachopalouo, ne alia mai haitao teiteinou, Enou puletaoye peilaiyu teideisü, Israel maitao hi peilaiyu dei hisü.

³Enou Moses hi paokhai touyu thaifüa, nemai taono talou phiheayu teiteisü nemaiye peiwure.

⁴Vaohro alia Lebanon hinou rei aduna hi koute, Ephratis rei, Hit mai teidei teitei alia zaidu hinou teinghi loulova hai neletao vei teidei souwulai.

⁵Enou Moses ye zopeiyu büa, nea zopeilai; mai linoua ne hria bukisa ne nghoujü hinou lalou laimoe; Enou ne hi vetemoyu soulai moe alia neye thaowukhai toulai moe.

⁶Khouchilo alia khuveilo; daiolouzü neletao puopao hi Enou peilai teanou chaachou soukhai touyu teidei nasü, neye panou mai haitaoye salou dei nasü kathao loulai.

⁷Khouchilo alia khuvei sholou-a baio, leikei-a soulo Akilai Moses nou ne hi kharochi peikhai touyu chikhatao hai; nenou butaraki veyuma pahvei sü ngaoloure donou, sühinou bakha zhoulaoa mokhai-a bakha nalao reitawuso.

⁸Chikha larübvü haina hai ne mü hinou ralaimoe, ana hea-khei sühinou li-a cholai, haihi rüthou khaitouyu thaifüa talouzü nenou vapu khelai alia veiloulai.

⁹Enou ne hi kharochi peiwe, “Khouchilo alia khuh veilo; ngaopiso, mokhai-a lüa kouwusou, daiolouzü nenou tayu buliki nevei Ramai MAPAO nou neye koa salai peilai.”

¹⁰Süthai peikho maitao hi Joshua nou kharochi peie,

¹¹Neletao nou chaoyu buh hi sünou takhai-o, alia maisou hisü haibüa kharochi peio, “Neletao touso soudalo, daiolouzü neletao Ramai MAPAO nou peiyu teidei nasü talou poloure donou teithe asü levainou Jordan rei tacho palai.”

¹²Joshua nou Reuben, Gad alia Manasseh khü dahli hi paoe,

¹³“MAPAO vei kilai Moses nou neletao hi haibüa kharochi peiyu nahai lilou-o, Ramai MAPAO nou neletao ye pa sholoure buh peilai, alia dei sünasü neletaoye peilai.

¹⁴Moses nou neletao ye peikhai touyu Jordan rei dapolo deihi neletao chapfümai, nahmaitao alia kikhaorü taohai khaiwulai; ana sou-reih soulou süyu mai hrülai nou reihna pfülou-a neletao chapfü-nahmai nghoujünou rai-a talai alia puletaoye soukhalai.

¹⁵Neletao Ramai MAPAO nou peilai tea paohkhai touyu teidei nasü lou poloumo koute neletao tyahrü alia neye pa soyu peimosa puletaoye soukhalai-e. Süthainou neletao nou nemai vei dei nahisü dakhai talai alia MAPAO vei kilai Moses nou neletao hi peiyu Jordan teinghi palo dei hisü neletao nou poloulai.”

¹⁶Puletao nou Joshua hi chila peie, “Nenou Etao hi kharochi peiyu pfüphou Etao nou soulai, alia butaraki nenou Etaoye seitayu hisü etao nou talai.

¹⁷Etao nou Moses chi züyu büa etao nou ne chi-a zülai; Moses ye Ramai MAPAO nou kozo peiyu büa ne-a kozo peilouzü chebaie.

¹⁸Ne chi züba-a neye mai tara linoua dulouzü mokhai-a nenou peikhai touyu kharochi zübayu maiye sü southawu bailai. Khouchilou-o alia khuvei louzü chebaie.”