Read Poumei Naga JOSHUA 10 Bible Online

JOSHUA 10 - Poumei Naga bible

JOSHUA 10

¹Jerusalem hi veo Adonizedek nou Joshua alia Israel mai nou Ai mai teidei poloua sühi veo ye southawuyu alia Jeriko mai veo hi kabüa soupeie touyu, süthaisü Gibeon hi hrüa buyu mainou Israel maiye chavei louyu kotao süloukhaie,

²Puhsü ngaopisholoure, daivanou toulouzü Gibeon maivei teidei hai veo mainou buyu nuhdu ali-e, Ai maivei nuh jünoua dupu hie, alia sühi buyu maitao hai sou-reih souvei shoyu mai khaitoue.

³Südonou Jerusalem hi veo Adonizedek nou Hebron veo Hoham, Jarmuth veo Piram, Lakhish veo Japhia alia Eglon hi veo Debir hi haibüa nou chi paotae,

⁴“Tave eye soukhapeio, Etao koa Gibeon maiye reih soulaishe; daiolouzü puletao nou Joshua alia Israel maiye chavei loure.”

⁵Süthaisü Amor vemai angou taonou - Jerusalem hi veo, Hebron vei veo, Jarmuth veo, Lakhish veo, alia Eglon vei veo; puletao nou me zholoua reihmai saloua nou Gibeon maiye reih soure donou tare, alia reihsü soure.

⁶Gibeon mainou Joshua nou fühao soua buyu Gilgal hi haibüa chi pao vere, “Ne kilai etao ye thaopeiwu souo, etao ye tave vupeio, alia soukha peio; daiolouzü deichi hinou buyu Amor vemai hrülai nou koa zholoua etao ye reih soure.”

⁷Südonou Joshua nou reihmai hrülai ye sü saloua Gilgal hinou tashu tare.

⁸MAPAO nou Joshua hi paoe, “Puletao ye ngaopi souo, daiolouzü Enou puletao hai ne bah hi peiwure; puletao nou nele ye hakilia dulou hoe.”

⁹Südonou Joshua nou puh mai taoye kheinou sa-a Gilgal hinou Gibeon hi sapaloue, alia puletao nou Amor mai nou tsücho khaimoa buhinou reih souloure.

¹⁰Israel mai nghoujü nou MAPAO nou puletaoye sü khuh peipawure, alia Israel mainou puletao ye Gibeon hinou alao southawure, alia Beth-horon ludu hinou ngoushia Azekah alia Makkedah hi koute puletao ye southa koupeie.

¹¹Israel mai nghoujü nou puletao nou tushia Beth-horon deishao hi kouhkhaie, MAPAO nou Azekah teidei hi koute reithou nou pa rükouh mai alao ye deithapeie. Israel mainou puhtao ye southa jünou reithou nou kouh deithayua mai pousho hie.

¹²Amor maiye MAPAO nou Israel mai hi peiyu teithe, Joshua nou Israel maisou nghoujü nou MAPAO hi haibüa paoe, “Teinghi, ne Gibeon pei hinou lükhai tousou-o, Khouh, ne-a Aijalon deikho hinou tasou-o.”

¹³Puhmai taonou ngaoba maiye southakhai loumo koute, teinghia lükhai more alia Khoua tamoa chaobaie. Sühai Jashar Larübvü hi rüthou khaitoue. Teinghia lükhaimoa teipei nou chaore, alia süzhou teithe hai teinghi loumoa shore.

¹⁴MAPAO nou deiphao mai chi züyu hai daohdaonou chukoute haibüyu teithe ali-a ngao mohie; süzhou daisounoue toulouzü MAPAO nou Israel mai ye donou reih soupeiyu donoue.

¹⁵Süthaisü, Joshua alia puhvei reih mai teitei hai Gilgal fühao hi dakhai kouh tare.

¹⁶Amor hi vemai angou taohai tupa loua nou ve Makkedah chuh qulu hinou tuchüa bue.

¹⁷Süsü kamai nou ngaoloua tave Joshua hi paopeie, “Vemai angou taohai Makkedah chuh qulu hinou tuchüa buyu hai ngaoloure.”

¹⁸Joshua nou paoe, “Chuh qulu mü hisü chuh nou dathou khawuo, alia sünasü khore donou mai khaiwuo;

¹⁹ana neletao sühi chaomoa nou ngaoba maiye thaihu takhaio, puletao thailo nou husha koukhaio. Puletaoye pa mai aliro nuhdu hisü louwusouo, daiolouzü Ramai MAPAO nou puletao yesü neletao bah hi peiwure.”

²⁰Joshua alia Israel mai nou puletaoye sü southa showure, puletao nou southa loumoa shopeiyu hai nuh khevai nou tuchü loua buyu mai chitah baie, mai poulolouzü Joshua alia Israel mainou southawure.

²¹Süthaisü Joshua ae puhye satayu mai ali-a kaozhoushi daomoa puletao vei fühao Makkedah hisü khaiveloue. Sühi buyu mai ali noua Israel mai pei hi raomoe.

²²Süthai Joshua nou paoe, “Chuh qulu hinou vemai angou tao ye mü hokhai touyu nasü houloua ahi saveo.”

²³Chuh qulu hinou tuchüa buyu Jerusalem, Hebron, Jarmuth, Lakhish alia Eglon vemai angou taosü vakou sapaloua Joshua hi save-e.

²⁴Vemai angou taohai Joshua hi saveyu phaki, puhnou Israel mai teiteiye kuve jülou-e, alia puhye koa tayu peikho maitao hisü paoe, “Haihi koulo, alia vemai taoye sü phinou tehi taikhaio.” Puletao nou tanghi kouloua vemai taoye sü phinou tehi taie.

²⁵Süthaisü Joshua nou puhtao hisü paoe, “Ngaopiso, mokhai-a lekhaiwuso. Khouchilo alia khuveilo, daiolouzü MAPAO nou neletao ngaobamai teiteiye sü haibüa nou soupeilai.”

²⁶Süthai Joshua nou vemaitao ye sü southawure alia süübe angou hinou rainou daokhaiwure, puletao thaiphao hai teinghi loumo koute sühinou daokhaie.

²⁷Teinghi loutayu phaki Joshua nou lüpeia puletao thaiphaosü süübe hinou pokouh loure, alia puletao nou tuchüa buyu chuh qulu hisü pove laithouwure, alia chuh dutyanou chuh qulu müsü khawure, alia süsü chu koutea bue.

²⁸Joshua nou süzhou teithe hinou Makkedah teidei polouwe alia puhnou sühi veo alia nuhmai hrülaiye sü southawure; mai alikheia shomoa souha khaitouwure. Puhnou Jeriko veo hi souyu zhaibüa Makkedah veo hia soupeie.

²⁹Süthaihai Joshua alia Israel mainou Makkedah hinou poa Libnah hi kouloue, alia sühi reih souloure.

³⁰MAPAO nou nuh sühi buyu veo-a Israel mai bah hi peie; alia puletao nou sühi hrüa buyu mai teitei yesü khoche nou daotha khaiwure. Israel mainou Jeriko veo hi souyu bütou teanou sühi veo pei hia soupeie.

³¹Joshua alia Israel mainou süthai hai Libnah hinou tapoa Lakhish teidei hi veloue, alia nuh süna-a reih soua poloure.

³²MAPAO nou Israel mai ye pa Lakhish jünou veilouyu peie, puletao nou teithe ahai hinou poloue, alia sühi buyu mai hrülai yesü Libnah hi soupeiyu zhaibüa khoche nou daothakhai touwure.

³³Gezer hi veo Horam nou ve Lakhish ye reih soukhae; ana Joshua nou puletao hrülai yesü southakhai touwure.

³⁴Süthaisü Joshua nou Israel mai teitei yesü sa-a Lakhish hinou Eglon teidei hi vere, alia puletao nou nuh süna hai sühaolou-a poloure.

³⁵Puletao nou süzhou teithe hinou reih veiloua poloue. Puletao nou Lakhish hi souyu büa sühi buyu nuh mai hrülai yesü khoche nou daotha khaiwure.

³⁶Süthai Israel mai teitei ye Joshua nou sa-a Eglon hinou Hebron maivei teidei hi veloue; alia sühi reih huloue.

³⁷Puletao nou nuh sünahai poloue, alia sühi buyu mai hrülai yesü, mai aliro shopei moa nou veo noupu khoche nou daotha khaiwure. Eglon mai hi souyu zhaibüa nuh sühi buyu mai teitei yenou souha khaiwure.

³⁸Süthaisü Joshua nou Israel mai teitei ye sa-a nou Debir hi dakhai kouh nuh sünahai reih souloue.

³⁹Puhnou teidei süna hai nuhdu taoli loua nou poloure, alia sühi buyu mai teiteiye nou southa khaitouwure. Puletao nou Hebron alia Libnah vemai ahai hi soupeiyu büa Debir alia sühi veo hia soupeie.

⁴⁰Joshua nou teidei haitao teitei veiloue, deichi hinou buyu nuhtao alia teinghi loulova buyu Negeb deichi philo, deichi nyayutao, alia sütao hinou veo soua buyu mai teitei jünou veiloue; Israel maivei Ramai MAPAO nou kharochi peikhai touyu thaifüa, puhnou mailiro shopei moa nou mai hrülaiye sü southa khaitouwure.

⁴¹Joshua nou reih veilouyu hai Kadesh-burnea hinou Gaza hi koute, alia Goshen teidei teitei nou poa Gibeon teidei hi koute-e.

⁴²Joshua nou nuh sütao vei vemai hrülai alia puletao vei teidei teitei hai bahkha ali soua poloue, puhle Ramai MAPAO nou puletao ye donou reih soupeiyu vanou, Israel mainou veiloua baie.

⁴³Süthaisü Joshua nou dakhai tare, alia puhye koa tayu Israel mai teitei nou puletao vei fühao Gilgal hi dakhai veloure.