Read Poumei Naga JOSHUA 13 Bible Online

JOSHUA 13 - Poumei Naga bible

JOSHUA 13

¹Chuo Joshua hai tsüloure alia puh pohaia taoli khere; südonou MAPAO nou puh hi paoe, “Ne sü tsüloure alia ne pohaia taoli pare, anou neletao nou teidei popu loure alao buhie.”

²Teidei poloumoa shokhai touyu taohai haitaoe: Philistin alia Geshur mai vei teidei teitei,

³khekouh nou buyu Avvim mai teidei teitei noupu Ejipt maivei deirai hilo buyu Shihor reitou hinou poa reiloukhe Ekron mai deirai koute, sühai Kanaan maivei teideie teanou paowe; Philistin vemai angou taohai Gaza, Ashdod, Ashkelon, Gath alia Ekron hinou bue.

⁴Kanaan maivei teidei teitei, alia Me-arah (Sidon maivei teidei) hinou poa Aphek hi koute, Amor maivei deirai hi koute chua populoure bupu hie.

⁵Süthai Gabal mai teidei, teinghi palo buyu Lebanon mai dei teitei, Hermon deichi khelounou buyu Baalgad teidei hinou Hamath ludu hi kouhte-e.

⁶Sühai Lebanon deichi alia Misrephoth-Maim deichi kohinou hrüa buyu Sidon maivei teidei teitei nou louwe. MAPAO nou paoe, “Enou teidei sütao hi hrüa buyu mai hrülai yesü hulai peilai Israel mainou takouyu phaki, teidei sütao hai Enou paohpeiyu büa Israel maiye sü zhipeio.

⁷Südonou chuo teidei haitao hai Israel mai khü akü hi alia Manasseh khü dahli hi puletao vei kaalo phasoua zhipeio.”

⁸Manasseh khü dahli ye koa Reuben alia Gad mai khü ye MAPAO kilai Moses nou peiyu teidei taosü puletao nou ngaoloure, sühai Jordan teinghi palova nou bue.

⁹Puletao vei dei hai Aroer, sühai Arnon deikho kai hi koute, alia deikho touchü hi buyu nuhtao alia Medeba vei deikho hi koute, sühinou poa Dibon hi koute-e.

¹⁰Teidei haitao hai Heshbon hinou hrüa buyu Amor mai veo Shon vei nuh teitei loua nou Ammon mai deirai hi koute,

¹¹Gilead ae Geshur mai alia Maakath mai deirai, alia Hermon deichi teitei ae Bashan teitei nou loua Salakah mai vei dei hi koue;

¹²Haihai Ashteroth alia Edrai hinou ve-a buyu Bashan hi Og veo vei veteidei taoe (Rapha mai hrohinou puh likheiye shopeia baie), haitao hai Moses nou reih veiloua nou hulai louyu taoe.

¹³Ana Israel mainou Geshur alia Maakah mai ye hulai loumore; puletao nou koa Israel maiye chukoutea sa-a hrüwe.

¹⁴Levi maikhü ye Moses nou dei peimoe, daiolouzü MAPAO nou paoyu thaifüa Israel mai nou Ramai MAPAO ye poa sheelayu natao nou pa puletao vei kaalo souwe.

¹⁵Moses nou Reuben maikhü ye puletao pfümounah thaifüa kaalo sü peie.

¹⁶Puletao vei teidei hai Arnon deikho kai hi buyu Areor hinou deikho touchü hi buyu nuhdutao alia Medebah vei dei kou-a buyu taoe.

¹⁷Sühinou Heshbon-a loue, alia deitao hinou khoa buyu nuhdu teitei, Dibon, Bamothbaal, Beth-baalmeon,

¹⁸alia Jahaz, Kedemoth, Mephaath,

¹⁹Kiriathaim, Sibmah, alia Zereth-shahar hi buyu dei kho tao,

²⁰alia Beth-peor, Pisgah deishaotao, alia Beth-jeshimoth,

²¹sütao hai, deitao hi khoa buyu teitei, Moses nou reih soua veilouyu - Hesbon hinou ve-a buyu Amor veo Sihon vei vedei teitei loue. Moses nou puh alia puh thaosoua Midia hinou nuh khoa buyu Evi, Rekem, Zur, Hur, alia Reba, puletao hi reih veiloue. Puletao nou Sihon veo thaosoua sühi teidei taoye khasa-a hrüwe.

²²Mai kukhe maitao ye koa Israel mainou khoche nou daothayu hisü nguyuna Boer nahpoutu Balaam-a louwe.

²³Reuben maivei deirai hai teinghi loulo vatha kou Jordan rei hie. Reuben maiye kaalo peiyu hai puhmai pfümounah thaifüa, nuhdutao alia teidei haitao peie.

²⁴Moses nou Gad maikhüa puletao pfümounah thaifüa kaalo sü peie.

²⁵Puletao vei teidei hai Jazar, Gilead vei nuhdu teitei, Amon mai teidei dahli, Rabbah hinou teinghi palo buyu Aroer hi koute-e,

²⁶alia Hesbon hinou Ramath Mizpeh alia Betonim, Mahanaim hinou Debir teidei hi koute,

²⁷alia Bethharam vei deikho tao, Bethnimrah, Sukkoth, alia Zaphon, Heshbon veo Sihon veteidei shokhai touyu teitei hai loue. Puhmai deirai hai teinghi loulova Jordan rei hinou poa kou Chinnereth Zai hi kouhte-e.

²⁸Gad mai ye puhle pfümounah thaifüa kaalo peiyu tao hai teidei haitaoe.

²⁹Moses nou Manasseh khü dahli hie, puh maivei kihikha mai thaifüa kaalo sü peie.

³⁰Puletao ye peikhai touyu teidei taohai Mahanaim hinou poa Bashan teidei teitei, Bashan hi buyu Og veteidei teitei, alia Bashan hi buyu Jair mai nuh taoe, sütaohai nuh rairoue,

³¹alia Gilead teidei dahli, Ashtaroth alia Edrei, Bashan hi buyu Og veo vei nuhdu teitei louwe; haitao hai Manasseh nahpoutu Makir kihikhamai dahli ye peie.

³²Moses nou zhipeiyu teidei haitao hai teinghi palova buyu Jeriko alia Jordan rei holo vada buyu Moab maivei deikho taoe.

³³Ana Levi khüye Moses nou dei peimoe, daivanou toulouzü MAPAO nou puhmai hi paohpeiyu thaifüa; Israel maivei Ramai MAPAO hai kaalo nasü baie.